Makagunggona Aya ti Panagbalin a Napudno?
ITI pannakakita ti kasta unay a panagulbod kadagiti nataengan, masansan a tuladen dagiti agtutubo ti ulidanda. Anian a makabang-ar—ken kasta met napateg unay—ngarud, no adda maysa a napudno! Inyam-ammo ti Sports Illustrated ti kasta nga ulidan iti kinapudno babaen iti komento nga: “Adtoy ti maysa nga estoria iti panangisubli iti pammati ti maysa.”
Impadamag ti magasin ti maipapan iti ay-ayam a baseball dagiti agtutubo idiay Florida, idiay Estados Unidos. Nasippaw ti umuna a baseman ti bola ket pinadasna a sagiden ti runner a mapan iti maikadua a base. Ti reperi, ni Laura Benson, inkeddengna ti runner nga out wenno din kadua iti ay-ayam, ngem ti umuna a baseman ti nangibaga kenkuana: “Ma’am, diak nasagid ti runner.” Gapuna pinalubosanna ti managay-ayam a mapan iti maikadua a base.
Iti sabali manen a panagay-ayam dua a lawas kalpasanna, ti isu met laeng nga agtutubo nairaman manen iti kasta met laeng nga ay-ayam. Ni manen Benson ti reperi. Iti daytoy a tiempo impagarupna a saan a nasagid ti ubing a lalaki ti runner, ket pinalubosanna ti managay-ayam a mapan iti maysa a base. Nupay awan ti imbagbaga ti ubing a lalaki bayat a nagsubli iti lugarna, nadlawna nga adda di umiso a napasamak babaen ti panagkitkita ti ubing a lalaki kenkuana. Gapuna isut’ (ti reperi) napan kenkuana ket inimtuodna: “Nasagidmo aya ti runner?”
“Wen,” kinunana.
Idi binaliktad ni Benson ti pangngeddengna ket inkeddengna nga out ti runner, nagprotesta dagiti coach iti kalaban. Ngem inlawlawagna ti napasamak dua a lawasen a nasaksakbay ket kinunana: “No napudno ti maysa nga agtutubo, masapul nga ipaayko kenkuana ti panangabak.”
Dagidiay managulbod kasla rumang-ayda iti lubong itatta. Kas iti kinuna naminsan ti salmista ti Biblia: “Dagitoy dagiti nadangkes, a sinanam-ayda laeng. Pinaaduda ti kinabaknangda.” (Salmo 73:12) Iti kinapudnona, nupay kasta, ti panagbalin a napudno ipaayna ti kasayaatan a gunggona kamaudiananna. Makaipaay dayta iti panagraem dagiti pada a tattao. Ngem ti napatpateg pay, makagun-od iti anamong ni Jehova a Dios, isu a manggunggona iti maysa iti biag nga agnanayon.