Panaguli Kadagiti Bantay iti Nalaka a Pamay-an
TI NAGLUGANANMI a cable car mabalin a kasla bassit a lawalawa a nabannayat a kumalkalay-at iti maymaysa a seda a sinulid. Kinapudnona, kumalkalay-atkami iti maysa a bantay iti nalaka a pamay-an—nakalugankami iti tram a lumasat iti maysa kadagiti kaatiddogan a tramway (kable a naikapet iti nagbaetan dagiti bantay a nakaibitinan ti lumasat a tram) iti lubong.
Ti 4.3-kilometros a tramway sumang-at iti Bantay Sandia, a tumangkayag a nakatantan-ok iti ngatuen ti disierto a siudad ti Albuquerque, New Mexico, E.U.A. Iti arisadsad ti tram, iti kangato a 1,980 metros, limmugankami iti nalagda a cabin a makalaon iti 60 a tao. Bayat ti panagpangato ti cabin, kaslakami bumassit a mayabay iti nakatantan-ok a likkalikkaong a pagsang-atan a granito. Kadagiti dadduma a lugar naibitinkami iti 460 metros iti ngato ti tukok ti ginget.
Iti nakurkurang a 20 minutos dimtengkamin iti pagpaliiwan, 3,163 metros iti ngatuen ti patas ti baybay, ket makaulaw ti mabuya. Ti naglawaan a lugar a 28,500 kilometros kuadrado naiyunnat iti imatangmi. Ti ngata kangatona ti mamagbitik iti kasta unay iti pusomi, wenno ti di masingsinga a buya? Narigat a mailasin.
Ti pannakaibangon ti Sandia Peak Tramway, naammuanmi kamaudiananna, ket maysa a paglaingan iti enhenieria. Ti kasasaad ti bantay ket dandani imposible a ballasiwen kadagiti dadduma a lugar. Gapuna pinili dagiti manangibangon ti mangusar iti helicopter kas pagisakayan. Inluganda iti helicopter ti isuamin manipud asero a busoran agingga kadagiti konkreto. Dua a torre ti naibangon a maipaay kadagiti kable, ti maysa 71 metros ti katayagna ket ti sabali 24 metros. Kasapulan ti apag-isu a kalkulasion iti panangibangon iti nalagda a pundasion para kadagitoy a torre ken kalpasanna ti siuumiso a panangibatog kadakuada. Naikkan kadagiti preno tapno masigurado a natalged. Ti proyekto, a naileppas iti las-ud ti 24 a bulan, nalpas idi primavera ti 1966.
Idi nalpasen ti biahemi, tinangadmi manen ti nakataytayag a bantay a kalkalpasmi pay laeng nga inuli ken binabaan. Anian a makakayaw dagidiay a bambantay! Anian a makaparagsak ken makapagpakumbaba no panunoten ti Namarsuada, Daydiay a mangganting kadagiti bambantay iti timbanganna! (Isaias 40:12)—Naipatulod.