Ti Nakaskasdaaw a Pangpasahero a Trambia ti Utah
TI “Kangatuan a Pangpasahero a Trambia iti Lubong.” Kastat’ pannakaiyam-ammo ti Skytram idiay Bridal Veil Falls sadi Provo, Canyon, Utah, E.U.A. Inyimtuodko, ‘Pudno ngata dayta?’ Malagipko ti panagluganko iti trambia idiay Catalonia, España, agarup 15 a tawen itan ti napalabas tapno agpasiar kadagiti kabambantayan ti Montserrat, ket dayta a trambia ti impagarupko a nangatngato. Isu nga apay a kunaenda a ti kangatuan ket isut’ adda ditoy Bridal Veil Falls? Gapu ta 374 metrot’ kangatona ken 534 metrot’ kawatiwat ti kablena—adda promedio nga anggulo a nasurok nga 45 degrees. No ti cabin a makalaon iti innem a tao ket makaasideg iti bantay, iti kangato a 1,900 metro, agbalin a 62 degrees ti anggulo!
Teknikal a pamay-an ti nakaibatayan dayta nga impormasion. Ti biahe iti cabin a makalaon iti innem ket nakaay-ayat bayat nga agpangatokami manipud iti highway ken lasaten ti Bridal Veil Falls iti kannigid. Sumang-atkami iti promedio a kapartak a 8 kilometro iti kada oras. Adda iti aglawlawmi dagiti bantay—ti adda iti likudanmi a Bantay Timpanogos ket 3,600 metrot’ kangatona ken ti Bantay Cascade ti sangsang-atenmi. Ti dissoor ket addaan makingngato ken makimbaba a pagayusan a tumpuak iti kangato a 180 metro sakbay nga agayus iti Karayan Provo. Dadduma a danum ket maiyayus iti maysa a hydroelectric station nga 6 kilometro ti kaadayona.
Naluktan ti inaramid dagiti Swiso a trambia idi 1962 ket nasurok a 1.5 milionen a tao ti nailuganna nga awan pay a pulos ti naaksidente. No medyo madanagankayo nga aglugan iti trambia, kunaen ti maysa a broshur: “Dagiti trambia a kas itoy Skytram ti katalgedan a lugan iti nagbaetan ti dua a lugar, sigun iti historia ken estadistika.” Iti sumaganad a panagluganyo iti trambia, ammuenyo—nangatngato kadi ngem daytoy adda idiay Utah?
[Picture Credit Line iti panid 31]
Impaay ti Mountainland Travel Region