Saan a Paset ti Lubong?

BABAEN ITI KORESPONSAL TI AGRIINGKAYO! IDIAY ALEMANIA

“SAANDA a paset ti lubong, a kas kaniak a saan a paset ti lubong.” (Juan 17:16) Babaen kadagitoy a sasao, dineskribir ni Jesus ti naan-anay a neutralidad dagiti pasurotna maipapan kadagiti napolitikaan a ganuat. Maragpat kadi dagiti Kristiano ita daytoy a pagalagadan?

Usigenyo dagiti sumaganad a komento ti warnakan maipapan ti pannakiraman ti Kakristianuan iti dati a German Democratic Republic (GDR), nga inturayan idi ti rehimen a Komunista agingga iti pannakarbekna idi 1990.

• “Nupay mararaemen ti Lutheran Church iti GDR iti apagbiit a tiempo kas ina ti natalna a rebolusion, agparang a sipapartak a mapukpukawen ti kinalatakna. Kadagiti adu, ad-adda nga agparang dayta kas sadiri ti suporta agpaay iti rehimen ken lugar a pakaangayan ti ganuat agpaay ti Stasi (State Security Service).”​—Die Zeit, Nobiembre 1991.

• “Inyebkas ti Lutheran Church iti nadumaduma a probinsia . . . ti siddaaw iti pannakairaman dagiti trabahador ti iglesia ken kameng ti paroko iti Stasi.”​—Evangelische Kommentare, Enero 1991.

• “Mangngegan dagiti panguluen ti [Lutheran] Church dagiti reklamo a din ay-aywanan ti papadi dagiti tattao a kas iti sigud nga ar-aramidenda, tangay aktiboda iti politika.”​—Süddeutsche Zeitung, Pebrero 1990.

• “Kinuna ni Weizsäcker [sigud a presidente ti Federal Republic of Germany] a kanayon nga adda makatulong nga akem ti [Lutheran] Church iti napolitikaan a relasion ti dua nga Estado ti Alemania.”​—Wetterauer Zeitung, Pebrero 1992.

Saan laeng a limitado iti Lutheran Church ti pannakibiang iti politika. Impadamag ti The European a “gistay amin nga organisasion ti iglesia [Protestante] ti nastrek dagiti ahente ti Stasi.” Kinuna ni Manfred Stolpe, nga inladawan ti The European kas “ti kangrunaan a mannakiareglo ti iglesia protestante agpaay kadagiti agturay a komunista,” iti panangikalinteganna: “Nakialamanoak koman iti Diablo no daytat’ kasapulan a mangparang-ay iti panggepmi.”

Impadamag ti Guardian ti Londres maipapan iti nadekket a relasion ti klero ken ti Mafia sadi Italia. Kinunana: “Nabayag a sitatalna a nagkadua ti Iglesia ken ti Cosa Nostra a namagbalin iti iglesia a masansan a mapabasol iti pannakikinnumplot.”

Impablaak ti Toronto Star ti maysa nga artikulo maipapan ti pannakitinnulong ti dadduma a papadi ti Russian Orthodox iti sigud a KGB. Kuna ti report: “Ti pannakaibutaktak ti pannakitinnulong ti iglesia iti rehimen a komunista itakderanna ti kakas-angan a pannakakondenar. . . . Sagudayen ti material manipud kadagiti archive ti KGB . . . a saan laeng a liniputan dagiti nangangato nga opisial ti iglesia dagiti bukodda a prinsipio no di ket situtulok pay nga ikompromisoda dagiti narelihiusuan a papanguluen idiay ballasiw taaw.”

Nupay itultuloy dagiti iglesia ti Kakristianuan ti makibiang iti politika, itandudo ti pudno a Kinakristiano ti pammilin ni Jesus a saan nga agbalin a paset ti lubong.