Manipud Managbasatayo
Panangay-ayam iti Imoralidad Pagyamanan iti artikulo nga “Agimtuod Dagiti Agtutubo . . . Panangay-ayam iti Imoralidad—Aniat’ Dakesna?” (Pebrero 8, 1994) Naki-date-ak idi iti maysa a lalaki, ket sangkakunana a no dinak maagkan wenno masagid, dina maipakita ti kasta unay a panagayatna kaniak. Nakaadayokami, ket dua a lawas kalpasanna, kinanselarna ti kasarmi. Nasakit ti nakemko—ken nariknak a nagundawayanak. Diak la koman nagbalin a maag unay. Pagyamanan iti panangipablaakyo kadagitoy nga artikulo a kasapulak unay.
N. R., Estados Unidos
Nakiramanak idi iti kasta unay a pannakilinnailo, ket impagarupko nga awan dakesna la ketdi no dikam makaaramid iti pannakiabig. Tinulongannak daytoy nga artikulo a mangapresiar a ditay marabak ti Dios tangay ammona amin a banag.
T. J., Nigeria
Kada maam-ammok dagiti miembro ti pammatiyo, awatek ti maysa a kopia ti Agriingkayo! Kasta ti napasamak iti Pebrero 8, 1994 a ruar. Naallukoyak unay iti artikulo maipapan iti imoralidad. Dagiti publikasion ti bukodko nga Evangelical Lutheran Church dida salaysayen dagita a topiko, ngem ad-adda a salsalaysayenda dagiti homoseksual ken Lesbian. Kadagiti magasinyo, ibuksilanyo dagiti tema a makalais iti sabsabali. Dayawek ti tured ken nabileg a pammatiyo.
H. S., Alemania
Pagyamanan unay iti artikulo nga “Agimtuod Dagiti Agtutubo . . . Kasano Kaadayo ti ‘Adayon’?” (Oktubre 22, 1993) Madama a maki-date-ak iti agtutubo a Kristiano a lalaki. Nupay kadawyan iti lugarmi ti panaginnungngo ken panaglinnailo, idi pay damo ket nangisaadkamin kadagiti pagbeddengan. Saan a nalaka a pagtulnogan dagiti nalinteg a pagalagadan ni Jehova, ket siguradok nga adunto ti matulongan daytoy nga artikulo.
P. S. F., Brazil
Nupay agtawenakon iti 26, napateg kaniak dagiti artikulo ti “Agimtuod Dagiti Agtutubo . . . ” Makidangdangadangak idi iti daytoy a partikular nga isyu. Maragsakanak unay ta nabatad ken nalawag ti panagkuna ti artikulo a ti adayo ket adayon!
V. V., Belgium
Dagiti Baresbes Natignayak nga agsurat gapu iti artikulo “Dagiti Baresbes ti Lubong—Mararaut a Gameng ti Ekolohia.” (Enero 22, 1994) Timmulong dagiti retrato a mangipaganetget iti annongentayo a mangtaginayon iti panamarsua ni Jehova iti amin a kinapintasna. Maragsakanak a ti Dios ‘yegnanton ti pannakadadael dagidiay mangdaddadael iti daga.’—Apocalipsis 11:18.
Z. C. B. S., Brazil
Maysaak a tin-edyer a lalaki. Nabasak ti artikulo ket naamirisko nga agsagsagaba ti nakaparsuaan iti pannakararit ti adu a paset ti lubong. Maawatak itan a nupay pagsasaritaan dagiti tattao maipapan iti panagkaykaysa dagiti ganuatda, dida kabaelan. Isu a kayatko nga aramiden ti amin a kabaelak nga adalen ti Biblia tapno addaakto iti Paraiso ti Dios iti masanguanan.
Y. K., Japan
Ti artikuloyo ket maysa a nasayaat a pagarigan no kasano a ti ragsak iti panangbasa iti Agriingkayo! ket agtaud saan laeng a kadagiti linaonna no di ket iti pannakadisenio ken pannakaiparangna: ekselente dagiti retratona, naurnos ken nadalimanek dagiti diseniona. Pagyamanan.
M. E., Canada
Nakalasat iti Kampo Konsentrasion Naparegtaak unay iti kapadasan ni Feliks Borys a “Sinalakniban ti Pammati iti Dios.” (Pebrero 22, 1994) Talaga a simgarak idi binasak dayta, ket diak malapdan ti agsangit. Inikkannak ti bileg nga agandur iti sidong ti pakasuotan.
A. C., Italia
Ti artikulo tinulongannak nga ad-adda a mangapresiar iti pannakabalin ni Jehova a mangsalaknib kadagidiay agtalek kenkuana. Anian a makaparegta ti panangbasa maipapan iti nakaskasdaaw a wagas a panangsungbat ni Jehova kadagiti kararag ni Feliks Borys!
E. F., Sweden