Manipud Managbasatayo

Dios ti Gubat? Pagyamanan kadagiti nagsayaat nga artikulo iti Nobiembre 8, 1993 nga Agriingkayo! “Ti Panangmatmat iti Biblia . . . Mannakigubat Aya a Dios ni Jehova?” Adun a tawen nga iyim-imtuod ti adu dayta a saludsod. Pagsasaritaanmi no kua dayta kas maysa a pamilia. Ti artikuloyo, agraman ti dadduma a panagsirarak nga inaramidko, ti nakatulong a nangsungbat kadagiti saludsodko.

S. T., Estados Unidos

Panagpasuso Tinagiragsakmi a binasa ti artikulo a “Ti Pagsayaatan ti Gatas ti Ina.” (Setiembre 22, 1993) Agpaspasuso ni baketko iti anakmi. Ngem awan ti nadakamat iti artikulo maipapan iti kinapudno a ti panagpasuso magmaganna ti bagi ti maysa nga ina. Nalabit saan a makapagpasuso ti tunggal babai no rabii. Iti kasasaadmi, kas pangarigan, no bassit la ti turog ni baketko, pagdaksanna unay dayta.

T. K., Alemania

Pagyamanan kadagiti kapaliiwanyo. Nadakamat dagiti napalabas nga artikulo ti dadduma kadagiti pakarigatan a mabalin a mapadasan dagiti kabbaro nga inna iti daytoy a banag. Kitaenyo, kas pangarigan, ti “Agriingkayo!” iti Hunio 8, 1983, ken Marso 22, 1986.​—ED.

Adayon? Kayatko ti agyaman kadakayo iti artikulo nga “Agimtuod Dagiti Agtutubo . . . Kasano Kaadayo ti ‘Adayon’?” (Oktubre 22, 1993) Gistay makatawenen a nabautisaranak a Kristiano, ket masansan nga ut-utobek ti panangmatmat ni Jehova maipapan iti daytoy. Apresiarek unay ti panangilawlawagyo iti daytoy a tema. Nupay narigatto dayta, determinadoak nga agbiag kadagiti pagalagadan ni Jehova.

C. S., Estados Unidos

Nabayagen a bulbulan a mangsapsapulak iti kasta nga artikulo. Siam a bulanen a makide-date-ak, ket idi simmangpet ti artikulo, dagus a tineleponuak ti nobiok. Pagyamanan unay iti panangisuroyo kadakami kadagitoy sensitibo ken delikado a banag.

A. P. G. S., Brazil

Naimpusuan unay ti panagyamanko kadakayo iti artikulo. Dimteng dayta iti tiempo a kasapulak dayta. Agtawenak iti 16, ket adda kursunadak a baro. Panggepko a siak ti umunan a mangaramid iti addang tapno ayatennak. Siempre, ammok a dakes ti pannakiabig, ngem impagarupko no ti panagbisong ken panangarakup ket saan met nga iyaadayon. Ngem babaen iti daytoy nga artikulo, naawatak nga agingga a magtengko ti edad a mabalinkon ti makiasawa, dagita a banag ket adayon!

M. H., Japan

Nataenganakon, ngem awan pay asawak, ket inyim-imtuodkon dayta met la a saludsod. Nabayagen a makide-date-ak, ket kas maysa nga amin-tiempo a managebanghelio, ammok koman ti sungbat. Ngem no riningbawannakan ti rikriknam, saan unayen a nasin-aw ti pangngeddengmo. Naintiempuan unay ti artikulo ken tinulongannak unay a mangilawlawag iti daytoy a tema iti Kristiano a lalaki a pakide-date-ak. Nabasami aminen ket kayatmi a pagbalinen dagiti bambanag a nadayaw iti imatang dagiti amin.

M. R., Estados Unidos

Inkarkararagko ti pannakailawlawag daytoy a tema. Idi nakitak ti paulo ti artikulo, ‘naklaatak.’ Sigagagar a binasak ti artikulo, ket ammokon no kasano ti rumbeng a panagtignayko.

S. G., Italia

Awan Dara a Panangagas Kayatko ti agyaman unay kadakayo iti artikulo nga “Agtitinnulong Dagiti Saksi ni Jehova ken Dagiti Doktor.” (Nobiembre 22, 1993) Bayat a basbasaek dayta, timrem dagiti luak kas panangapresiar. Inlawlawag ti artikulo ti dadduma a problema a di ammo ti kaaduan kadatayo gapu ta ditay pay napadasan daytoy a problema. Ngem kadagidiay dadduma kadatayo a makapadasto iti pannakasuot ti pammatitayo gapu iti dara, makaliwliwa a maammuan a sisasaet nga agtartrabaho dagiti kakabsattayo agpaay a pagimbagantayo.

B. B., Estados Unidos