Manipud Managbasatayo
Dagiti Credit Card Nangnangruna a tinagiragsakko ti artikulo a “Plastik a Kuarta—Usarenyo Aya Ida?” (Disiembre 8, 1993) Makapaladingit a naammuanmi ken baketko sumagmamano a tawen ti napalabasen a nakautangkam iti credit-card a nabayag met sakbay a nabayadanmi, uray pay kalpasan a dinadaelmin dagiti card-mi. Nupay kasta, maigapu iti kinanam-ay, nabiit pay a nangalakam iti kabbaro a card. Dagiti naintiempuan a palagipyo maipapan kadagiti plastik a kuarta ken dagiti peggadna ti nakatulong kadakami a nangamiris nga usarenmin a naimbag dayta ita.
M. B. ken D. B., Estados Unidos
Sarsarita Maipapan Kadagiti Animal Pagyamanan iti artikuloyo maipapan kadagiti polar bear a napauluan “Nadaeg a Higante iti Amianan ti Canada.” (Disiembre 8, 1993) Nagsayaat ti pannakaisuratna dayta nga artikulo. Talaga a nagutugotak a mangapresiar kadagiti kinapudno a nailawlawag no kasanot’ kinamanagayat ni Jehova iti panangparsuana kadagiti animal a pakaragsakantayo.
D. C., Estados Unidos
Makapakatawa ti artikuloyo a “Ti Maysa a Kudu Pabainanna Dagiti Leon” (Nobiembre 22, 1993). Kasko la makitkita ti suron ken pannakapabain ti maysa a kalakian a kudu idi pinadasna a linuguban daytoy awan-biagna a suer a kudu. Sa ti wagas a napapanawna ti maysa a pangen dagiti leon—makapakatawa a talaga! Ipakitana a pagay-ayat ni Jehova ti kinaragsak.
A. L., Estados Unidos
Naragsakanak iti wagas ti panangibuksilyo iti suheto a “Panangduktal Kadagiti Palimed ti Igat.” (Oktubre 22, 1993) Ipakita dagitoy a parsua ti kinapudno ti panamarsua a sagudayen ti Biblia ken parmekenna ti amin a panangikagumaan a mangpasingked iti teoria ti ebolusion.
C. S. S., Brazil
Agtawenak iti 11, ket talaga a nagustuak ti padamag ti “Panangmatmat iti Lubong” a napauluan “Panagdayaw iti Utot.” (Nobiembre 8, 1993) Inlawlawag ti artikulo a patien dagiti papadi idiay templo sadi India nga inton matayda, magun-odda ti pannakaisalakan babaen ti pannakaipasngayda manen kas utot! Kunada a saanda a talaga nga utot no di ket mensahero ida ti Dios. Karkarna dayta!
E. L., Estados Unidos
Dagiti Piesta Kayatko ti agyaman unay kadakayo kadagiti serye a “Dagiti Piesta—No Apay a Di Selebraran Ida ti Dadduma nga Ubbing.” (Nobiembre 22, 1993) Uray la a pinagsangitnak ti paset a “Dikam Mapapaidaman!” Masansan a mariknak nga agmaymaysaak no yebkasko dagiti patpatiek kadagiti kaeskuelaak, ket tinulongannak daytoy nga artikulo a nangamiris a saanak nga agmaymaysa ken pulos a saanto.
B. P., Estados Unidos
Awan pay ti malagipko a sinelebrarak ti Krismas. Adda tiempo idi nga apalak ti dadduma nga ubbing. Ket sakbay unay a rimmuar daytoy nga artikulo, naawisak iti maysa a Krismas party. Diak pinatgan dayta ket inkagumaak nga inlawlawag ti makagapu iti siguden nga ammok. Ngem gapu ta naawatak a ti Krismas, a nagbalinen a tinawen a selebrasion uray ditoy Japan, ket maysa a pagano a selebrasion a nainaig iti demonio, masiguradok nga umiso la ti inaramidko.
K. I., Japan
Doble a Panagbiag Pagyamanan iti panangipablaakyo iti artikulo nga “Agimtuod Dagiti Agtutubo . . . Doble a Panagbiag—Apay a Saan?” (Disiembre 22, 1993) Agtawenak iti 15 ken napadakkel kas maysa a Kristiano. Ngem kumapkapuy ti espiritualidadko, ket masansan a mariknak nga in-inut nga umad-adayoakon iti kinapudno. Maysa kadagiti makagapu isut’ kinaestrikto unay dagiti nagannakko, ket masansan a mariknak a kasapulan nga aramidek ti iparparitda, nupay ammok a dakes dayta. Bayat a binasak ti artikulo, naamirisko nga impaayannak ni Jehova a Dios iti tulong. Ammok a saan la a sisiak ti nagaramid iti bambanag a di ammo dagiti nagannakko. Ngem bayat nga intultuloyko ti panagbasa, naklaatak no kasano ti eksakto a panagrikna ti dadduma a kas iti nariknak. Ammok nga addanto rigrigatna, ngem ikagumaak a balbaliwan ti estilo ti panagbiagko babaen iti tulong ni Jehova.
K. J., Estados Unidos