Manipud Managbasatayo

Dagiti Lumakay Rumbeng nga agyamanak kadakayo iti artikulo ti Agosto 8, 1993 nga Agriingkayo! a “Panaglakay nga Addaan Pannakaawat.” Ti artikulo pinagluanak. Ammoyo ngamin, ngangngani 90 ni nanangko. Nabiit pay nga inkeddengna a din makikabbalay kadakami, nupay di koman a rumbeng a kasta, sa ket natnag a nakabluan ti takkiagna. Naimbagan metten ngem di rumbeng a mapanawan nga agmaymaysa. Namin-adun a diak natabunuan dagiti Nakristianuan a gimgimong, ket no dadduma marikriknak a mapagpagurak sa metten ni Jehova. Ngem pinaregtadak. No malmaldaangak, malagipko daytoy nga artikulo.

B. T., Estados Unidos

Pammakawan Kabasbasak ti artikulo a “Ti Panangmatmat ti Biblia . . . Kasano Kaan-anay ti Pammakawan ti Dios?” (Disiembre 8, 1993) Dayta a talaga ti kasapulak. Impaawat kaniak daytoy nga artikulo a no ikkaten ti Dios dagiti basol, awandan, napunasdan, napukawdan. Bayat nga isursuratko daytoy, mariknak ti pudno a kinatalna ti isip.

J. W., Estados Unidos

Makaliwliwa a maammuan a ti puso ti kitkitaen ni Jehova ken situtulok a mangpunas kadagiti basoltayo. Dati, mariknak a diakon maikari iti pammakawan ni Jehova a namagleddaang kaniak. Pangpanggepek pay idin ti agpakamatay. Tinulongandak dagiti nadekket a gagayyem iti kongregasion. Ngem, kaskasdi a kasapulak ti panangipanamnama, ket daytoy nga artikulo ti nakatulong kaniak.

K. H., Estados Unidos

Anteohos Pagyamanan unay iti artikulo a “Panangsukimat Kadagiti Anteohos.” (Hulio 8, 1993) Ammok nga adda sakit ti matak ken rumbeng nga agpakonsultaak iti maysa nga espesialista ti mata, ngem intantantanko dayta. Kalpasan a nabasak ti artikuloyo, inyeskediolkon ti panagpakonsultak. Naragsakanak a nangaramid iti dayta. Dimteng daytoy nga artikulo kaniak iti umiso a tiempo.

J. W., Inglaterra

Matalek nga Agama Di nagressat ti panangbasak iti pakasaritaan a “Ti Matalek a Paguadan ni Tatangko.” (Disiembre 22, 1993) Pinaregtanak daytoy nga artikulo a palawaen ti panagserbik iti Dios. Pinarayray ti natibker a determinasion dagiti Davey (agama) nga agserbi ken Jehova agingga ken patay ti determinasionko idi nagbautisarak dua a tawenen ti napalabas idi agtawenak iti 18. Namnamaek a dagiti artikulo a kas iti daytoy ti manggutugotto iti adu nga agtutubo iti intero a lubong.

C. M., Italia

Dagiti Kulibangbang Kayatko nga alaen daytoy a gundaway tapno agyaman iti artikuloyo a “Maysa nga Aldaw iti Biag ti Kulibangbang.” (Oktubre 8, 1993) Tinagiragsakmi ken baketko ti nagpasiar idiay Zion National Park itay napan a bulan. Basbasaenmi idi daytoy nga artikulo idi kellaat a nagdisso ti maysa a kulibangbang iti daga sana inyukap a naimbag dagiti payakna. Pulos a dimi ammo idi no apay nga aramidenda dayta! Talaga a tinulongannakam ti artikulo a mangapresiar kadagiti nakaskasdaaw a pinarsua ni Jehova.

C. B., Estados Unidos

Naalipunget a Nagannak Apresiarek unay ti artikulo nga “Agimtuod Dagiti Agtutubo . . . Apay a Managalipunget Dagiti Dadakkelko?” (Nobiembre 8, 1993) Nabiit pay a naalipunget ni nanangko. Talaga a tinulongannak ti artikulo a mangamiris a dagiti pakarigatan iti ekonomia, agraman ti dadduma a responsabilidad, ti kangrunaan a pakaigapuan ti panagalipungetna. Ita, ad-adda a maliwliwaak no arakupek ken ibagak nga ay-ayatek isuna.

T. B., Estados Unidos

Nagannakkam ti dua a barito nga agtawen 7 ken 12. Nabiit pay a rimsua idiay balaymi ti sumagmamano kadagiti isyu a pinagminaryo iti daytoy nga artikulo, ket inkagumaanmi​—ngem di nagkurri​—nga ilawlawag dagiti bambanag kadagiti annakmi. Daytoy nga artikulo ti talaga a sungbat dagiti kararagmi. Daytat’ nakatulongen iti kasasaadmi.

R. P. ken A. P., Estados Unidos