Manipud Managbasatayo
Kinaliday Agyamanak unay kadagiti serye a “Kinaliday—Ti Maaramidanyo iti Dayta.” (Setiembre 22, 1993) Dimteng dayta idi aldaw a nalidayak unay. Nupay pinagarubosna dagiti luak, simmayaat ti riknak kalpasan a nabasak dayta. Malagipko ti sumagmamano a gagayyemko a maparegtanto a mangbasa iti dayta.
B. H., Estados Unidos
Nupay tartarigagayak idi ti mangbasa iti kasta nga artikulo, daytat’ dimteng a diak napakpakadaan. Kayatko nga iyebkas ti naimpusuan a panagyaman kadagiti linaonna a balakad. Ti kinaliday ket talaga a narigat a maawatan no dimo pay napadasan.
C. G., Italia
Agtawenak iti 38 ket malidlidayak unay, gapu ta bugbugtongak nga anak ken napadasak ti panagbaliwbaliw ti karerak ken diborsio. Makailawlawag ken makaisuro ti artikulo. Nupay kasta, diyo nadakamat a ti kinaliday ket makaituggod iti imoralidad, panagusar iti maiparit nga agas, ken dakes a pannakikuykuyog.
J. B., Estados Unidos
Iti daytoy a partikular nga artikulo, inrantami nga imbinsabinsa dagiti pamay-an a mangparukma iti kinaliday imbes a maipapan kadagiti pagpeggadanna. Nupay kasta, apresiarenmi daytoy a kapaliiwan.—ED.
Simotsimot ken Kulibangbang Kas maysa nga adda interesna iti biolohia, kayatko ti mangnayon iti maysa a punto iti artikulo a “Simotsimot Wenno Kulibangbang—Kasano a Mailasinyo?” (Mayo 8, 1993) Ti dagus a kasayaatan a pangilasin iti nagdumaan ti simotsimot wenno kulibangbang isut’ panangpaliiw iti posturada nga agdisso. Agdisso ti simotsimot nga agpatas ti panagukap dagiti payakna; ti kulibangbang, agpada a nakalikig ti panagukap dagiti payakna.
Y. Y., Estados Unidos
Pagyamanan iti daytoy a kanayonan nga impormasion. Kuna ti “The World Book Encyclopedia” a pudno daytoy iti ‘kaaduan a kulibangbang ken simotsimot.’—ED.
Agimtuod Dagiti Agtutubo . . . Pagyamanan iti artikulo a “Dumakdakkelak Kadi a Normal?” (Setiembre 22, 1993) In-inaunaak iti makatawen ken adingko, ket isut’ nakataytayag. Ita, ammokon a dumakkelakto met laeng.
C. L., Estados Unidos
Pagyamanan iti artikulo a “Ti Ngay Panagpalpallailang?” (Hunio 22, 1993) Maysaak a kita ti agtutubo a di nairuam nga agpalpallailang a kaduak ti dadduma nga agtutubo. Gapu itoy, ammok a siak ti yan ti problema. Ngem ti artikulo tinulongannak a mangapresiar a ti panagpalpallailang maisagmaknaka. Nasaysayaat laengen no ti panagluto, panag-drawing, panagsurat, ken panangasaba ti pangusarak iti tiempok.
K. R., Estados Unidos
Sangapulo ket maysa laeng ti tawenko, ngem naragsakanak a nakabasa iti “Kasano a Maliklikak ti AIDS?” (Setiembre 8, 1993) Daytat’ nagsaritaanmi a dua ken nanangko. Pagyamanan iti panangibinsabinsayo no kasano a maliklikak ti virus ti AIDS. Imbinsabinsayo dayta iti nadumaduma a pamay-an, saan laeng nga iti espisipiko a wagas!
L. K., Estados Unidos
Museo ti Holocaust Nabiit pay nga inyurnos ti superbisorko ti panangpasiarmi idiay Holocaust Memorial Museum. Intedko kenkuana ti Mayo 8, 1993, nga artikulo a “Maysa a Museo ti Holocaust ken Dagiti Saksi ni Jehova” tapno maparayray ti panagpasiarna. Mangibumbunong ti museo iti 500 a kard a naglaon kadagiti personal a kapadasan. Adda kapadasan ni Emma Arnold—maysa kadagiti Saksi ni Jehova, iti naawatna a kard. Naam-ammo ti pamiliami dagiti Arnold idi 1951 ken adda pay retratoda iti albummi a kaduami ida. Nasdaaw ti superbisorko ta saanna laeng a nagun-odan ti kapadasan ti maysa a Saksi no di ket ti pay kapadasan ti gayyem ti pamiliami! Impakitak kenkuana ken kadagiti katrabahuak dagiti retratomi ken ti kapadasan ti manugang ni Kabsat Arnold a ni Max Liebster, a nagparang iti Pagwanawanan nga Abril 1, 1979.
J. K., Estados Unidos