Manipud Managbasatayo
Maysa a Pamilia Kinaritna Dagiti Nazi Agtawenak iti 90 ken makiin-innadalak kadagiti Saksi ni Jehova. Nabasak ti artikulo nga “O Jehova, Pagtalinaedem a Matalek ti Balasitangko!” (Setiembre 22, 1993) Daytat’ pakasaritaan dagiti Saksi a nagannak ken ti balasitangda a nupay naglasatda iti nakaro a panangidadanes ni Hitler, inkagumaanda nga intandudo dagiti sursuro ni Jehova. Nakasangitak bayat a binasak dayta. Ad-adda a determinadoak a mangadal a sipapasnek kadagiti sursuro ni Jehova.
S. T., Japan
Kasta unay ti panangapektar kaniak daytoy a kapadasan. Balasitang laeng ni Simone Arnold Liebster a naisina kadagiti nagannakna ken naibalud iti maysa a reformatory gapu iti panagtulnogna ken Jehova. Anian a nagsayaat nga ulidan iti pammati!
M. C. L. S., Brazil
Ti panagpannuray ken Jehova ken ti ayat, dignidad, ken bileg a napasaranna ken dagiti nagannakna ti nanggutugot kaniak a mangusig iti relasionko ken Jehova. Nariknak ti agpakumbaba, ket tinulongannak a mangapresiar kadagiti naespirituan a gunggona ti panagibtur ken pammati.
V. B., Australia
Kinaliday Namitlo wenno namimpat a binasak dagiti artikulo maipapan ti kinaliday (Setiembre 22, 1993). Insingasingyo a masapul nga agsala, agkanta, ken agtignay a naragsak ti maysa. Ngem diyo nadakamat no kasano a ti adda depektona a kemikal ti bagi ti gapu nga agpakamatay ti maysa.
P. C., Estados Unidos
Dagiti artikulo ket saan a naipamaysa kadagidiay agsagsagaba iti nakaro a panagleddaang wenno agpangpanggep nga agpakamatay, a kadawyan nga agkasapulan iti naisalsalumina a panangaywan. Imbes ketdi, naiturongda kadagidiay agsagsagaba iti temporario a pagilasinan ti kinaliday gapu kadagiti nakalkaldaang a pasamak, kas ti ipapatay dagiti ing-ingungoten. Dagiti artikulo maipapan iti panagleddaang ket naipablaak iti ruarmi nga Oktubre 22, 1987, ken uray iti serye nga “Agimtuod Dagiti Agtutubo . . .” iti daytoy a ruar.—ED.
Makin-amianan a Lawag Magustuak ti artikuloyo a “Dagiti Misterioso a Bambanag nga Adda iti Angin” (Setiembre 22, 1993) maipapan iti aurora borealis. Ngem diyo nadakamat a makita met dagiti lawag manipud iti makin-amianan ken makindaya a paset ti Scotland. Adda pay ketdi kanta maipapan ‘ti makin-amianan a lawag ti kadaanan nga Aberdeen’!
G. S., Scotland
Pagyamanan iti kanayonan nga impormasion.—ED.
Panangsalaknib iti Atap a Biag Siak ti presidente ti maysa nga environmental foundation iti lugarmi. Nasayaat a mabasa dagiti serye dagiti umiso nga artikulo maipapan iti aglawlaw. (“Asinot’ Mangsalaknibto iti Atap a Biag?,” Nobiembre 8, 1993) Adun a tawen a pampanunotek a no awan ti Dios, napukawtay koma aminen.
M. S., Estados Unidos
Talaga nga inaramid ti Dios a ti daga ket mataginayon, isu a di pagduaduaan a napaay dagiti panangikagumaan ti tao a mangdadael iti dayta. Ngem kamaudiananna, ti solusionna isut’ ‘panangiyegna iti pannakadadael kadagidiay mangdaddadael iti daga.’ (Apocalipsis 11:18)—ED.
AIDS Naragsakanak unay kadagiti artikulo maipapan iti AIDS iti serye nga “Agimtuod Dagiti Agtutubo . . .” (Agosto 22, 1993, Setiembre 8, 1993) Agtawenak iti 20 ken masansan a mabainak ta maysaak pay la a birhen. Ngem kalpasan a nabasak dagidiay nga artikulo, naamirisko a ti kinabirhenko ket maysa a sagut manipud ken Jehova.
L. K., Estados Unidos
Di umiso ti panangipaawat nga agpada a napeggad ti panagdenna dagiti agsupadi ti seksoda kadagidiay agpada ti seksoda. Ipakita amin a panagsirarak a dakdakkel ti posibilidad dagiti homoseksual a maakaran iti HIV.
J. S., Estados Unidos
Ipakita ti panagsirarak a talaga a dakdakkel ti posibilidad dagiti homoseksual a maakaranda iti HIV. Ngem, kuna dagiti eksperto a kasta unay ti iyaadu dagiti naakaran nga agsupadi ti seksoda. Ket sigun iti maysa a pannakangiwat ti U.S. Food and Drug Administration, dagiti babbai “ti kapartakan a maakaran kadagiti naakaran iti HIV iti daytoy a pagilian.” Saan met ketdi a kanayon a dagiti babbai ti mapabasol; adu ti naakaran gapu kadagiti nalulok nga assawada.—ED.