Manipud Managbasatayo
Panagadal iti Pagtaengan Apresiarek ti artikuloyo a “Panagadal iti Pagtaengan—Agpaay Aya Kadakayo?” (Abril 8, 1993) Agad-adalak a bukod idiay balaymi ngem diak mairingringpas dagiti schoolwork-ko. Ngem naparegtaak idi nabasak ti artikuloyo. Ita nasayaaten ti eskediolko.
N. S., Estados Unidos
Panagplano ti Pamilia Nasairak unay iti kangrunaan nga artikulo ti Pebrero 22, 1993 a “Panagplano ti Pamilia—Sangalubongan nga Isyu.” Saan a makaay-ayo nga isingasing a dagiti responsable a Kristiano rumbeng a limitaranda ti kadakkel ti pamiliada. Iti aniat’ pangibatayanyo a ti bilin ti Dios idiay Genesis [a “punnuen ti daga”] ket saan nga agaplikar kadagiti Kristiano?
A. D., Estados Unidos
Ti bilin ti Dios kada Adan ken Eva a “punnuen[da] ti daga” ket naulit ken Noe ken ti pamiliana. Nupay kasta, awan masarakan idiay Biblia a mangpilit iti panagpaadu dagiti Kristiano. (Genesis 1:28; 9:1-5; Aramid 15:29) Kinapudnona, komendaran ti Biblia dagiti Kristiano nga agtalinaed a di naasawaan “gapu iti pagarian.” (Mateo 19:12; 1 Corinto 7:38) Tunggal pagassawaan rumbeng ngarud nga aramidenda ti bukodda a pangngeddeng no maipapan iti panaganak ken pananglapped iti panagsikog. Yantangay naibilin kadagiti Kristiano nga ipaay ti pisikal, emosional, ken naespirituan a kasapulan dagiti annakda, mabalin ngarud a maamiris dagiti responsable a nagannak a kednganda ti kadakkel ti pamiliada tapno maipaayda ti kasta a panangaywan. (1 Timoteo 5:8) Di pulos a labsingen daytoy ti kinapudno a dagiti annak “ti pagpatawid ni Jehova.” (Salmo 127:3)—ED.
Alkoholismo Pagyamanan kadagiti nagsayaat nga artikulo ti “Agimtuod Dagiti Agtutubo . . . ” iti Enero 8 ken 22, 1993 a ruar nga isu ti “Pudno Aya a Maadiktoak iti Panaginum?” ken “Kasano a Maisardengko ti Aginum?” Agtawenak iti 48 ken [agpapaimbag nga] alkoholiko. Makadudog-puso dagiti makadangran nga epekto daytoy a “sakit” iti bagi, isip, ken espiritu. Idi naamirisko nga adiktoakon iti alkohol, nariknak a kasla dinak mapakawan ni Jehova. Ngem napanak kadagiti panglakayen, ket impaayandak iti naayat a tulong. Kalpasan ti medio panagsublik manen nga aginum, simrekak iti maysa a programa a mangagas kadagiti alkoholiko. Ita, no makain-inumak iti arak, agkararagak ken agmennamenna maipapan iti baro a lubong ti Dios. Basaek met ti adu nga artikulo ti Pagwanawanan ken Agriingkayo! maipapan iti alkoholismo wenno dagiti makapabileg a kapadasan ti biag. Pagyamanan iti pannakaawatyo kadagiti parikut a sagsagabaen ti ili ni Jehova ken ti panangipaayyo kadakami kadagiti nasayaat nga artikulo.
C. D., Estados Unidos
Agimtuod Dagiti Agtutubo . . . Naimpusuan unay ti panagyamanko iti artikulo a “Mapanak Aya Umatender iti Prom?” (Marso 8, 1993) Kasta unay ti pannakapilitko a tabunuan ti promko kas adda iti maikapat a tawen ti high school. Ngem idi nabasak daytoy nagpateg nga artikulo, narisut amin a panagduaduak. Diak mapan, ket patiek a diakto unay maikapis.
J. L., Estados Unidos
Pagyamanan iti artikulo nga “Aniat’ Maaramidak iti Nakaad-adu a Homework?” (Abril 8, 1993) Inyaplikarko a dagus dagiti singasingna, ket talaga a nagunggonaanak kadakuada. Ita ad-adun ti panawenko kadagiti naespirituan a banag. Pagyamanan unay!
M. M., Italia
Pagyamanan unay iti panangipablaakyo ti artikulo a “Kasano a Mapagballigiak ti Napaay nga Ayan-ayat?” (Mayo 8, 1993) Narigat unay ti kasasaad a pakilangenak. Masansan a kasla awan gundawaykon a makiasawa. Isu a bayat a basbasaek ti magasin, diak magawidan dagiti luak. Nupay kasta, ti panangbasak iti dayta ti nangiparikna kaniak a maawatandak ken maipatpateg. Naan-anay nga impabigbigna kaniak nga ay-ayatennatayo ni Jehova ken maawatanna ti sagsagabaentayo.
R. Z., Italia