Manipud Managbasatayo
Kinabaldado Nalawag unay ti panangtaming ti artikulo nga “Agimtuod Dagiti Agtutubo . . . Apay a Masapul a Sagabaek ti Kinabaldado?” (Mayo 22, 1993) iti daytoy a parikut. Baldado ti dua a gurongko ken nalakaak a masair no dagiti tao kitaendak buyogen ti panangay-ay. Ti kangrunaan a mangsair kadagiti riknak isut’ tiempo nga adda mangted kaniak iti limos—a kaslattay maysaak nga agpalpalama! Ti mangliwliwa kaniak isut’ pannakaammo a ni Jehova saanna a kitaen ti kasasaad ti bagi, no di ket “kitaenna ti puso.”—1 Samuel 16:7.
A. A. A. S., Brazil
Diak umanamong iti nadakamatyo a ti cerebral palsy ket maysa a sakit. Ti cerebral palsy ket maysa a kasasaad a gapu iti pannakadangran ti utek, masansan a mapasamak sakbay, kabayatan, wenno kalpasan unay ti pannakaipasngay. Saan pulos a kumaro wenno makaakar. Saan a sakit dayta ket saan a rumbeng a madakamat a kasta.
L. Z., Estados Unidos
Ladingitenmi no nakasair dagiti sasao nga inusarmi. Inusarmi ti sao a “sakit” iti en heneral unay a kaipapanan a naipaulog iti “Webster’s New Collegiate Dictionary,” nga isu “ti maysa a kasasaad . . . a mangdadael iti panagtrabaho ti maysa a napateg banag.”—ED.
Pannakakugit ti Babai Pagyamanan iti panangibutaktakyo a demoniko ken naranggas ti tradision a panangikkat iti tilde! (“Minilion Dagiti Agsagsagaba—Matulongan Aya Ida?” Abril 8, 1993) Uray maysa laeng nga ubing ti maispal iti kinaut-ot daytoy naulimek, nakaap-aprang a krimen, ngarud ti pannakaipablaak ti artikulo ti makatulongto unay.
J. C., Estados Unidos
Agar-arubos dagiti luak a mangpampanunot iti panangipalubos dagiti nagannak nga agsagaba unay dagiti awan gawgawayda nga annakda. Dagiti damag a kas iti daytoy ket saan a naipablaak kadagiti pagiwarnakmi, isu nga agyamanak iti naintiempuan a panangipakaammoyo kadakami.
C. C. G. M., Brazil
Homework Pagyamanan unay iti artikulo nga “Agimtuod Dagiti Agtutubo . . . Aniat’ Maaramidak iti Nakaad-adu a Homework?” (Abril 8, 1993) Naminsan, binasak ti artikulo idi masikoranak a talaga iti nagadu a homework. Awan man lat’ tiempok nga agaliwaksay wenno agsagana kadagiti Nakristianuan a gimong. Iyap-aplikarkon dagiti singasingyo.
M. H., Estados Unidos
Iyaakar Maragsakanak a mangiyebkas iti panagyamanko iti artikulo nga “Agimtuod Dagiti Agtutubo . . . Umakarak Aya iti Nabakbaknang a Pagilian?” (Abril 22, 1993) Agtawenak iti 16 ket pangpanggepek ti umakar iti sabali a pagilian a mabalin nga umasensuanto ti biagko. Ngem kalpasan ti panagbasak iti artikulo, patiek a saan a napateg no sadino ti pagnanaedantayo. No iyun-unatayo ti Pagarian ni Jehova iti biagtayo, sigurado a rumang-aytayto [iti naespirituan] yantangay tulongannatayto ni Jehova.
V. L. A., Brazil
Panangrames Agpada a nasakit ken nasayaat ti riknak idi naawatko ti Marso 8, 1993 a ruar maipapan iti “Panangrames—Pagam-amkan ti Babai.” Ammoyo ngamin, ni nanangko a maysa nga amin-tiempo nga ebanghelisador iti adu a tawen, ket biktima ti nakaro a panangraut ken ngangngani a pannakarames iti bukodna a balay. Ti panangbasa kadagiti artikulo ti nakatulong iti tiempo ti panangiliwliwag.
P. G., Estados Unidos
Siak ti assistant director ti “Family Violence and Sexual Assault Services” iti lugarmi. Maysa kadagiti agtutubo a ministroyo ti nangparegta kadakami a mangbasa ti Agriingkayo! idi inlawlawagna ti isyu maipapan ti pannakaabuso ti ubing. (Oktubre 8, 1991) Agsuskribekamin. Kayatko nga ipakaammo a dayawek unay dagiti isyu maipapan iti kinaranggas iti pagtaengan ken panangrames. Naisuratda a naimbag ken naisagana a siaannad.
D. G., Estados Unidos