Manipud Managbasatayo

Operasion iti Mata Naragsakanak a nangbasa iti artikuloyo a “Ti Radial Keratotomy​—Ania Dayta?” (Setiembre 22, 1994) Kas maysa a refractive surgeon, a siak ti nang-radial keratotomy iti mismo a matak ken nangoperan iti nasurok a 2,000, dayawek unay ti kualidad ken kinaumiso ti artikuloyo. Daksanggasat, a masansan a di umiso ken makaallilaw ti impormasion a naipaay iti publiko babaen iti warnakan a saan a nainaig iti medisina. Patiek a nagsayaat ti gapuanan ti artikuloyo a mangilawlawag kadagiti pagimbagan ken pagdaksan ti radial keratotomy.

R. F. B., Estados Unidos

Ipapatay Kayatko a yebkas kadakayo ti kasta unay a panangapresiarko kadagiti artikulo ti “Agimtuod Dagiti Agtutubo . . .” nga “Apay a ni Pay Tatang ti Natay?” (Agosto 22, 1994) ken “Kasano a Mailiwliwagko ti Ipapatay ni Tatang?” (Setiembre 8, 1994) Uray no sibibiag pay laeng dagiti dadakkelko, nabiit pay a nalapunosak iti ipapatay ti dua nga ing-ingungotek. Liniwliwadak unay dagitoy nga artikulo ken impakitada kaniak no kasano a maandurak ti kasta a kalamidad.

T. H., Francia

Natay ni tatangko idiay Kingdom Hall kalpasan a nagpalawag. Sipud idin, makidangdangadangakon iti ladingit ken pungtot. Ti panagkunak ket saan a nainkalintegan a kellaat a matay ti asinoman nga inay-ayat unay ken napasnek ken Jehova. Iti panangbasak kadagidiay nga artikulo, nariknak nga ipakpakita ni Jehova ti pannakaseknan ken ituktukonna ti tulong tapno maimbagan ti nasugatan a pusok.

S. A., Nigeria

Natay ni tatangko gapu iti kanser, ket narigatanak unay a nangandur iti dayta. Nakaskasdaaw a maammuan no kasano a daytoy nga artikulo ket maibagay iti rikriknak. Ti pagsakitan ti nakemko isut’ din pannakakita ni tatangko iti mapaspasamak itan iti biagko. Karugrugik iti nabayagen nga arapaapko: ti maysa a karera kas amin-tiempo a managebanghelio. Kayatko a makitanak koma a kasta. Narigat no dadduma ti kaawan ti nagsayaat a panangiwanwan ken siribna, ngem makaliwliwa ti pannakaammok nga adda sabsabali a mangipakpakita iti pannakaseknan.

C. T., Estados Unidos

Panangmatmat iti Lubong Kayatkay a kablaawan iti kinaannadyo a mangisagana iti Agriingkayo! Apresiarek a nangnangruna ti benneg a “Panangmatmat iti Lubong.” Nupay ababa ti panangilawlawagna iti nadumaduma a tema, timmulong kaniak dagiti makagunggona a balakad, makatukay-interes a tema, ken kapaliiwanna a mangbalbaliw iti adu nga ugalik. Makaparagsak a basaen ti “Panangmatmat iti Lubong.”

T. C. C., Brazil

Heimlich Maneuver Ag-11 a tawenen ti kinainstruktorko iti first-aid ket kayatko a komentuan ti paset iti “Panangmatmat iti Lubong” a “No Maipduokan Gapu iti Taraon.” (Agosto 22, 1994) Nadakamatyo ti maaw-awagan a Heimlich maneuver. Pagaammo ti kaaduan, nupay kasta, a ti panangitalmeg iti rusok ti mangpasardeng iti panaganges ti maysa. Isu a ti Heimlich maneuver ti lallalo a mangpakaro iti kasasaad nga agkasapulan iti first-aid.

G. B., Austria

Matmatan ti dadduma nga autoridad iti medisina ti Europa a napeggad ti Heimlich maneuver ken isingasingda dayta kas kaudian laeng a pamusposan. Nupay kasta, patien ti kaaduan a doktor idiay Estados Unidos a no umiso ti pannakaaramidna, nasaysayaat nga amang ti Heimlich maneuver ngem iti dadduma a pamusposan a mangarayat kadagiti naipduokan. Bassit ti risgo nga agsagaba iti pannakadangran ti lalaem no idilig iti risgo a pannakaipduok a pakatayan. Kas pagarigan, kinuna ti maysa a panagadal ti E.U. nga uppat laeng a pannakasugat ti bagis ti naipadamag a mainaig iti pamusposan. Agtalinaed a mapadpadaanan pay laeng no makapagtunoston dagiti doktor ti Europa ken E.U. maipapan itoy a banag iti aniaman a tiempo ti masakbayan.​—ED.