“Panangsapul iti Katan-okan nga Artist”

Dayta ti paulo ti Agriingkayo! a Nobiembre 8, 1995. Nakaipaay ti temana iti makaay-ayo a reaksion manipud kadagiti managbasa iti intero a lubong.

Nagsurat ni Amang manipud Douala, Cameroon: “Talaga nga adda epekto kaniak dagiti artikulo agsipud ta pagay-ayatko ti arte, nangnangruna dagiti fine paintings. Ita maawatakon nga adda Artist a natantan-ok ngem kada Van Gogh, Rembrandt, Da Vinci, ken dadduma pay​—awan sabali no di ni Jehova a Dios a mismo.”

Kinuna ni Frederick, manipud St. Barthélemy, idiay French West Indies: “Namimpat a binasak, ket agyamanak unay kada panangbasak kadagiti nagpipintas a banag nga inted ti Namarsua kadatayo.”

Insurat ni Asunta manipud Italia: “Inabbukayna ti tarigagayko nga agpinta. Pinaunegna ti reggetko iti baro a lubong ti Dios.” Ket kinuna ni Irena, manipud ti Czech Republic: “No sarungkaranmi dagiti museo, masapul nga agbayadkami tapno kitaen dagiti gapuanan ti arte, idinto ta libre a mangisagut kadatayo ti Namarsua iti amin a natural a kinapintas, iti kada aldaw.” Insurat ni Aline manipud Brazil: “Nupay masansan nga addaantayo kadagiti artikulo a tumulong kadatayo a mangapresiar iti personalidad ni Jehova, dagitoy ti nangtukay iti pusok. Nangtedda iti adu a detalye maipapan iti panamarsua a mangparayray iti panangapresiartayo iti ayat ni Jehova.”

Manipud iti nalamiis a lugar ti Wisconsin, E.U.A., insurat ni Anne: “Talaga a tinulongannak a mangapresiar iti kinapintas ti panamarsua. Dadduma no kalam-ekna, nagrigat ti mangsapul. Iti isu met la nga aldaw a panangbasak iti artikulo, rimmuarak ken nakitak ti linnaaw a yelo iti maysa a sanga, naabbungotan iti niebe a bulong, tugot dagiti ayup iti niebe. Pagyamanan manen iti palagip no kasano a mabalinmi nga apresiaren ‘ti Katan-okan nga Artist.’

No kayatyo ti umawat a regular iti daytoy a magasin, pangngaasiyo ta makiumankayo kadagiti Saksi ni Jehova iti sangakaarrubaanyo wenno agsuratkayo iti kaasitgan a direksion a nailista iti panid 5.