Manipud Managbasatayo
Ungpoten a Basaen Kanayon a magustuak ti Agriingkayo!, ngem nakairuamak idi a basaen laeng dagiti artikulo a makaallukoy iti atensionko. Ita ung-ungpotekon a basaen ti magasin ket magustuakon dagiti tema a dati a liblibtawak. Kas pagarigan, kabasbasak ti “Kadaanan a Tradision Dagiti American Indian” (Marso 8, 1996), ket talaga a nagustuak dayta!
E. A. S., Brazil
Panangsair iti Sabsabali Dimteng iti umiso a tiempo ti artikulo a “Ti Panangmatmat ti Biblia: Ti Aramidem No Masairmo ti Sabsabali.” (Pebrero 8, 1996) Maysa a Kristiano a kabsat a babai ti kellaat a din makisarsarita kaniak. Dinamagko no adda aniaman a naaramidko a makapasair kenkuana, ken nagpadispensarak. Ngem daytoy ti saan a nangbalbaliw iti kababalinna. Nasairak unay iti daytoy ket nangrugi payen a panunotek a saan sa met a makaay-ayo ken Jehova ti panagserbik. Anian a pannakaliwliwak idi nabasak ti maudi a parapo ti artikulo! Kinunana nga “apaman a pinagreggetamon ti makikappia, maay-ayonto ni Jehova a mangawat iti panagdaydayawmo.”
M. R., Argentina
Cobra Makapainteres unay ti artikulo a “Kayatyo Kadi ti Makakita iti Cobra?” (Marso 22, 1996). Ngem ti kapsion ti retrato iti panid 16 kunana: “Maysa a nangisit a cobra pagbirakakenna ti ulona bayat nga agbilbilag iti nabara a bato.” Ti ammok ket pagbirakaken laeng ti cobra ti ulona no madlawna nga adda peggad ken no masuron ti cobra.
R. F., Alemania
Nailawlawag daytoy iti artikulo iti panid 18, parapo 1, ken iti panid 20, parapo 2. Kuna ti koresponsalmi idiay India nga iti retrato nagbirakak ti cobra gapu iti panangrurod ti katulongan ti retratista.—ED.
Baldado a Tsuper Dimteng iti umiso a tiempo ti artikulo a “Baldado—Ngem Makabael nga Agmaneho.” (Mayo 8, 1996) Kas baldado a tao, limitado unay ti Nakristianuan a ministeriok. Gapu ken Jehova, addan kotsek a maibagay iti kasasaadko, ket daytoy nga artikulo ti nangparegta kaniak a mangpalawa iti ministeriok.
A. A. V., Brazil
Panagsala Magusgustuak ti agsala iti klasikal, Latin, ken ti nabannayat a pop music kas pagesmak. Talaga nga apresiarek ti artikulo a “Ti Panangmatmat ti Biblia: Maiparbeng Aya nga Agsala Dagiti Kristiano?” (Mayo 8, 1996) Tinulongannak a mangusig a naimbag iti daytoy a kita ti pagpalpaliwaan. Dagiti pinataudyo a mamagpanunot a salsaludsod ti tumulongto kaniak nga agbalin a di natulawan ken “awanan mulit manipud iti lubong.”—Santiago 1:27.
D. D. G., Trinidad
Agtawenak iti 15, ket naamirisko a nagrigat nga ikeddeng no ania ti maiparbeng ken di maiparbeng no panagsala ti pagsasaritaan. Babaen ti panangusarko iti panangiwanwan nga impaay ti artikulo—agraman dagiti teksto a naisitar manipud Biblia—maikeddengko itan no aniat’ umiso.
M. R., Estados Unidos
Dagiti Probision Kadagiti Adda Depekto ti Panagdengngegda Maysaak a tuleng ken bulsek, ket kayatko ti agyaman iti artikulo a “Panangipaawat Babaen ti Senias.” (Abril 8, 1996) Insalaysayna ti “Nararagsak a Managdaydayaw” a Kombension Distrito dagiti Saksi ni Jehova a naiparang iti American Sign Language. Makaparegta unay kaniak a maammuan nga adu a bulsek ken tuleng ti adda sadiay. Agyamanak unay kadagidiay nangipatarus iti programa ti kombension para kaniak idi naangay ti kombensionmi ditoy idi Disiembre 1995. Pulos a diak nagadal iti Braille, isu a tapno makasabaak ti sabsabali, nangikabesaak iti 121 a teksto iti Biblia. Il-iliwek a makita ti kaitungpalan ti kari ti Dios idiay Isaias 35:5, 6, a kunaenna a makangngegton dagiti tuleng ken makapagsaonton dagiti umel. Kayatko a makapagkantaakton iti panangidayaw ken Jehova iti sumungsungad a Paraiso!
A. F. A., Argentina