Sobra a Kinasalun-at
“TI NAISALSALUMINA a produkto ti movimiento ti panagpapigsa,” kuna ti The Toronto Star, ket “dagiti sobra ti panagehersisioda.” Ipadamag ti Star a ti sobra a panagehersisio pagsagabaenna agpadpada dagiti lallaki ken babbai. Mabalin a dagiti lallaki sobra ti panagehersisioda tapno mariknada manen ti kinaagkabannuagda, kuna ti dadduma a doktor ken therapist, ngem ti pudno a makagapu no apay a sobra ti panagehersisio dagiti babbai ket ti di umiso a panangmatmatda iti bagida ken saksakit iti pannangan.
Adu ti mangrugi nga agehersisio tapno nasayaat ti rikna ken itsurada ngem inton agangay sobranton ti panagehersisioda gapu laeng ta kasapulan nga agehersisioda. Kuna ni Richard Suinn, maysa a sikologo iti isports ken mamalbalakad iti sumagmamano a timpuyog iti Olimpiada a ti nalabes a panagehersisio ket nabatad no daytat’ “naibasar iti emosional a pannakaikumit imbes nga iti gagangay a panagpapigsa.” No tamtamingenda daytoy a parikut, ikagkagumaan dagiti doktor ken therapist nga ammuen ti kita ti epekto ti panagehersisio iti biag dagiti pasiente. No paggiddanenda a tamingen ti karera nga agkalikagum iti adu nga atension ken aywanan ti pagtaengan ken taripatuen dagiti ubbing, addanto negatibo nga epekto ti sobra a panagehersisio iti salun-atda. Sigun ken ni Dr. Thomas Schwenk, propesor ti family practice medicine, “mabalin a nasalun-at ti bagida, ngem saan a naannayas ti biagda iti kagimongan, panggedan, ken pamilia.”
Ilista ti Star ti sumagmamano a mamakdaar a pagilasinan a mainaig kadagiti adikto iti panagehersisio: ‘Kaykayatda ti agmaymaysa nga agehersisio, kas iti agbisikleta, aglangoy, agtaray, wenno agbagkat iti nadagsen; kurang a pannakibagay kadagiti eskediul iti panagehersisio; panamati a ti panagehersisio ket kapilitan ken di rumbeng a liwayan; ken ti pannakadadael ti dadduma nga aspeto ti personal a kabibiag.’
Nupay no dagiti tattao nga agtartrabaho iti tay-ak ti panagpapigsa bigbigenda dagiti pagimbagan ti kalalainganna a panagehersisio, mamakdaarda met kadagiti makadadael nga epekto ti nalabes a panagehersisio.—1 Timoteo 4:8.