Apay a Napateg Para Kadagiti Kristiano a Patanorenda ti Mabayag a Panagitured?
TI MABAYAG a panagitured agtaud ken Jehova a Dios. Dayta ket bunga ti espirituna. (Galacia 5:22) Ti tao, a naaramid a kaladladawan ken kaasping ti Dios, addaan iti kastoy a kalidad ken mapatanorna dayta babaen ti panangsurotna iti Sao ti Dios ken ti panangiturong ti nasantuan nga espirituna. (Genesis 1:26, 27) Mabilin ngarud dagiti Kristiano a mangpatanor ken mangipakita iti daytoy a kalidad. (Colosas 3:12) Dayta ket maysa a pakailasinan ti ministro ti Dios. (2 Corinto 6:4-6) Kuna ni apostol Pablo: “Maaddaankayo iti mabayag a panagitured iti isuamin.” (1 Tesalonica 5:14) Ipamatmatna a nasken ti panangiparangarang iti daytoy a kalidad tapno agbalin a makaay-ayo iti Dios. Ngem saan a pudno ti mabayag a panagitured ti maysa no mapakuyogan dayta iti panagdayamudom ken panagreklamo. Ipakita ni Pablo a ti makomendaran a banag ket “maaddaankayo iti mabayag a panagitured buyogen ti rag-o.”—Colosas 1:9-12.
Malaksid iti rag-o a magun-odan babaen iti panangyugali iti mabayag a panagitured, dakkel dagiti gunggona. Magunggonaan ni Jehova babaen ti pannakaidayaw ti naganna. Mapaneknekan a biddut ti karit a maibusor iti kinalinteg ken kinaumiso ti kinasoberano ti Dios, ket isut’ maalangon. (Genesis 3:1-5; Job 1:7-11; 2:3-5) No ngay pinatayna koma da Adan, Eva, ken ni Satanas idi tiempo ti iyaalsada? Mabalin a kinuna koma dagiti dadduma nga agpayso ti karit ni Satanas. Ngem babaen ti mabayag a panagitured, nangted ni Jehova kadagiti tattao iti gundaway a mangpaneknek nga iti sidong ti pannakasuot, kaykayatda ti panangiturayna kadakuada ken tarigagayanda ti agserbi kenkuana gapu kadagiti naimbag a kalidadna, wen, ipakita a kaykayatda ti panangituray ni Jehova nga agturong iti naan-anay a wayawaya, ta ammoda a nasaysayaat dayta.—Salmo 84:10.
Ni Jesu-Kristo, gapu iti mabayag a panagitured kas panagtulnog iti Dios, inawatna ti katan-okan a gunggona a pannakaitan-ok iti nangato a saad a kinaari ken inikkan ni Amana iti “nagan a nangatngato ngem iti tunggal [sabali pay a] nagan.” (Filipos 2:5-11) Malaksid iti daytoy, immawat iti “nobia” a buklen dagiti naespirituan a kakabsatna, ti Baro a Jerusalem, a nailadawan kas maysa a siudad, a kadagiti bato a pamuonna adda kadakuada dagiti nagan ti 12 nga apostol ti Kordero.—2 Corinto 11:2; Apocalipsis 21:2, 9, 10, 14.
Kasta met, nabaknang ti gunggona dagiti amin a tattao a mangpatpatanor iti mabayag a panagitured ken mangtaginayon iti dayta maitunos iti panggep ti Dios. (Hebreo 6:11-15) Mapnekda a mangtulad iti kalidad ti Dios, iti panangaramid iti pagayatan ti Dios, ken iti pananganamong ti Dios. Mainayon pay, ti mabayag a panagituredda ti tumulongto kadagiti sabsabali a mangammo iti Dios ken manggun-od iti biag nga agnanayon.—1 Timoteo 4:16.