Kinaperpekto​—Kanayon Kadi a Naan-anay?

TAPNO umiso ti pannakaawatna iti Biblia, masapul a saan nga agkamali ti maysa iti kadawyan a panangipagarup nga amin a maawagan a “perpekto” ket perpekto iti naan-anay a kaipapanan, kayatna a sawen, iti awan inggana a kasasaad, awan limitasionna. Ti kinaperpekto iti daytoy naan-anay a kaipapanan ket agaplikar laeng iti Namarsua, ni Jehova a Dios. Gapu iti daytoy a naikuna ni Jesus ken Amana: “Awan asinoman a naimbag, malaksid ti maysa, ti Dios.” (Marcos 10:18) Awan kaasping ni Jehova iti kinatan-okna, pannakaikarina iti amin a pammadayaw, katan-okan kadagiti naisangsangayan a kalidad ken pannakabalin, isu a “ti naganna laeng ti maitan-ok.” (Salmo 148:1-13; Job 36:3, 4, 26; 37:16, 23, 24; Salmo 145:2-10, 21) Intan-ok ni Moises ti kinaperpekto ti Dios, a kunkunana: “Ta ti nagan ni Jehova yawagkonto: ipakumityo ti kinadakkel iti Diostayo. Ti Bato, naan-anay ti aramidna; ta amin a dalanna kinalinteg: maysa a Dios ti kinamatalek ket awanan damka, isu awan pagkuranganna ken nalinteg.” (Deuteronomio 32:3, 4) Perpekto, nagugoran, awanan pakapilawan wenno depekto ti amin a dalan, sasao, ken linteg ti Dios. (Salmo 18:30; 19:7; Santiago 1:17, 25) Pulos nga awan aniaman a nainkalintegan a rason tapno Isu wenno ti aramidna ket masupiat, mababalaw, wenno masapulan iti biddut; imbes ketdi, kanayon a maikari a dayawen.​—Job 36:22-24.

Relatibo ti Dadduma a Kinaperpekto

Ti kinaperpekto ti dadduma pay a persona wenno banag, ngarud, ket relatibo, saan a naan-anay. (Idiligyo iti Salmo 119:96.) Kayatna a sawen a “perpekto” ti maysa a banag sigun iti, wenno gapu iti, panggep wenno kalat nga intuding ti nangdibuho wenno nangpataud iti dayta, wenno ti pangusaran ti immawat wenno mangusar iti dayta. Ti mismo a kaipapanan ti kinaperpekto kalikagumanna nga adda maysa a mangikeddeng no nagtengen ti “pannakairingpas,” no ania dagiti pagalagadan iti kinaekselente, ania dagiti maikalikagum a rumbeng a maragpat, ken no ania dagiti napateg a detalye. Kamaudiananna, ti Dios a Namarsua ti maudi a Para Ikeddeng iti kinaperpekto, ti Para Aramid iti Pagalagadan, a maitunos kadagiti mismo a nalinteg a panggep ken interesna.​—Roma 12:2.

Kas pagarigan, ti planeta a Daga ti maysa kadagiti pinarsua ti Dios, ket idi nagpatingga ti innem nga ‘aldaw’ a panamarsuana iti dayta, imbaga ti Dios a dagiti resulta “nasayaatda unay.” (Genesis 1:31) Naragpatna ti kangatuan a pagalagadanna iti kinaekselente, gapuna dayta ket perpekto. Ngem kalpasanna, tinudinganna ti tao nga ‘agbalin nga Apo kenkuana [iti daga],’ nalawag a kayatna a sawen a talonenna ti daga ken pagbalinenna ti intero a planeta, ken saan laeng a ti Eden, a minuyongan ti Dios.​—Genesis 1:28; 2:8.

Kasano a Maawagan a “Naan-anay” Dagiti Imperpekto nga Adipen ti Dios?

Ni nalinteg a Noe pinaneknekanna ti bagina a “naan-anay kadagiti kaputotanna.” (Genesis 6:9) Ni Job ket “napalungdo ken nalinteg.” (Job 1:8) Nausar dagiti umasping a sasao kadagiti dadduma pay nga adipen ti Dios. Yantangay amin ket kaputotan ni managbasol nga Adan ket ngarud managbasolda, nalawag a dagita a lallaki ket “naan-anay” ken “napalungdo” a kayatna a sawen a naragpatda a naan-anay dagiti kalikaguman ti Dios kadakuada, kalikagum a naibagay iti kinaimperpekto ken pagkurkuranganda. (Idiligyo iti Mikias 6:8.) No kasano nga uray ti agdamdamili dina namnamaen ti agpapada a kalidad no agsukog iti plorera manipud iti gagangay a damili a kas ti panangsukogna iti maysa manipud iti espesial a damili, kasta met a dagiti kalikaguman ni Jehova ket maibagay iti kinakapuy dagiti imperpekto a tattao. (Salmo 103:10-14; Isaias 64:8) Nupay agkamali ken agbiddutda gapu iti nainlasagan a kinaimperpektoda, kaskasdi a nangiparangarang dagita a matalek a lallaki iti “maysa a puso a napalungdo [Heb., sha·lemʹ]” ken ni Jehova. (1 Ar-ari 11:4; 15:14; 2 Ar-ari 20:3; 2 Cronicas 16:9) Gapuna, iti uneg dagiti limitasion a posible a maragpatda, ti debosionda ket kompleto, awan depektona, a maragpatda dagiti nadiosan a pagannurotan iti kasasaadda. Yantangay maay-ayo ti Dios nga Ukom iti panagdaydayawda, awan natauan wenno naespirituan a parsua nga addaan kalintegan a mangsapul iti biddut ti panagserbida Kenkuana.​—Idiligyo iti Lucas 1:6; Hebreo 11:4-16; Roma 14:4.

Bigbigen ti Kristiano a Griego a Kasuratan ti nainkasigudan a kinaimperpekto ti sangatauan a nagtaud ken ni Adan. Ipakita ti Santiago 3:2 a ti tao ket agbalin a “perpekto a tao, a kabaelanna met a ngedngedan ti intero a bagi[na],” no mamedmedanna ti dilana ken saan a maitibkol iti sao; ngem iti daytoy “maitibkoltayo amin iti adu a daras.” (Idiligyo iti Santiago 3:8.) Nupay kasta, ti sumagmamano a relatibo a kinaperpekto ket nadakamat a maragpat dagiti managbasol a tattao. Kinuna ni Jesus kadagiti pasurotna: “Masapul nga agbalinkayo a perpekto, a kas iti nailangitan nga Amayo a perpekto.” (Mateo 5:48) Ti ayat ken kinamanagparabur ti tinukoyna ditoy. Impakitana a saan a naan-anay, adda depektona nga ayat no “ayatenyo [laeng] dagidiay mangay-ayat kadakayo”; gapuna a dagiti pasurotna rumbeng nga an-anayenda ti ayatda wenno pagbalinenda dayta a naan-anay babaen iti panagayatda met kadagiti kabusorda, iti kasta matuladda ti ulidan ti Dios. (Mateo 5:43-47) Umasping iti dayta, naipaamiris iti agtutubo a lalaki a nagimtuod ken ni Jesus maipapan iti wagas a pananggun-od iti biag nga agnanayon, a ti panagdaydayawna, a nakairamananen ti panagtulnogna kadagiti bilin ti Linteg, ket agkurang pay laeng kadagiti nasken a banag. No ‘kayatna ti agbalin a naan-anay,’ masapul a naan-anay a parang-ayenna ti panagdayawna (idiligyo iti Lucas 8:14; Isaias 18:5) babaen ti panangtungpalna kadagitoy nga aspeto.​—Mateo 19:21; idiligyo ti Roma 12:2.

Ipakita ni apostol Juan a ti ayat ti Dios ket maan-anay kadagiti Kristiano nga agtalinaed a naikaykaysa Kenkuana, a tungpalenda ti sao ti Anakna ken agayan-ayatda. (1 Juan 2:5; 4:11-18) Ti kasta a perpekto nga ayat ilaksidna ti panagbuteng, mangted iti ‘wayawaya a makisao.’ Ditoy ipakita ti konteksto a sarsaritaen ni Juan ti ‘wayawaya a makisao iti Dios,’ kas iti panagkararag. (1 Juan 3:19-22; idiligyo iti Hebreo 4:16; 10:19-22.) Daydiay naan-anay a matungpalna ti kaipapanan ti panagayat ti Dios ket makaadani iti nailangitan nga Ama buyogen iti panagtalek, a dina marikna a kondenaren ti pusona a kas managinsisingpet wenno di naanamongan. Ammona a tungtungpalenna dagiti bilin ti Dios ken ar-aramidenna dagiti makaay-ayo iti Amana, ket ngarud, siwayawaya a makisarita ken umararaw ken ni Jehova. Dina marikna a kasla laplapdan ti Dios ti pribilehiona nga ibaga wenno kiddawen. (Idiligyo iti Numeros 12:10-15; Job 40:1-5; Un-unnoy 3:40-44; 1 Pedro 3:7.) Awan pagbutnganna; saan a sumaklang inton “aldaw ti panangukom” a madanagan nga adda ‘pakapilawan[na]’ wenno tarigagayanna ti mangilimed iti sumagmamano a banag. (Idiligyo iti Hebreo 10:27, 31.) No kasano a ti ubing ket di agalikaka nga agkiddaw iti aniaman kadagiti naayat a nagannak kenkuana, kasta ti Kristiano a naan-anay ti panangiparangarangna iti ayat ket sigurado nga “uray no ania ti dawatentayo maitunos iti pagayatanna, denggennatayo. Kanayonanna, no ammotayo a denggennatayo maipapan iti aniaman a dawdawatentayo, ammotayo a maaddaantayonto kadagiti bambanag a dinawattayo yantangay dinawattayo ida kenkuana.”​—1 Juan 5:14, 15.

Gapuna, daytoy a “perpekto nga ayat” saan a mamataud iti aniaman a kita ti buteng. Saanna a pukawen ti nadayaw ken naamaan a panagbuteng iti Dios, gapu iti nauneg a panagraem iti saad, pannakabalin, ken kinahustisiana. (Salmo 111:9, 10; Hebreo 11:7) Saanna met a pukawen ti normal a panagbuteng a panggapuan ti tao, no sadinoman a posible, a liklikan ti peggad wenno salakniban ti biagna, wenno saanna met nga ikkaten ti buteng a patauden ti kellaat a panagamak.​—Idiligyo iti 1 Samuel 21:10-15; 2 Corinto 11:32, 33; Job 37:1-5; Habacuc 3:16, 18.

Kasta met, maragpat ti naan-anay a panagkaykaysa babaen iti “naan-anay a singgalut” ti ayat, a mamagbalin kadagiti pudno a Kristiano a “maan-anayda koma iti panagmaymaysa.” (Colosas 3:14; Juan 17:23) Nabatad a ti kinaperpekto iti daytoy a panagkaykaysa ket relatibo met ken dina kaipapanan a mapukawen ti amin a nagdudumaan iti personalidad, kas kadagiti saguday, ugali, ken konsiensia ti indibidual. Nupay kasta, no maragpat, ti kinanaan-anayna mangiturong iti nagkaykaysa a panagtignay, pammati, ken pannursuro.​—Roma 15:5, 6; 1 Corinto 1:10; Efeso 4:3; Filipos 1:27.