Pannakaiwawa iti Nagadu nga Anunsio
“PAPA, ania koma ti iyanunsio ti bulan?” Daytoy karkarna a saludsod, nga inyimtuod ti balasitang, nagparang iti daniw nga insurat ni Carl Sandburg 50 a tawenen ti napalabas. Iti masakbayan, kasla saanen a karkarna dayta a saludsod. Sigun iti magasin a New Scientist, iganggannuat ti dua nga agan-anunsio nga ehekutibo idiay London ti mangusar iti iyanninaw ti silnag ti init nga anunsio iti rabaw ti bulan.
Agasenyo ta mausar ti bulan a pagyanunsiuan! Panunotenyo laengen a mayanunsio ti komersial a mensahe iti sangalubongan a tallaong, mensahe a di maiddep, maipatingga, maibasura, wenno mapaulimek dagiti agbuya babaen iti remote control. Mabalin a di makaparagsak ti ideya kadakayo, ngem kadagiti dadduma dayta ti arapaap a pimmayso.
Uray di pay nakadanon ti anunsio idiay bulan, linapunosnan ti daga. Kaaduan a magasin ken periodiko ti America iresreserbada ti 60 a porsiento a panidda nga agpaay iti anunsio. Ti edision ti The New York Times iti Domingo laeng nalabit aglaon iti 350 a panid ti anunsio. Uppat a pulo a minuto iti tunggal oras ti busbosen ti dadduma nga estasion ti radio kadagiti komersial.
Sa adda ti telebision. Sigun iti maysa a pattapatta, linawas a makabuya dagiti agtutubo nga Americano iti tallo nga oras a komersial iti telebision. Inton aggraduarda iti high school, nakabuyadanton iti 360,000 nga anunsio iti TV. Agyanunsio dagiti telebision kadagiti eropuerto, siled a pagurayan kadagiti ospital, ken kadagiti eskuelaan.
Dagiti dadakkel a panagay-ayam ket napategda itan a pasken a pagyanunsiuan. Maikabilen dagiti anunsio kadagiti pangkarera a lugan. Dadduma nga atleta awatenda ti kaaduan a kuartada kadagiti agan-anunsio. Nakabirok ti maysa a kangrunaan a basketbolista iti $3.9 milion babaen ti panag-basket ball. Nagbayad dagiti agan-anunsio iti maminsiam a $3.9 a milion kenkuana tapno itandudona dagiti produktoda.
Dika malisian. Maipaskil dagiti komersial nga anunsio kadagiti pader, bus, ken trak. Arkosanda ti uneg dagiti taksi ken subway—uray kadagiti ridaw dagiti kasilias ti publiko. Mangngegtayo dagiti anunsio kadagiti loudspeaker iti supermarket, tiendaan, elebeytor—ken no agtelteleponotayo. Iti dadduma a pagilian adu nga anunsio ti maipatulod iti koreo ta adu nga umawat ideretsoda iti kaasitgan a pagbasuraan ti awan mamaayna a surat iti mail box.
Sigun iti Insider’s Report, nga impablaak ti McCann-Erickson, maysa a sangalubongan nga ahensia nga agyan-anunsio, ti napattapatta a nabusbos ti sangalubongan iti anunsio idi 1990 ket $275.5 a bilion. Nanipud idi, ngimmaton agingga iti $411.6 bilion para iti 1997 ken maiganggannuat ti $434.4 billion para iti 1998. Nagdakkel a gatad.
Ania ti epekto amin daytoy? Kastoy ti kuna ti maysa nga analyst: “Ti panagyanunsio ket maysa kadagiti kabibilgan a puersa ti pannakilangen iti kultura. . . . Dagiti anunsio saanda laeng nga impluensiaan dagiti tattao a gumatang ti produkto. Maimpluensiaanda ti pakasaritaan, prinsipio, kalat, kapanunotan maipapan iti kinasiasinotayo ken no ania koma ti pagbalinantayo . . . Tubayenda dagiti ugalitayo ket dagiti ugalitayo tubayenda ti kababalintayo.”
Tangay dikay malisian ti anunsio, apay a dikay ammuen no kasano ti kinaepektibona ken no kasano a maimpluensiaannakayo?