Manipud Kadagiti Agbasbasa
Agtutubo a Biktima ti Kanser Agtawenak iti 18, ket kayatkay a pagyamanan iti kapadasan ni Matt Tapio, iti artikulo a “Saan a Simmuko.” (Oktubre 22, 1998) Talaga a naparegtaak iti pammatina, ti panangapresiarna kadagiti naespirituan a banag, ken ti panangmatmatna maipapan iti kinaganat. Sapay koma ta makapagyamanakto a mismo ken ni Matt kalpasan a mapagungar idiay Paraiso.
E. G. G., España
Agyamankami a sangapamiliaan iti artikulo. Tangay adda babbaromi a tin-edyer, naamirismi a makagunggona unay no ilawlawagmi kadakuada ti mapagwadan a pammati ni Matt Tapio. Daytoy ti nangted kadakami iti gundaway a mangusig kadagiti ipangpangruna ti tunggal maysa kadakami ken ti pamiliami.
M. F. N. G., Brazil
Ti artikulo ket dakkel a pammaregta kadakami nga agtutubo agsipud ta inyunay-unayna ti kinaregta ti maysa nga agtutubo a lalaki a nupay masakit, pulos a saan a nagsardeng a nagsao maipapan ken Jehova.
D. M., Italia
Nupay makapapatay ti sakit ni Matt Tapio, inkagumaanna ti agbiag tapno makapagdaydayaw ken makapagserbi ken Jehova. Nasayaat daytoy a pagwadan kadatayo a nasalun-at.
D. P., Puerto Rico
Nagustuak ti artikulo maipapan ken Matt, a naopera gapu iti tumor ti utek idi agtawen iti 14. Sumagmamano kadagiti naudi nga imbagana ket, “Dikay pulos sumardeng a mangasaba maipapan ken Jehova.” Daytoy ti nangparegta kaniak a di sumuko ken tinulongannak a mangamiris no kasano kapateg ti panagadal iti Biblia ken ti pananggun-od iti pannakaammo a mangiturong iti biag nga awan inggana!
D. V., Pilipinas
AIDS Kayatko ti naimpusuan nga agyaman kadakayo iti serye a “Ti Panangsaranget iti AIDS—Agballiginto Kadi?” (Nobiembre 8, 1998) Makaisuro unay dayta. Agtawenak iti 19 ken adun ti naisuro kaniak maipapan iti AIDS ken HIV idiay eskuelaan ken idiay balaymi, ngem mariroak pay laeng. Tinulongannak ti artikulo a mangapresiar iti kinapateg ti nainsiriban a panangpilik iti pakiasawaakto ken agbiagak a nadalus iti moral.
S. T., Estados Unidos
Makaisuro, umiso, ken pudno dagiti artikuloyo. Nasurok a sangapulon a tawen nga addaanak iti AIDS. Maysa a gayyem ti mangisursuro kaniak iti Biblia babaen ti tulong dagiti publikasionyo. Pagyamanan iti kinaturedyo a mangipablaak kadagita nga artikulo.
B. W., Estados Unidos
Diak maidisso ti Agriingkayo! agingga a nabasak dagiti artikulo maipapan iti AIDS. Ita laeng a nakabasaak iti kastat’ kinaumisona nga impormasion maipapan iti daytoy a tema. Ket napateg dayta tangay maysaak a nars. Pagyamanan unay.
D. E., Alemania
Nupay immikay idi ti barok iti Nakristianuan a dalan ngem agyamanak ta nagsubli nupay addaanen iti grabe nga AIDS. Babaen ti tulong ni Jehova, nasayaat itan ti takderna iti naespirituan. Medio simmayaat met ti kasasaad ti salun-atna gapu iti panangagas. Ammomi a nagadun dagiti naakaran ngem dida pay ammo dayta. Daytoy koma ti pagpanunotan ti siasinoman nga agpangpanggep a mangasawa wenno makiasawa.
N. J., Estados Unidos
Dagiti Rangtay Naawatmi ti ruar ti Nobiembre 8, 1998, nga addaan iti artikulo a “Rangtay—Kasanotayon no Awanda?” kalpasan a dinadael ni Bagyo a Mitch ti aginggat’ 80 a porsiento kadagiti rangtay ditoy Honduras. Kanayonkami nga agbibiahe ditoy nga agassawa, isu a naawatanmi a dagus ti kinapateg dagiti rangtay iti trabahomi. Kayatmi ti agyaman kadakayo iti makapainteres ken naintiempuan nga artikulo. Kas ti kunaen ti maikadua iti maudi a parapo, saanminton nga iyaleng-aleng dagiti rangtay!
C. H., Honduras