Napabileg Babaen ti Pammatina
Maysa a 17 anyos a balasitang ti nagsurat iti opisina ti Watch Tower Society idiay Moldova, maysa a dati a republika ti Union Soviet, tapno iyebkasna ti apresasionna iti artikulo a nagparang iti Hunio 8, 1998 nga Agriingkayo! Ti artikulo ket napauluan “Ti Pinilik iti Dua nga Amma,” ken daytat’ nangisalaysay kadagiti personal a kapadasan ti maysa nga Armeniano nga agtutubo.
“Bayat a basbasaek ti artikulo,” inlawlawag ti balasitang, “nakaluaak agsipud ta ti pakasaritaan ket kaasping iti pakasaritaak.” Kastoy ti intuloyna a kinuna: “Idi 15 ti tawenko, rinugiak ti nakipagadal iti Biblia, ket saan a kimmontra dagiti nagannak kaniak idi damo. Ngem idi rinugiakon ti tumabuno kadagiti gimong dagiti Saksi ni Jehova, napalalot’ ibubusorda. Kalpasanna, idi 1997, idi rinugiakon nga iranud ti naadalko kadagiti sabsabali, kastoy ti kinunada kaniak: ‘Mapankan kadagiti Saksi a gagayyemmo ket bay-am nga isudan ti mangpakan, mangkawes, ken mangted kenka iti panggedan. Nakasuksukirka nga inanak!’ Dinusadak pay dagiti nagannak kaniak iti pisikal, nga intugtogda ti ulok iti diding.
“Nagrigat a suot dayta kaniak. Masansan a mariknak idi ti rikrikna nga inyebkas ti Armeniano nga agtutubo, a kinunana a no dadduma ket pampanunotenna idi no maay-ayo met la ngata ni Jehova kenkuana. Kinunak iti un-unegko, ‘Awanen aya ti serserbik? Mapakawannak aya ni Jehova kadagiti nagbasolak? Ay-ayatennak pay la kadi ni Jehova?’
“Nakarigrigat, nangnangruna idi pinanunotko a dinakon ay-ayaten ni Jehova. Masansan nga agluluaak a nagpakpakaasi ken Jehova kadagiti kararagko a tulongannak, pabilgennak tapno isut’ diak panawan. Ket kinaagpaysuanna, nakitak nga immimdeng ni Jehova kadagiti kararagko ken impangagna dagiti ararawko. Pinatibker, pinabileg, ken pinaturednak. Nangnangruna nga inaramidna daytoy babaen ti Saona, a sadiay sikokompiansa a kinuna ti salmista: ‘No da ama ken ina baybay-andak, ni ngad Jehova pidutennakto.’—Salmo 27:10.
“Setiembre 27, 1997 idi insimbolok ti dedikasionko ken Jehova babaen ti panagpabautisarko iti maysa nga asamblea sirkito dagiti Saksi ni Jehova idiay Kagul. Silalawag a makitkitak a tungtungpalen ti naayat a nailangitan nga Amatayo a ni Jehova ti karina a nailanad iti Salmo 84:11: ‘Ni Jehova a Dios isu ti init ken kalasag: ni Jehova mangtedto iti parabur ken gloria; awanto ti imbag a maikedked kadagiti magna a sililinteg.’
“Agyamanak unay iti dayta nga Armeniano nga agtutubo a nangiranud iti makapabileg pammati a pakasaritaanna iti magasin nga Agriingkayo! Sapay koma ta dagiti nagannak kaniak ken dagiti nagannak kenkuana ket agbalinto metten nga interesado kadagiti pannursuro ti Biblia.”