Agyamanak iti Di Agpatingga a Pannaranay ni Jehova

KAS INSALAYSAY NI SHARON GASKINS

PARAISO ditoy daga! Nakitak ti bagik nga aglanglang-ay iti karuotan, mangkamkamat kadagiti kulibangbang, makigangantil kadagiti urbon ti leon. Nakaay-ayat ketdin! Ngem adda panagduaduak. Masansan nga agtungpal ti namnamak iti pannakaupay!

Ti wheelchair ti nariingak a kaduak a kanayon. Sipud pannakayanakko, pinaidamannak ti cerebral palsy kadagiti pagraragsakan bayat ti kinaubing. Nakaragragsak dagiti dadduma nga ubbing nga agaayam iti skating ken bisikleta, idinto ta nakatugawak nga agmaymaysa, diak pay makapagna. Isu nga idi impannak ni Nanang kadagiti nagduduma a mangngagas babaen ti pammati, sipapasnek a mangnamnamakami iti milagro. Ngem, yawidnak no kua a di naimbagan. Makapaupay dayta kaniak, ngem makapaladingit kenkuana!

Gapu ta tarigagayanna unay ti pudpudno a namnama, rinugian ni nanang ti nakipagadal iti Biblia kadagiti Saksi ni Jehova iti rugrugi ti 1964. Agarup innem ket kagudua ti tawenko idi.

Makaparagsak a maammuan nga adda idi napintas a paraiso ditoy daga. Nakalkaldaang ta napukaw ti immuna a tao, ni Adan, daydi a paraiso, ngem tinarigagayak ti nasinged a pannakirelasion iti Dios a kas iti tinagiragsakna idi. Ania ngata ti kasasaad ti panangtagiragsak iti pannakirelasion iti Dios? Wenno ti panagbiag idi adda ditoy daga ti Anakna? Impannak met ti panagar-arapaapko iti masanguanan a Paraiso. Uray no ubingak pay la idi, nalawag kaniak a nasarakanmin ti kinapudno.

Rinugian ni nanang nga inkuyog ti pamiliami iti Kingdom Hall dagiti Saksi ni Jehova. Naiduma unay dagiti gimongda iti naimatanganmi kadagiti simbaan! Dagiti tao ken aglawlaw inabbukayda toy riknak.

Maysa a karit ken nanang ti panangikuyogna kadakami idiay Kingdom Hall. Kaduami dagiti tallo nga adingko. Numona ta awan ti kotsemi. Agtaksikami no adda kuarta a pagbayadna. Malagipko pay laeng ti rigat a napasaranna iti maysa a Domingo. Awan a pulos ti taksi a lumabas. Pagammuan la ta insardeng ti maysa a lalaki ti trakna ket inlugannakami. Naladawkami a simmangpet iti gimong, ngem nakadanonkami. Anian a yamanmi ken Jehova!

Di nagbayag siaayat nga agsusublaten dagiti patpatgenmi a naespirituan a kakabsat a lallaki ken babbai nga addaan iti kotse a mangilugan kadakami. Ti panangparparegta ni nanang a pulos a di liwayan dagiti gimong malaksid no talaga a masakitkami inmalditna iti naganus a panunotko ti kinapateg ti ‘panaggigimongmi.’ (Hebreo 10:24, 25) Tinignay ti naadalna, indedikar ni nanang ti biagna ken Jehova ket nabautisaran idi 1965.

Kadaydi a tiempo nataenganakon tapno ad-adda a maapresiarko dagiti gimong. Iti Cypress Hills Congregation idiay Brooklyn, Nueva York, adda dagiti Europeo, negro, Hispanico, ken dadduma pay nga agaabay nga agdaydayaw. Maiparbeng laeng nga agbiag iti kasta a pudno a panagkakabsat dagiti tao a managbuteng iti Dios.​—Salmo 133:1.

Sinuruannak ni nanang no kasano ti agsagana para kadagiti gimong. Saanak a narigatan no panunot ti pagsasaritaan, ngem narigatanak no iti pisikal. Pinagbalin ti cerebral palsy dagiti simple a trabaho a dadakkel a proyekto. Imposible idi kaniak, agpapan ita, ti aguged iti nalinteg kadagiti sungbat iti literaturami iti Biblia. Nupay kasta, babaen ti panagensayo, simmayaat ti panagugedko.

Napno ti panunotko kadagiti banag a kayatko nga ibaga. Ngem no kasta nga agsaoakon, aglilimogen dagiti sao. Nasken ti panagrelaks tapno saan nga umirteng dagiti piskelko. Nasken met nga ikagumaak a baliksen a naimbag ti tunggal sao. Maupayak no diak maiyebkas ti komentok a kas iti kayatko a pannakaiyebkasna wenno no ammok a di naawatan dagiti tao ti imbagak. Nupay kasta, idi nairuamen kaniak dagiti kakabsat a lallaki ken babbai iti kongregasion, nalaklakadan a maawatan ti ibagbagak. Ngem no dadduma marigatanak pay laeng gapu itoy a parikut.

Innem a Makapaupay a Bulan

Idi agtawenak iti walo, adda napasarak iti uneg ti innem a bulan a mangap-apektar kaniak agpapan ita. Iti laksid ti amin a physical, occupational, ken speech therapy a nakaipasidongakon, impandak dagiti doktor iti maysa a rehabilitation hospital idiay West Haverstraw, Nueva York. Napalalo ti ladingitmi ken nanang. Sumagmamano a tawen kasakbayanna, idi impapan dagiti doktor nga adda diperensia ti panunotko, imbagana kadakuada a pulos a dinakto ipaaywan iti mental hospital. Isu a narigat kenkuana ti uray temporario laeng a panaginnadayomi. Nupay kasta, mamati a kabaelak nga aywanan ti bagik ta normal met ti panagbiagko uray no diak agpannuray kadakuada ken tatang.

Nasayaat ti pasilidad, ngem nariknak a nabaybay-anak. Masansan nga agsangit ken agalburotoak, a mangipamatmat no kasanot’ panagriknak iti kaaddak iti dayta a lugar. Manmano a makapagbiahe dagiti dadakkelko iti bus iti tallo nga oras tapno sarungkarandak, aglalo ta masikog idi ni Nanang iti maikalima nga anakna. No agawiddan, maladingitanak iti kasta unay ta ibaga no kua ti doktor a masapul a dida naynayen ti sumarungkar. Namindua laeng a pinalubosandak nga agawid.

Sinuruandak dagiti therapist a magna iti tulong dagiti braces ken crutches nga addaan iti padagsen a buli. Kas man maysa a tonelada ti kadagsen dagitoy. Nupay kasta, nakatulong ti padagsen a mangbalanse iti pannagnak tapno diak matuang. Daytoy ti umuna nga addang iti pannagna a bukbukod nga awan dagiti braces.

Ti panangiwa iti taraon, panangibutones​—aniaman nga aramid a nasken nga usaren dagiti ramay​—ket narigat no di man imposible kaniak. Ngem uray kaskasano nasursurok no kasano ti mangan ken agpelles. Nakatulong daytoy kaniak idi kamaudiananna iti panagserbik iti Dios.

Idi nalpasen ti panagsanayko, inyawiddak manen. Pinagtrabahonak ni nanang tapno maipakatko dagiti laing a naadalko. Maysa nga emosional a pannakidangadang ti panangaramid iti kasta, ta nupay kayatko a siak ti mangaramid kadagiti banag nga agpaay iti bagik, diak kabaelan ta makapaupay, mangibus panawen, ken makapabannog nga aramiden dagitoy. Ket no dua nga oras nga agpellesak no mapanak makigimong!

Idi immakarkami iti batog a mismo ti Kingdom Hall, nabaelak ti magna a bukbukod. Saan nga ang-angaw a balligi dayta!

Ti Karagsakan nga Aldaw iti Biagko

Sinigurado ni nanang nga addaan ti pamiliami iti balanse a naespirituan a dieta. Inyadalannak ken nangnamnama a basaek ti tunggal ruar dagiti magasintayo a Ti Pagwanawanan ken Agriingkayo! Adda dagiti gimong a nasken a saganaan ken tabunuan. Nupay sigagar nga inawat ti panunot ken pusok daytoy a pannakaammo, awan pay iti panunotko ti panangidedikar iti biagko ken Jehova ken ti panangisimbolo iti daytoy babaen ti bautismo iti danum. Impabigbig kaniak ni nanang nga uray no baldadoak, adda latta sungsungbatak iti Dios iti naespirituan. Saan nga agpannuray a mamimpinsan kenkuana ti ilalasatko nga agturong iti baro a lubong.

Ay-ayatek ti Dios, ngem ti kasasaadko ti nangiduma kaniak kadagiti sabsabali, maysa a nasaem a pannakaamiris para iti maysa nga agtutubo. Narigat nga awaten dagiti limitasionko. Masansan a diak malapdan ti agpungtot, ket masapul a matengngel daytoy sakbay nga agpabautisarak. (Galacia 5:19, 20) Ket kasanon no diak matungpal ti dedikasionko ken Jehova?

Iti panagkiddaw ni nanang, kinasaritanak ti maysa a panglakayen ti kongregasion. Dinakamatna ti saludsod ni mammadto Elias kadagiti Israelita: “Agpapan kaano ti panagallaallayo iti dua a panunot?” (1 Ar-ari 18:21) Nalawag, saan a naay-ayo ni Jehova iti panagduaduak.

Nagriingak iti naespirituan ket sipapasnek nga inkararagko ti tulong ni Jehova ken ti determinasion a mangidedikar iti biagko kenkuana. Inyadalannak ti maysa a kabsat a babai iti kongregasion. Ub-ubing ngem siak ken nasapa a naulila iti ina. Nupay kasta, nagdedikar iti Dios bayat ti kinaubingna.

Idi agtawenak iti 17, napagsimpak ti nakemko. Kayatko ti agserbi ken Jehova iti amin a kabaelak. Ti karagsakan nga aldaw iti biagko ket idi Agosto 9, 1974​—ti aldaw a pannakabautisarko.

Rag-o iti Ministerio

Nangipasango kadagiti dadakkel a karit ti pannakiraman iti ministerio. Ti kadakkelan a karit kaniak isu ti panagsao a maaawatan dagiti tao. Inkagumaak ti agsao iti nalawag. Kalpasanna, no nasken, uliten ti kaduak iti tay-ak ti ministerio ti imbagak iti bumalay. Binabalawdak dagiti dadduma, a minatmatandak kas biktima ti pananggundaway dagiti Saksi. Ngem kalintegak ken naimpusuan a tarigagayak ti mangasaba.

Makapabannog unay ti umalla-allatiw kadagiti balbalay, uray iti maysa laeng a bloke. Adu dagiti balay iti teritoria a pangaskasabaanmi ti addaan kadagiti agdan a diak madanon. Iti panawen ti lam-ek, dandani diak mabalinan ti mangasaba kadagiti balbalay gapu ta napuskol ti yelo kadagiti kalye. (Aramid 20:20) Nupay kasta, tinultulongandak dagiti naespirituan a kakabsat, ket ita pinaraburannak ni Jehova iti de motor a wheelchair, isut’ gapuna a saanak a marigatan unayen iti ministerio.

Idi agangay, rinugiak ti mangasaba babaen ti koreo. Diak mabalin ti agsurat babaen ti ima gapu ta saan a mabasa ti kaaduan a tattao ti suratko. Isu a ti de koriente a makinilia ti pagsuratko. Nakabumbuntog ti panagmakiniliak gapu ta adda deperensia ti imak. Saggaysa a pandagak dagiti letra. Maysa laeng a panid ti malpasko iti maysa nga oras wenno nasursurok pay.

Nupay kurang ti pigsak, pasaray agserbiak kas auxiliary pioneer, a mangbusbos iti 60 nga oras wenno nasursurok pay iti ministerio iti maysa a bulan. Kalikaguman daytoy ti nasayaat nga eskediul, kanayonan a panagregget, ken ti pannaranay dagiti kapammatian. Ti espiritu ti panagpayunir nga adda kadakuada ti mangparparegta kaniak. Nangituyang met ni nanang iti nasayaat a pagwadan babaen ti panagserbina kas regular wenno saan kas auxiliary pioneer nupay maipasango kadagiti pakarigatan, sakit, ken iti karit ti panangaywan kadagiti pito nga annak iti sangakabbalayan a di nagkaykaysa iti relihion.

Nakapagtakderak iti Bukodko a Saka

Idi agtawenak iti 24, inkeddengko ti sumina. Maysa a bendision ti yaakarko iti Bensonhurst a paset ti Brooklyn. Kasla maysa a nasinged a pamilia ti Marlboro Congregation. Anian a makapabileg-pammati ti pannakitimpuyogko kadakuada! Nupay tallo wenno dua laeng a kotse ti maus-usar iti kongregasion, dagasendak latta dagiti naespirituan a kakabsat a mapan kadagiti amin a gimong. Ngem saanak a nagbayag sadiay.

Idi nariknak nga awanen a pulos ti namnamak, nagsubliak iti pamiliak ket nalmesak iti liday iti las-ud ti tallo a tawen. Naglakaak manen nga agpungtot. Napanunot ken namin-ano a ginandatko pay ketdin ti agbekkel. Kanayon a sumungsungad ni patay a kasla napuskol nga ulep. Ngem nagtaklinak iti Dios ket inkarik nga ipategko ti sagutna a biag. Liniwliwa ken binagbagaandak dagiti panglakayen. Daytoy, agraman ti panagkararag, personal a panagadal, panagan-anus ti pamiliak, ken sumagmamano a propesional a tulong, ti nangilinteng iti panunotko.

Babaen Ti Pagwanawanan, sidudungngo a nangipaay ni Jehova iti pannakaawat iti nakaro a liday. Wen, maseknan kadagiti tattaona ken maawatanna ti rikriknatayo. (1 Pedro 5:6, 7) Idi agangay nakalung-awak iti nakaro a liday. Sangapulo a tawen kalpasanna, tultulongannak pay laeng ni Jehova a mapagballigian ti pannakapaay ken liday. No dadduma gistay lapunosennak ti rikna a kinaawan serserbi. Nupay kasta, ti panagkararag, panagadal iti Biblia, ken ti naespirituan a pamiliak ti nakatulong unay kaniak a mapagballigian daytoy.

Kalpasan ti napaay a panangbirukko iti sabali nga apartment, napilitanak a makipagtaeng iti pamiliak iti unos ti panagbiagko. Iti saan a mabayag, sinungbatan ni Jehova dagiti kararagko. Adda maysa a lugar idiay Bedford-Stuyvesant a paset ti Brooklyn a mabalinko a pagnaedan. Iti ngudo ti kalgaw idi 1984, immakarak ket sadiay ti pagnanaedak agpapan ita.

Siaanus nga ilugandak a mapan makigimong dagiti kameng ti naayat unay a Lafayette Congregation. Malagipko pay laeng ti immuna nga itatabunok iti Panagadal ti Libro ti Kongregasion. Iti maikapat a kadsaaran a naangay daytoy​—sapay ket awan ti elevator! Nabaelak ti immuli ken bimmaba iti agdan babaen laeng ti tulong ni Jehova. Idi agangay, naiyurnos [ti panagadal] iti maysa a lugar nga as-asideg a papanan. Ket itatta pinaraburannak ni Jehova iti pribilehio a maaddaan iti Panagadal ti Libro ti Kongregasion iti pagtaengak.

Napigsa ti espiritu ti panagpayunir iti daytoy a kongregasion. Agarup 30 ti payunir sadiay idi dimtengak, ket pinakitaandak dagiti dadduma iti naipangruna a panangaywan ken atension. Tinignaynak ti kinaregtada nga ag-auxiliary pioneer nga ad-adda a masansan.

Idi Abril 1990, nangbangon ti Lafayette ken Pratt Congregation iti baro a Kingdom Hall iti kalye a yan ti apartmentko. Anian a pannakaitiempona ta marigatanak manen a magna gapu iti kimmaro a pisikal a kasasaadko. Nupay kasta, iti tulong ti de motor nga scooter-ko ken dagiti naespirituan a kakabsat a lallaki ken babbai a mangan-andingay kaniak, makaay-ayo ti mapan ken agawid manipud kadagiti gimong. Apresiarek unay ti kasta a naayat a tulong!

Agyamanak iti Pannaranay ti Dios

Nupay nalupoy dagiti sakak, natibker ti pusok. Pinanam-ay bassit ti nasayaat nga edukasion ti biagko, ngem ti Dios ti mangpatpatibker kaniak. No dadduma diak ammo no pangalaak ti inaldaw a taraonko, ngem ni Jehova ti mangtartaripato kaniak. Isu ti matalek a Mangipapaay kadagiti kasapulak. Pudno a napateg kaniak dagiti sasao ni David: “Nagubingak, ket ita lakayakon, ngem diak pay nakakita iti nalinteg a nabaybay-an, ken kadagiti putputotna man a makipalpalama iti tinapay.”​—Salmo 37:23-25.

Namin-ano a tinulongannak ni Jehova a nangsalimetmet iti Nainkasuratan a takder babaen ti panangtulongna kaniak a di umawat iti dara kabayatan ti operasion. (Aramid 15:28, 29) Itay nabiit, pimmusay ni tatang. Pudno a nasaem unay ti mapukawan iti maysa a nakasingsinged kenka. Ti laeng pigsa a naggapu ken Jehova ti nangpakired kaniak iti daytoy ken iti dadduma pay a pakasuotan.

Mabalin nga agtultuloy a kumapsut ti salun-atko, ngem ti panagtalekko ken Jehova ken ti pannakirelasionko kenkuana ti mangbibiag kaniak. Anian a ragsakko ta maysaak kadagiti tattao ni Jehova ken di agpatingga ti panangsaranayna kaniak!