No Kasano a Nagunggonaanak iti Panangtaripato ti Dios

IDI agsapa ti Mayo 18, 1963, naragragsakak a nariing ngem iti kadawyan. Pangrugian daydi ti maysa a makaay-ayo, napintas panniempona nga aldaw. Ngem sakbay nga ilawlawagko no apay a naisangsangayan unay daydi nga aldaw kaniak, palubosandak iti apagbiit a mangyam-ammo iti bagik.

Naipasngayak idiay Philadelphia, Pennsylvania, E.U.A., idi Mayo 20, 1932, ti buridek iti pamilia nga addaan uppat a babbalasang. Pimmusay ni nanangko idi dua ti tawenko, ket nangasawa manen ni Tatang idi liman ti tawenko. Kalpasanna, innem nga adiek a lallaki ken babbai ti nainayon iti pamiliami. Baptist-kami, ket adda pay ketdi tiempo idi a panggepko ti agbalin a maestra ti Sunday-school.

Naipasngayak nga addaan rheumatoid arthritis, a nakaigapuan ti nagrigat a panagubingko. Idi siam ti tawenko, imbaga ti maysa a doktor kaniak a kumaronto ti kasasaadko bayat ti panaglabas ti tawtawen. Nakalkaldaang ta pimmayso ti impakpakaunana. Idi 14 ti tawenko, diakon makapagna. Idi agangay, naan-anayen a nalugpi dagiti ima, saka, ken gurongko, ket naut-ot no maigaraw dagiti patongko. Nakaro ti kinabakkaweng dagiti ramayko isu a marigatanak nga agsurat wenno uray la mangpidut iti bambanag. Maigapu iti kasasaadko, diakon nakapagsubli iti eskuelaan ti publiko.

Idi nayospitalak idi agtawenak ti 14, naragsakanak agsipud ta impalubos dagiti nars nga aramidek ti babassit a bambanag a pangtulong kadakuada. Kasta unay ti panangtagiragsakko iti daytoy a trabaho. Idi agangay, dimteng ti tiempo a diakon makatugaw a bukbukodko. Imbaga dagiti doktor kadagiti nagannakko nga awanen ti pamusposanda a pangtulong kaniak, isu a kalpasan ti pannakayospitalko iti tallo a bulan, napagawidakon.

Iti simmaruno a dua a tawen, agingga a 16 ti tawenko, gistay nakaiddaak a kanayon. Naisuroak idiay balay babaen iti tutor, ngem kumarkaro idin ti kasasaadko. Naaddaanak iti ulcer iti kannawan a pingilko, agraman rheumatic fever, isu a masapul ti panagsublik iti ospital. Sadiay a nagtawenak iti 17. Tallo a bulan manen a nagtalinaedak idiay ospital. Idi nakaawidak, saanakon a kualipikado a maisuro idiay pagtaengan babaen iti tutor.

Bayat nga immadaniak iti 20, malmaldaangak unay ken gistay kanayon nga agsangsangitak. Ammok nga adda Dios, ket namin-adu a nagkararagak kenkuana tapno tulongannak.

Namnama iti Masakbayan

Bayat ti kaaddak idiay Philadelphia General Hospital tapno umawat iti kanayonan a pannakaagas ti pingilko, nakikuartoak iti maysa a balasitang nga agnagan Miriam Kellum. Naggayyemkami. Idi simmarungkar ti manang ni Miriam a ni Catherine Miles, inranud ni Catherine kaniak ti impormasion manipud Biblia. Kalpasan a napagawidak manipud ospital, nabaelak pay ti kanayon a nakikomunikar ken ni Catherine, a maysa a Saksi ni Jehova.

Daksanggasat ta saannak unay a kayat ti agsioman kaniak. Idi agtawenak iti 25, nakipaggianak iti maysa kadagiti manangko, ket naiparna nga immakar ni Catherine iti maysa a balay nga asideg kadakami. Inayabak, ket rinugiannak nga inyadalan iti Biblia babaen iti libro a Mapapati Coma ti Dios kas katulongan iti panagadal. Anian a rag-o a maammuan a saanakto a lugpi iti agnanayon ket addanto aldaw a mapukawen ti kinadakes! (Proverbio 2:21, 22; Isaias 35:5, 6) Nakaallukoy kaniak dagitoy a kinapudno, agraman ti namnama a panagungar ken ti gundaway a makitakto manen ni nanangko.​—Aramid 24:15.

Dagus a rinugiak a tabunuan ti gimgimong dagiti Saksi ni Jehova. Ti asawa ni Catherine ti mangubba kaniak a mangilugan iti kotseda ket alaendak idiay Kingdom Hall. No tumabunoak kadagiti gimong, maparegtaak iti ayat a naipakita kaniak.

Panangparmek Kadagiti Tuben

Nakalkaldaang ta nagsina da manangko ken ti asawana, a nakaigapuan ti pannakipagtaengko manen kada tatangko ken ti agsioman kaniak. Tangay kagura unay ti agsioman kaniak dagiti Saksi ni Jehova, kasapulan a sililimed nga adalek ti Biblia manipud 1958 agingga idi 1963. Dina palubosan ti asinoman a Saksi ni Jehova nga umay idiay balay. Nadumaduma ti pakiadalak iti telepono wenno no addaak idiay ospital.

Ti sabali pay a tuben isut’ panagkedked no dadduma ti agsioman kaniak a mangpakan ken mangdigos kaniak. Naminsan dina ginulgolan ti buokko iti walo a bulan. Dinak met pinalubosan a mangbasa iti aniaman a surat a dina pay inanamongan nga umuna. Nupay kasta, nabatad ti panangtaripato ni Jehova, tangay pinalubosan ti adingko a lalaki a sumangpet ti suratko idiay balayda. Daytoy nga urnos ti nangipalubos ken ni Pat Smith, maysa a Kristiano a kabsat a babai nga isut’ kinasinnuratko, a makikomunikar kaniak ken mangabasto kaniak kadagiti Nainkasuratan a pammaregta. Ipuslit ti adiek a lalaki dagiti suratna kaniak, sungbatak ida, ket ipuslitna dagiti suratko kenkuana.

Idi 1963, masapul a mayospitalak manen, ket intultuloynak nga inyadalan ni Pat Smith sadiay. Maysa nga aldaw, dinamagnak: “Kayatmo kadi ti mabautisaran iti asamblea sirkitotayo?”

“Wen!” insungbatko.

Addaak idi iti rehabilition ward ket makaalaak iti maysa nga aldaw a pammalubos a rummuar. Iti aldaw ti asamblea sirkito, immaynak innala ni Pat, agraman dadduma a Saksi. Kasapulan nga ikabildak dagiti kakabsat a lallaki iti maysa a tabla sadak idissaag iti danum tapno mabautisaranak. Maysaak met laengen nga adipen ni Jehova! Mayo 18, 1963, idi, ti aldaw a pulos a diakto malipatan.

Panagsublisubli Kadagiti Balay a Pagtaraknan

Idi Nobiembre, masapul a pumanawakon iti ospital. Diak kayaten ti agawid agsipud ta ammok a mapengdan sadiay ti panagserbik ken ni Jehova. Isu a nangaramidak iti urnos a maiserrekak iti balay a pagtaraknan. Sadiay a rinugiak nga iranud ti ministeriok babaen ti panagsurat kadagiti tattao a narigat a makasao dagiti Saksi iti panagbalaybalay a ministerio. Nagbasaak met iti benneg dagiti pimmusay iti periodiko ket sinuratak dagiti kabagian dagidiay nabiit pay a pimmusay, saak nangiratip kadagiti makaliwliwa a teksto manipud Biblia.

Kalpasanna, idi Mayo 1964, immakarak idiay Siudad ti Nueva York tapno makipagtaeng iti inaunaan a manangko ken ti asawana. Inggatangannak [ti kayongko] iti kaunaan a wheelchair-ko, ket rinugiak a tabunuan dagiti gimong. Anian a rag-ok idi iparangko ti kaunaan a pasetko iti Teokratiko nga Eskuelaan ti Panagministro kabayatan ti kaaddak idiay Siudad ti Nueva York!

Idi kattapog ti 1965, kiniddaw ti sumagmamano a gagayyem manipud Philadelphia a makikaduaak kadakuada iti dua a lawas. Bayat ti kaaddak idiay Philadelphia, nagsurat kaniak ni manangko ket kinunana a dinak kayaten ket aggianakon iti lugar a yanko. Inyurnosko ti sumrek manen iti balay a pagtaraknan. Bayat ti kaaddak sadiay, intultuloyko a tinabunuan dagiti gimong ken kasabaan ti tattao babaen ti panagsurat. Iti daytoy a gundaway a napalawak ti ministeriok babaen ti pannakiramanko iti maaw-awaganen iti panag-auxiliary pioneer.

Nakaawat iti Naayat a Panangtaripato

Ti kanayonan a pakakitaan iti panangtaripato ni Jehova isut’ panangaywan nga impaay kaniak ti Kongregasion ti West dagiti Saksi ni Jehova idiay Philadelphia. Malaksid iti panangipanda kaniak kadagiti Nakristianuan a gimong, inikkandak kadagiti papel, pagsurat ken dadduma pay nga abasto a kasapulak iti ministeriok.

Idi 1970, napasamak ti sabali pay a pammaneknek ti panangtaripato ni Jehova idi nayurnos a makipaggianak ken ni Maude Washington, maysa a Kristiano a kabsat ken retirado a nars. Nupay dandanin ag-70 iti dayta a tiempo, situtulok nga inaywanannak iti simmuno a dua a tawen agingga a dinan kabaelan nga aramiden dayta.

Kabayatan ti pannakipagnaedko ken ni Maude, siiinget nga inyurnos dagiti kakabsat iti Kongregasion ti Ridge idiay Philadelphia, tapno masigurado a matabunuak amin a gimong. Kalikaguman idi daytoy a bagkatendak nga iyuli ken iyulog iti agdan ti maikatlo a kadsaaran iti mamitlo iti kada lawas. Anian a yamanko kadagidiay simamatalek a nagbannog tapno matulongandak a makatabuno kadagiti gimong!

Idi 1972, idi dinakon maaywanan ni Kabsat Washington, inkeddengko ti mangala iti bukodko nga apartment. Saan a napasamak daytoy a panagbalbaliw no awan ti managsakripsio a tulong ken ayat dagiti Kristiano a kakabsat a babbai iti Kongregasion ti Ridge. Nangaramidda iti urnos a mangpakan, mangdigos, ken mangaywan kadagiti personal a kasapulak. Timmulong pay ti sabsabali babaen ti pannakitienda ken panangawyanda iti dadduma pay a masapsapulko.

Tunggal agsapa, nasapa nga umay dagiti kakabsat a babbai tapno pakanen ken kawesandak iti dayta nga aldaw. Kalpasan a matulongandak nga agtugaw iti wheelchair-ko, ituloddak iti lamisaanko nga adda iti maysa a bassit a suli ti apartment, nga asideg iti tawa. Sadiay nga agtugawak, a makiraman iti panangasaba babaen ti panangusarko iti telepono ken panagsurat. Inawagak daytoy a lugar ti apartment-ko kas suli ti paraiso, ta inarkosak dayta iti adu a nateokratikuan a retrato. Busbosek ti intero nga agmalem iti ministeriok agingga nga adda umay iti rabii a mangipaidda kaniak iti kama.

Idi 1974, kinalikaguman ti salun-atko a mayospitalak. Bayat ti kaaddak sadiay, pinadasdak dagiti doktor a piliten nga agpayalison iti dara. Makalawas kalpasanna, kalpasan a simmayaat ti kasasaadko, dua kadagiti doktor ti simmarungkar kaniak. “Ay, malagipkay a dua,” kinunak kadakuada. “Pinadasdak idi a kumbinsiren nga agpayalison iti dara.”

“Wen,” insungbatda, “ngem saan gayam nga agballigi ti panangkumbinsirmi.” Naaddaanak iti gundaway a mangted iti pammaneknek kadagiti doktor maipapan iti kari ti Biblia a panagungar ken ti Paraiso a daga.​—Salmo 37:29; Juan 5:28, 29.

Kabayatan ti umuna a sangapulo a tawen a panagbiagko nga agsolsolo, nabaelak a tabunuan dagiti Nakristianuan a gimong. Diak pulos linanganan ida malaksid no masakitak. No dakes ti panniempo, dagiti kakabsat ti mangbalkut kadagiti gurongko iti ules ken abbonganda ida tapno agtalinaedda a namaga. Pasaray umaynak bisitaen ti agdaldaliasat a manangaywan. Kabayatan dagiti panagsarungkarna, “kaduaennak” iti panangyadalko iti Biblia nga idadauluak babaen ti panagusarko iti telepono. Panawen dagitoy iti dakkel a rag-o para kaniak.

Panangsaranget iti Kumarkaro a Kasasaad

Idi 1982, nagtengko ti kasasaad a diak pulos makabangonen. Diakon makatabuno kadagiti gimong, wenno makapagpayunir, nga intultuloyko nga inaramid iti 17 a tawen. Dagitoy a kasasaad ti nangpaladingit unay kaniak, ket masansan nga agsangitak. Nupay kasta, nabatad ti panangtaripato ni Jehova​—inyurnos dagiti Kristiano a panglakayen a maangay ti Panagadal iti Libro ti Kongregasion iti bassit nga apartment-ko. Anian a yamanko pay met laeng iti daytoy a probision!

Tangay naidalitak iti pagiddaak iti intero nga aldaw ken diak makabangon nga agturong iti lamisaanko, ininsiarko ti agsurat iti papel nga iparabawko iti barukongko. Idi damo, saan a mabasa ti suratko, ngem babaen iti kanayon a pananginsiar, mabasa met laengen. Iti sumagmamano a panawen, nabaelak manen ti mangasaba babaen ti panagsurat, ket daytoy ti nakaanay a nangparag-o kaniak. Daksanggasat ta kimmaro ti kasasaadko, ket diak kabaelanen ti makiraman iti daytoy a kita ti ministerio.

Nupay diak matabunuan ti kombension distrito manipud 1982, ikagumaak a kaslattay addaak sadiay no panawen ti kombension. Maysa a Kristiano a kabsat a babai ti mangyeg kaniak iti lapel card sana iyaspili iti pagturogko a kawes. Kasta met a lukatak ti telebision iti panagay-ayam ti baseball idiay Veteran’s Stadium sadi Philadelphia ket panunotek no sadinot’ sigud a pagtugtugawak kabayatan dagiti kombensiontayo sadiay. Kadawyan nga adda mangi-rekord iti programa ti kombension tapno mangngegak amin dayta.

Di Isusuko

Nupay saanen a kas iti sigud ti maaramidak iti ministerio, sangkapanunotko pay laeng ti panangiranud iti tattao maipapan kadagiti kinapudno ti Biblia. Ti panagbalinko idi a payunir ken panangtulong iti sumagmamano nga interesado a nagadal iti Biblia ti gubuayan ti rag-o. Nupay adda rigrigatna ti agbiag nga agsolsolo iti napalabas a 22 a tawen, natagiragsakko ti wayawaya nga agserbi ken ni Jehova nga awan pakasingsingaan, a pulos a diak koma nabaelan no nagtalinaedak idiay balay.

Naamirisko met a kasapulan ti panangikagumaan a mangbalbaliw iti personalidadko. No dadduma ti panagsasaok ket saan a kanayon a makaay-ayo no ibaonko dagidiay agboluntario a tumulong kaniak. (Colosas 4:6) Itultuloyko nga ikararag ken ni Jehova a tulongannak a rumang-ay iti daytoy a benneg. Pudno nga agyamanak iti kinaanus ken manangpakawan nga espiritu nga impakita dagidiay nangan-anus kaniak buyogen ti ayat iti napalabas a tawtawen. Ti naayat a panangandingayda ket bendision a pagyamanak kadakuada ken ni Jehova.

Nupay diak mabaelanen a tabunuan dagiti gimong iti adun a tawtawen​—diak pay pulos rimmuar iti apartment-ko iti unos dayta a panawen malaksid iti naminsan a pannakayospitalko​—kaskasdi a narag-o ken naragsakak. Aminek, maldaangak no dadduma, ngem tultulongannak ni Jehova a makalung-aw iti dayta. Tagtagiragsakek itan ti iyiimdeng kadagiti gimong babaen iti telephone hookup iti Kingdom Hall. Iti panagpannurayko ken ni Jehova babaen ti kararag ken panagtalek kenkuana, pulos a diak narikna nga agmaymaysaak. Wen, pudno a maikunak a nagunggonaanak iti panangtaripato ni Jehova.​—Kas insalaysay ni Celeste Jones.

[Ladawan iti panid 24]

Inawagak daytoy a lugar a nakiramanak idi iti ministerio kas suli ti paraiso