‘Kumalay-atakto a kas iti Panagkalay-at ti Kalakian nga Ugsa’

KAS INSALAYSAY NI FRANCESCO ABBATEMARCO

“Apay nga impalubos ti Dios a mapasamak daytoy? Apay a siak pay?” Dagita ti namin-adun nga inyimtuodko! Diak maakseptar nga agusarak iti wheelchair inggat’ tungpal biagko ken diak mausaren dagiti ima ken sakak.

IDI 1962, dandaniak natay idi aldaw a naipasngayak iti maysa a bassit nga ili iti rehion ti Basilicata, Italia. Narigatan ni nanangko a nagpasngay, isu nga inineksionannak ti doktor iti nadumaduma nga agas. Nagadu ti dakes nga epekto dagita iti bagik. Tallo nga aldaw kalpasanna, namin-adu a nagkombulsionak isu a naapektaran ti naganus pay a pammagik. Naparalisado dagiti ima agraman sakak ken nadadael ti kuerdas bokalesko.

Bayat nga agmatmataenganak, naupayak unay gapu iti pammagik. Nagbalinak a managpungpungtot ken masansan a pagsasawak ti tattao iti aglawlawko. Kasla nagtupak ti langit kaniak ken awanen ti serserbi ti biagko. Idi agtawenakon iti 25, kasta unay ti leddaangko. Gapu ta diak maawatan no apay nga impalubos ti Dios nga agsagabaak iti nakaro, impagarupko nga awan ti Dios.

Naiduma a Panangmatmat

Maysa nga agsapa idi arinunos ti 1987, bayat nga agtugtugawak iti wheelchair iti ruar ti balaymi, inasitgandak ti dua nga agkabannuag a lallaki a nakadaldalimanek ti panagkawkawesda. Impagarupko no ni manongko ti kayatda a kasarita isu nga imbagak, nupay agpakarigatak nga agsao, nga awan ni manongko idiay balaymi. “Ngem kayatmi ti makisarita kenka,” insungbatda. Naklaatak iti imbagada agsipud ta manmano ti mayat a makisarita kaniak.

“Mamatika kadi iti Dios?” inyimtuodda. Sigugubsang a kinunak, “Kasano a mamatiak idinto ta kastoy ti kasasaadko?” Nagsasaritakami, ket naammuak nga isuda gayam dagiti Saksi ni Jehova. Nangitukonda kaniak iti libro a napauluan Life—How Did It Get Here? By Evolution or by Creation?a ket inawatko nupay diak koma kayat. Imbagada nga agsublida ngem pinampanunotko a nasaysayaat no saan koman.

Nagsubli ti dua a Saksi kas inkarida, isu nga intuloymi ti saritaanmi. Malagipko dagiti bersikulo ti Biblia nga imbasada kaniak, ti Isaias 35:5, 6: “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.” Makaliwliwa dagita a sasao ngem kasla imposible a pumayso iti biagko. Diak la ngarud makatakderen, di lallalon a diak makakalay-at a kas iti panagkalay-at ti kalakian nga ugsa. Nupay kasta, immannugotak nga agpayadal iti Biblia, ngem diak mamati a marisut ti Biblia dagiti agdama idi a problemak. Kasla imposible a dumtengto ti aldaw a mapukawen dagiti an-anayek.

Idi agangay, inawisdak dagiti Saksi a makigimong iti maysa a Kingdom Hall iti lugarda. Diak malagip no ania ti naipalawag a naibasar iti Biblia, ngem pulos a diakto malipatan ti kinanainggayyeman ken ayat nga impakita kaniak dagiti Saksi. Imbes nga ipariknada a nakapimpimanak, impariknada a maragsakanda unay ta nakigimongak. Iti daydi a Domingo, naamirisko a natalged ti riknak no addaak idiay Kingdom Hall, isu a sipud idi, regularen a makigimgimongak.

Dakkel a Lapped a Rumbeng a Maparmek

Ti panagadalko iti Sao ti Dios ket adda nakaskasdaaw nga epektona iti pusok. Kayarigak ti nalaylayen a mula a limmangto manen. Simmarantaak manen. Anian a makaparagsak a panunoten a naragsak gayam ti agbiag! Kayatko nga ipadamag iti sabsabali ti nakaskasdaaw a namnama nga inakseptarko. (Mateo 24:14) Ngem kasanok a mairugi ti mangasaba? Sipapasnek nga inkararagko dayta ken kiniddawko ken Jehova nga isuronak a mangasaba.

Idi Setiembre 1991, adda payunir (amin-tiempo nga ebanghelisador) a naituding iti kongregasionmi. Maysa nga aldaw, imbagak kenkuana idiay pagtaenganna a kayatkon ti mangasaba. Diak unay makasao isu a nagsaritaanmi nga agmakiniliaak nga agaramid kadagiti surat. Lapped ngamin dagiti paralisado nga imak. Babaen iti tulong dayta a payunir, pinadasko ti adu a pamuspusan. Pinadasko ti mangkagat iti lapis ken dayta ti pinagitalmegko kadagiti teklado. Kalpasanna, pinadasko ti nagusar iti helmet a nakabitan iti kayo ken inusarko ti ulok a pinagitalmeg kadagiti teklado. Kasla awan ti nagkurri.

Idi agangay, bayat a pagsarsaritaanmi ti problemak, kastoy ti inyangaw dayta met la a payunir: “Nagpintas ta agongmo.” Dagus a ti agongko ti pinadasko a pinagitalmeg kadagiti teklado ket natakuatak a mayat. Kamaudiananna, makaputarak met laengen kadagiti surat. Agasenyo ti panagreggetko a mangatur kadagiti kamali iti ispeling babaen iti agongko! Di nagbayag, napanunotmi a nalaklaka no agusarak iti computer. Ngem pangalaak ngay iti kuarta nga igatangko iti dayta? Nagurayak iti maitutop a kanito sa kinasaritak ti nagannakko. Di nagbayag, agus-usarakon iti computer nga agaramid kadagiti surat.

Natungpal ti Tarigagayko

Dagiti gagayyemko ken kakabagiak ti damo a sinuratak, sa dagiti kailiak ken dagiti agnanaed iti kabangibang nga il-ili. Idi agangay, agsursuratakon kadagiti tattao iti intero nga Italia. Diak makapanunot iti sasao a mangiladawan iti rag-ok no adda agsubalit kaniak. Idi Disiembre 1991, naanamonganak kas maysa a di bautisado nga agibumbunannag iti naimbag a damag. Nagpasalistaak metten iti Teokratiko nga Eskuelaan ti Panagministro, maysa nga eskuelaan a linawas a maangay kadagiti kongregasion dagiti Saksi ni Jehova. No adda naituding a pasetko, isaganak a naimbag idiay balay babaen iti computer. Kabayatan ti gimong, adda gayyem a mapan idiay plataporma tapno ibasana ti insaganak a pasetko.

Gapu ta agyamanak unay iti ayat nga ipakpakita kaniak ni Jehova, ammok a ti panangidedikarko iti biagko iti Dios ken ti panagbautisarko ti sumaganad nga aramidek tapno rumang-ay ti espiritualidadko. Inturturedko a kinasarita ti dadakkelko maipapan iti daytoy a desisionko. Saanda a naragsakan, ngem napigpigsa ti tarigagayko nga agbautisar ngem iti butengko. Babaen ti tulong ni Jehova ken dagiti padak a Saksi, nabautisaranak idi Agosto 1992. Anian a ragsakko agsipud ta tinabunuan ni manongko ken ti ipagko ti panagbautisarko!

Dagiti Panagbalbaliw ti Panagpampanunotko

Bayat a lumawlawag kaniak dagiti prinsipio a linaon ti Sao ti Dios, naamirisko a nasken a balbaliwak dagiti dakes a kababalinko. Napanunotko a gapu iti pisikal a kasasaadko, nagbalinak a managimbubukodan. Masapul nga ikagumaak nga ikkaten dagita a pakapilawan. Masapul nga agbalinak a napakpakumbaba ken daerak ti kanayon a pannakaupay gapu ta nasken nga agpannurayak iti sabsabali.

Inkagumaak met nga isardeng ti panangay-ayko iti bagik ken ti panangpanunotko a maysaak a biktima. Nangrugin a tinagiragsakko dagiti makapakatawa a paset ti sumagmamano a kasasaad. Maysa nga aldaw, bayat a mangaskasabaak iti binalaybalay, adda ubing a babai a nangilukat iti ridaw. Dinamag ti maysa kadagiti kakuyogko a Saksi no adda dagiti nagannakna iti balayda. Kastoy ti impukkaw ti ubing a babai, “Inang, adda dua a lallaki ken maysa a masakit a lalaki iti ridaw.” Idi nakitanak, nabainan unay ti ina nga uray la a dinan ammo no ania ti ibagana. Kastoy ti kinuna ti maysa kadagiti gagayyemko: “Kinaagpaysuanna, duakami a masakit ken maysa ti nasalun-at.” Immisemkami amin ken siraragsakkami a nagsasarita.

Ti Tarigagayko nga Agserbi a Naan-anay

Kalpasan ti panagbautisarko, nagserbiak kas auxiliary pioneer iti siam a bulan. Nangbusbosak iti 60 nga oras iti kada bulan iti trabaho a panangasaba. Nupay kasta, kayatko nga ad-adu pay koma ti maaramidak. Di nagbayag, nangrugiak a nagserbi kas maysa a regular pioneer. Ad-adu a tiempo ti inusarko iti trabaho a panangasaba. Narigat dagiti immuna a sumagmamano a bulan ti panagserbik kas payunir. Adu a tattao ti mangipagarup nga addaak iti ridawda tapno agpalimos, isu a mapabainanak agraman dagiti kakuyogko a kapammatiak.

Adu met a kakongregasionko ti marigatan a mangtarus iti panagsaok isu a dida masinunuo no kasano ti kasayaatan a panangtulongda kaniak. Ngem babaen iti tulong ni Jehova ken ti di agimbubukodan a panangandingay dagiti kapammatiak, simmayaat ti kasasaadko idi agangay. Ita, pampanunotenen dagiti tattao a saanak laeng a naka-wheelchair no di ket maysaak met kadagiti Saksi ni Jehova a mangikagkagumaan a tumulong iti sabsabali tapno maammuanda dagiti panggep ti Dios.

Idi Hulio 1994, natabunuak ti espesial a dua a lawas a panagsanay agpaay kadagiti payunir a ministro. Sadiay nga inadalmi dagiti Nainkasuratan a prinsipio a mangiwanwan iti trabaho a panangasaba ken panangaramid-adalan. Immawatkami met iti praktikal a panagsanay iti ministerio. Adu a lapped ti pinarmekko tapno makatabunoak, yantangay agarup 60 a kilometro ti kaadayo ti nakaangayan ti eskuelaan manipud iti pagnanaedak. Saan a mabalin nga umyanak iti sabali a balay, isu a nagsisinnublat dagiti kapammatiak a mangitulod kaniak idiay eskuelaan iti agsapa ken mangyawid kaniak iti rabii. No pangaldaw, maysa kadakuada ti mangbagkat kaniak agingga iti maikadua a kadsaaran a sadiay nga aglalanglangkami.

Dakkel nga Annongen

Idi Marso 2003, nadutokanak kas maysa a panglakayen iti kongregasion. Gapu iti dayta nga annongen, masapul nga agtrabahoak a naimbag agpaay iti sabsabali. Ad-adda itan a maawatak ti kayat a sawen ni Jesus idi kinunana: “Ad-adu ti kinaragsak iti panangted ngem iti panangawat.” (Aramid 20:35) Makipagtartrabahoak iti nagsayaat a bagi dagiti panglakayen, ket tultulongandak a mangibaklay iti annongek. Mariknak nga ap-apresiarendak ti amin a kakongregasionko—nangruna dagiti ubbing—ket iramramandak kadagiti aktibidadda. Makitkitada no kasano a parparmekek dagiti lapped iti panagserbik ken Jehova, ket adu ti agpatpatulong kaniak tapno maparmekda dagiti bukodda a problema.

Nasursurok a saan a napateg ti pisikal a kasasaad ti maysa a tao tapno agbalin a naragsak. Imbes ketdi, ti pananggun-od iti anamong ni Jehova ken ti panangaramid iti pagayatanna ti kapatgan. Nangnangruna nga agyamanak kenkuana gapu iti nakaskasdaaw a namnamak a diakton usaren ti wheelchair-ko. Wen, segseggaak ti ‘panagkalay-atkonto a kas iti panagkalay-at ti kalakian nga ugsa’ ken ti awan inggana a panagserbik iti pudno a Dios.—Isaias 35:5, 6.

[Footnote]

[Blurb iti panid 22]

Pampanunoten itan dagiti tattao a saanak laeng a naka-wheelchair no di ket maysaak met kadagiti Saksi ni Jehova a mangikagkagumaan a tumulong iti sabsabali tapno maammuanda dagiti panggep ti Dios

[Ladawan iti panid 21]

Panagsagana agpaay iti gimong iti kongregasion babaen ti panangusarko iti agongko nga ag-type