Matrattrato a kas Man La Awan Kaimudinganna
“Idi addaak iti umuna a grado iti elementaria idiay Espania, makapainsulto ti ibirbirngas kaniak ti dadduma a kaklasek gapu ta basbassitak nga amang ngem kadakuada. Dandani inaldaw nga agawidak nga agsangsangit.”—Jennifer, anak dagiti imigrante a Filipino.
“Idi immakarak iti sabali nga eskuelaan, makapainsulto ti ipampanagan kaniak dagiti puraw nga estudiante. Ammok a kayatdak a gargarien a kumabil. Ngem uray kaskasano, kanayon idi a makapagteppelak uray no sasairen ken ipupueradak.”—Timothy, maysa nga Africano-Americano.
“Idi pito ti tawenko, agraranget dagiti Igbo ken Hausa ditoy Nigeria. Naimpluensiaanak iti dayta a panaggiginnura ta iti klasemi, sutsutilekon ti maysa a kaklasek a Hausa, nupay aggayyemkami.”—John, kameng ti Igbo nga etniko a grupo.
“Kaduak ti padak a misionera a mangikaskasaba iti mensahe ti Biblia kadagiti kaarrubami idi a sinursurot ken binatbatodakami dagiti ubbing a sinugsogan dagiti lumugar a papadi. Kayat dagiti padi a pumanawkami iti dayta nga ili.”—Olga.
NAPADASAM kadin ti naibabain gapu iti di nainkalintegan a diskriminasion, a masansan a nairamut iti panangidumduma? Nalabit a maigapu dayta iti kolor ti kudilmo, relihionmo, kasasaad ti panagbiagmo, kinalalaki wenno kinababaim, wenno uray ti edadmo. Dagidiay kanayon a biktima ti panangidumduma ket masansan a madanaganda di la ket ta nakarkaronto pay ti mapasaranda a pannakamaltrato. Madanaganda unay no magnada iti kaaduan ti tao, mapanda makitienda, umakarda iti pageskuelaan, wenno dumar-ayda iti sosial a taripnong.
Kanayonanna, dagiti biktima ti panangidumduma ken diskriminasion mabalin a marigatanda a makastrek iti pagtrabahuan, wenno saan a de-kalidad ti pannakaasikaso ti salun-atda, dida makagun-od iti nangatngato nga adal, ken basbassit ti maipaay kadakuada a benepisio ken kalintegan. No dagita ket iparparegta dagiti addaan iti autoridad, ti diskriminasion ket mabalin nga agresulta kadagiti nagdakes nga aramid a kas iti panagiinnibus ken panangikisap iti puli. Ti maysa a nagkauna a pagarigan iti gandat a panangikisap iti puli ket mabasa iti Ester a libro iti Biblia. Imutektekam ti epekto ti gura ken panangidumduma.—Ester 3:5, 6.
Mabalin nga adda latta kinapanatiko ken panangidumduma, uray iti luglugar nga addaan kadagiti linteg kontra iti diskriminasion. Kinuna ti dati a High Commissioner for Human Rights ti United Nations: “Innem a dekada kalpasan ti pannakaipatungpal ti Universal Declaration of Human Rights . . . , dagiti prinsipio ti kinaagpapada ken di panangidumduma ket saan pay a maipapaannurot iti amin a lugar ken iti amin a tattao.” Makapadanag dayta yantangay gapu ti iyaakar dagiti tattao ken ti panagsangpet ti nagadu a nagbakuit, dakkelen ti namalbaliwan ti kasasaad ti populasion iti adu a pagilian.
No kasta, ti kadi kagimongan nga awanan iti diskriminasion ket maysa la nga arapaap? Wenno mabalin kadi a parmeken ti panangidumduma ken diskriminasion? Masungbatan dagita kadagiti sumaganad nga artikulo.