Agbiagka iti Simple ken Balanse

TALAGA a makagunggona ti simple ken balanse a panagbiag. Ngem ania ti ramanen dayta? Umuna, mabalin a nasken a panunotem dagiti prioridadmo. Kasanom a maaramid dayta?

Isaludsodmo iti bagim: ‘Ania dagiti naragpatkon? Ania pay dagiti nasken a ragpatek?’ Isuratmo dagiti kangrunaan a kalatmo:

1. ․․․․․

2. ․․․․․

3. ․․․․․

Para iti adu, ti biag ita ket apagbiit ken naisentro iti pananggun-od iti material a bambanag. Kasda la ibagbaga: “Mangan ken uminumtayo, ta inton bigat mataytayo.” (1 Corinto 15:32) Patienda a ti estilo ti panagbiag ita ket agtrabahoka tapno maaddaanka iti kuarta nga igatangmo kadagiti kayatmo. Ngem sabali ti panangmatmat ti Biblia.

Iti maysa kadagiti pangngarigna, nadakamat ni Jesus ti maysa a lalaki a nagurnong iti adu a sanikua, ngem natay sakbay a natagiragsakna dagita. “Kasta ti mapasamak iti tao nga agurnong iti gameng maipaay iti bagina ngem saan a nabaknang iti Dios.” (Lucas 12:16-21) Saan kadi nga umiso ti napinget a panagtrabaho dayta a lalaki tapno makaurnong agpaay iti bagina? Saan. Ti problema ket ti kinamaterialistikona. Dina inkabilangan ti panangmatmat ti Dios kadagiti planona isu a dina man la pulos nananam ti amin a kinabaknangna— amin a nagbannoganna. Anian a nakalkaldaang!—Eclesiastes 2:17-21; Mateo 16:26.

Iti kasumbangirna, aw-awisennatayo ni Jesus nga agtrabaho agpaay iti agnanayon a gunggona. Indagadagna: “Agtrabahokayo, saan a maipaay iti taraon a madadael, no di ket maipaay iti taraon a mataginayon maipaay iti biag nga agnanayon.” (Juan 6:27) Kasakbayan dayta, kinunana: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Nagsayaat ketdin a gunggona!

Kasanom a Maiwaksi ti Pakaringgoram?

Binigbig ni Jesus ti pagannayasan ti tao nga agdanag maipapan iti material a bambanag. Gapuna, indagadagna kadagiti adalanna: “Sumardengkayon a mangsapsapul no ania koma ti kanenyo ken no ania koma ti inumenyo, ket sumardengkayon a maringringgoran unay; ta amin dagitoy isuda ti bambanag a sigagagar a sapsapulen dagiti nasion iti lubong, ngem ni Amayo ammona a kasapulanyo dagitoy a banag. Nupay kasta, agtultuloy a sapulenyo ti pagarianna, ket dagitoy a banag mainayonto kadakayo.”—Lucas 12:29-31.

Dagita a mangipanamnama a sasao ti nangtignay iti adu a Kristiano a mangpasimple iti panagbiagda. Kinuna ni Juliet nga agnanaed idiay Malaysia: “Gapu iti trabahok, mabambannog ken maup-upayak idi. Isu nga inkararagmi ken lakayko a tulongannakami ni Jehova a mangpasimple iti biagmi. Nagbiitna a sinungbatan. Iti las-ud ti makabulan, adda nangitukon kaniak iti part-time a trabaho a panangisuro kadagiti baldado nga ubbing.” Ti Australiano a ni Steve a kontraktor iti panagatep binaliwanna ti trabahona tapno ad-adu ti tiempona iti pamiliana ken kadagiti naespirituan nga aktibidad. Kinuna ni baketna a Maureen: “Naragragsak itan ni lakayko ket kastakami met. Maay-ayatankami nga agiina! No simple ti panagbiagyo, agballigi ti pamiliayo.”

Ngem no naawananka iti trabaho ken dandanin maembargo ti balayyo, kasapulan ti dakkel a pammati tapno masurotmo ti balakad ni Jesus. Kaskasdi a no ipangpangrunam dagiti naespirituan a banag ken agtalekka iti Dios, kabaelam met ti agbiag iti simple ken balanse. Ti panangaramidmo iti dayta ti tumulong kenka a makagun-od iti “pudpudno a biag”—agnanayon a biag iti baro a lubong ti kinalinteg nga inkari ti Dios, a sadiay, amin a trabaho ket makaparagsak ken dinton barengbareng ti amin a panagbannog.—1 Timoteo 6:17-19; Isaias 65:21-23.

Kayatmo kadi a maammuan ti ad-adu pay maipapan iti daytoy a “pudpudno a biag” nga ikarkari ti Biblia? No wen, kontakem dagiti Saksi ni Jehova iti lugaryo wenno agsuratka iti maitutop nga adres iti panid 5 daytoy a magasin.

[Blurb iti panid 9]

Iti baro a lubong ti kinalinteg nga inkari ti Dios, makaparagsak ken makagunggonanto amin a trabaho

[Kahon iti panid 8]

ANIA TI MABALINMO A PAMASTREKAN ITI RUAR TI BALAY?

Adtoy ti sumagmamano a singasing a mabalin a makatulong iti dadduma a lugar bayat ti kaawan iti umdas a pagtrabahuan:

● Panagbantay iti sabali a balay (no pabantayan dagiti bumalay bayat ti panagbakasionda)

● Panagdalus: iti tawtawa (iti pagnegosiuan wenno balbalay); kadagiti tianggi; opisina; balay ken apartment kalpasan ti konstruksion, kalpasan ti uram, kalpasan ti iyaakar ti tattao; panagtagibalay (iti balay ti sabsabali)

● Panagtarimaan: kadagiti bisikleta; iti amin a kita ti alikamen

● Panagkarpintero: panangpapintas iti diding; panagaramid kadagiti kabinet, ruangan, beranda; panagpintura; panagalad; panagatep

● Panagtalon: panagmula; panagani, panagburas iti prutas

● Panangurnos ken panangaywan iti mulmula kadagiti: opisina, banko, lobby, shopping plaza, ken atrium

● Panangaywan iti sansanikua: dianitor, parabantay iti balay (no dadduma karaman ti libre a pagnaedan)

● Panagikabil ken panagdalus iti alpombra (carpet) wenno iti nasileng a kayo a suelo

● Panagitulod iti diario ken dadduma a serbisio ti panagiwaras: iti adbertismen, kadagiti pakaammo ti munisipio

● Panagyakar, panagipaabang iti espasio

● Panaghardin, panagarbas iti kayo, panangaywan iti hardin, panagbalsig

● Panagmaneho iti traysikel, jeep, school bus

● Panagretrato (kadagiti tattao ken okasion)

● Panaglako iti appan dagiti mangngalap

● Panagbinnayad babaen iti trabaho: ti serbisio kas elektrisian ket pagbayad iti panagpatarimaan iti lugan, panagdait kas bayad iti panagtubero

Para iti ad-adu nga impormasion, kitaem ti panid 3-11 iti Marso 8, 1996 a ruar ti Agriingkayo!

[Kahon/Ladawan iti panid 9]

DAGITI MABALINMO A PAMASTREKAN ITI UNEG TI BALAY

Ammuem dagiti kasapulan ti sangakaarrubaanyo. Agsaludsodka kadagiti kaarrubam. Agdisnudoka.

● Panagawir, panagaywan iti ubing

● Panaglako kadagiti immulam a nateng wenno sabsabong, mainum a pagpalamiis

● Panagdait iti kawes

● Panangaramid kadagiti ipatrabaho dagiti paktoria

● Panagbeyk ken panagisagana iti taraon

● Quilting, knitting, panaggansilio, panagdamili, panagaramid iti dadduma pay a produkto

● Panag-upholster

● Bookkeeping, panagmakinilia, panagkompiuter

● Panagsungbat iti telepono

● Panangpapintas iti buok kas iti panagpukis, panagkulot, kdpy.

● Panagpakasera

● Panangisobre kadagiti surat dagiti agpapaanunsio ken panangikabil iti adres kadagita

● Panangdalus ken panangpasileng kadagiti lugan (ipan dagiti kostumer ti luganda iti balayyo)

● Panangestimar ken panangipasiar kadagiti taraken

● Panagtarimaan iti kandado ken panagaramid iti tulbek

Palagip: Para iti kaaduan kadagiti trabaho a nadakamat iti ngato, mabalin a libre wenno bassit la ti bayadam no ipakaammom dagita babaen kadagiti shopping flyer iti ngudo ti lawas wenno iti pagipaskilan iti impormasion kadagiti tiendaan.