Nadisenio Kadi?

Ti Nakaskasdaaw nga Ulo ti Woodpecker

● No maitugtogka iti 80 agingga iti 100 a g-force (rukod ti puersa ti pannakaitupa), umdas daytan a mangdangran iti utekmo. Ngem ti tumatayab a woodpecker maanduranna ti agarup 1,200 a g-force bayat nga ab-abutanna ti puon ti kayo babaen ti sippitna. Kasano a maaramidanna dayta a di man la agsakit ti ulona wenno madangran ti utekna?

Usigem: Sigun kadagiti managsirarak, makaandur ti ulo ti woodpecker gapu iti uppat nga estrukturana:

1. Napigsa ngem nalap-it a sippit

2. Hyoid—estruktura a tulang ken nalap-it a tisyu a nangbalkut iti bangabanga

3. Kasla espongha a tulang iti bangabanga

4. Bassit nga espasio para iti pluido iti nagbaetan ti bangabanga ken utek

Tunggal maysa kadagita ti mangagsep iti pannakayegyeg isu a kabaelan ti woodpecker a tuktoken ti kayo iti 22 a daras kada segundo a di madangran ti utekna.

Gapu iti nadiskobre dagiti managsirarak maipapan iti ulo ti woodpecker, nakaaramidda iti kaha a makaandur iti agingga iti 60,000 a g-force. No naballigida, mabalin a makaaramiddanton iti nataltalged a kaha dagiti flight recorder ti eroplano (a makaandur laeng ita iti agarup 1,000 a g-force), ken dadduma pay. Sigun ken Kim Blackburn nga inheniero iti Cranfield University idiay United Kingdom, ti nadiskobre maipapan iti ulo ti woodpecker ket makaipaay iti “nakaskasdaaw a pagarigan no kasano a kabaelan a patauden ti nakaparsuaan dagiti komplikado unay nga estruktura tapno masolbar ti maipagarup a kasla imposible.”

Ania ti makunam? Naiparna la kadi ti ulo ti woodpecker a makaandur iti nakaro a pannakayegyeg? Wenno nadisenio dayta?

[Diagram iti panid 19]

(Para iti aktual a pannakaurnosna, kitaem ti publikasion)

[Picture Credit Line iti panid 19]