Ti komunikasion ket kas iti rangtay a mangtaginayon iti koneksionyo iti anakyo
PARA ITI NAGANNAK
5 Komunikasion
TI KAIPAPANANNA
Nasayaat ti komunikasion no sika ken ti anakmo ket agpada nga iyebkasyo ti kapanunotan ken riknayo.
NO APAY A NAPATEG
Narigat ti makikomunikar aglalo kadagiti tin-edyer. Idi ubing pay ti anakyo, ibagana ti amin kadakayo. Ngem ita ta tin-edyeren, saan unayen a makisarsarita kadakayo, ken saanyon nga ammo ti pampanunoten ken rikriknana. Kasla addakayon iti agsumbangir nga igid ti naglawa a karayan. Uray no kasla saan a kayat ti anakyo ti makisarita, dayta ti tiempo a kasapulanna unay a kasaritayo!
TI MABALINYO NGA ARAMIDEN
Makibagaykayo no kaano a kayat ti anakyo ti makisarita. Aramidenyo dayta uray no tengnga ti rabii ti kayatna a pannakisarita.
“Mabalin a kayatmo nga ibaga, ‘Apay nga itaka la a makisarita? Nagmalmalemta a nagkadua!’ Ngem ania ti maaramidam no kayat ti anakmo nga iyebkas ti riknana? Saan kadi a dayta ti kayat ti amin a nagannak?”—Lisa.
“Uray nagmayat koma ti maturog a nasapa, ti dadduma a kasayaatan a pannakisaritak kadagiti annakko a tin-edyer ket no limbesen ti alas dose.”—Herbert.
PRINSIPIO TI BIBLIA: “Itultuloy koma ti tunggal maysa a sapulen ti pagimbagan ti sabali, saan a ti bukodna a pagimbagan.”—1 Corinto 10:24.
Diyo ipalubos a masingakayo. Inamin ti maysa nga ama: “No dadduma, no kasarsaritak dagiti annakko, adda sabali a pampanunotek. Madlawda dayta!”
No mapaspasamak met dayta kadakayo gapu iti TV wenno aniaman a gadyet, iddepenyo dagita. Denggenyo a naimbag ti ibagbaga ti anakyo ken ipariknayo a napateg ti ibagbagana, uray bassit la a banag dayta para kadakayo.
“Ipasiguradotayo kadagiti annaktayo a napateg ti marikriknada. Ta no saan, ilimedda ti riknada ket agpatulongda iti sabali.”—Maranda.
“Saanka nga agpungtot uray no nalawag a kamali ti kapanunotan ti anakmo.”—Anthony.
PRINSIPIO TI BIBLIA: “Dumngegkayo a naimbag.”—Lucas 8:18.
Gundawayanyo dagiti di pormal a situasion. No dadduma, nalaklaka nga iyebkas dagiti annak ti riknada iti nagannakda no saan a sangonsango ti pannakisaritada.
“Gunggundawayanmi ti agsasarita no addakami iti luganmi. Nasaysayaat ti panagsasaritami no agaabaykami imbes nga agsasangokami.”—Nicole.
Ti tiempo ti pannangan ket nasayaat met a gundaway nga agsasarita.
“Bayat a mangrabrabiikami, agestoria ti tunggal maysa kadagiti nasayaat ken saan a nasayaat a napasamak iti agmalem. Gapu iti dayta, nadekketkami ken mariknami a saankami nga agmaymaysa a mangsango kadagiti problema.”—Robin.
PRINSIPIO TI BIBLIA: ‘Masapul nga alistotayo a dumngeg [ken] nainayad nga agsao.’—Santiago 1:19.