KRISIS ITI LUBONG

4 | Protektaram ti Namnamam

NO APAY NGA IMPORTANTE

Dagiti problema a resulta ti krisis iti lubong mabalin nga apektaranna ti bagi ken emosiontayo. Adu nga apektado kadagitoy a pasamak ti mangpampanunot nga awanen ti namnamada a sumayaat pay ti bambanag. Ania ti reaksionda?

Saan a kayat ti dadduma a panunoten ti mapasamak iti masanguanan.
Agbartek wenno agdroga ti dadduma tapno maitarayanda ti problemada.
Marikrikna ti dadduma nga awan ti serserbi ti biag isu nga ibagbagada, “Ania pay la koma ti rason nga agbiagak?”

Ti Masapul a Maammuam

Dadduma a problema a pakaipaspasanguam ket mabalin a temporario laeng ken baka sumayaatto met laeng a dimo mapupuotan.
Uray no saan a sumayaat ti situasionmo, adda dagiti maaramidam tapno makayam a sanguen dayta.
Ikarkari ti Biblia ti pudpudno a namnama—ti permanente a solusion kadagiti problematayo.

Ti Maaramidam Itan

Kuna ti Biblia: “Diyo pakadanagan ti problema iti sumaganad nga aldaw, ta adda bukod a problema ti tunggal aldaw. Ti laeng problema ita nga aldaw ti panunotenyo.”—Mateo 6:34.

Problemaem laeng ti agdama. Dimo koma pakadanagan unay ti posible a mapasamak inton bigat nga uray la saanmon a maaramid dagiti kasapulam nga aramiden ita.

Ti panagdanag kadagiti negatibo a bambanag nga ipagarupmo a mapasamak ket mangnayon laeng iti stress-mo ken mangpakapuy iti namnamam nga adda nasaysayaat a masakbayan.

KASANOM A SANGUEN?—Makatulong a Tip

AGPOKUS ITI POSITIBO

Kuna ti Biblia: “Dakes ti amin nga aldaw daydiay agrigrigat, ngem inaldaw nga agpiesta daydiay naragsak ti pusona.” (Proverbio 15:15) No negatibo ti panagpampanunotmo, baka saanmo a makita nga adda laeng gayam dita ti solusion dagiti problemam. Ngem no positiboka, makapanunotka kadagiti nasayaat nga aramidem iti situasionmo.

Saanka unay nga agbasa, agdengngeg, wenno agbuya iti damdamag.
Kada rabii, mangilistaka iti dua wenno tallo a banag a pagyamyamanam.
Mangaramidka iti listaan dagiti masapul nga aramidem, ken iramanmo laeng dagiti kayam nga aramiden iti agmalem. In-inutem a leppasen dagiti dadakkel a trabaho tapno mariknam nga adda maar-aramidam iti agmalem.

AGPATULONGKA

Kuna ti Biblia: “Ti mangisinsina iti bagina . . . laksidenna amin a praktikal a sirib.” (Proverbio 18:1) No addaka koma iti nauneg nga abut, saanka a makauli a siksika. Kasapulan nga adda tumulong a mangyaon kenka.

Agpatulongka kadagiti kapamiliam wenno gagayyemmo.
Mangkitaka met kadagiti mabalinmo a pangtulongan kadakuada. No tumultulongka iti dadduma, mayaw-awanmo dagiti problemam.
No kasla awanen ti namnamam ken mariknam nga awanen ti serserbi ti biag, baka nasaysayaat nga agpakonsultaka iti doktor. Mabalin a sintoma dayta ti sakit, kas iti depresion. Adu ti simmayaat ti riknada idi nagpadoktorda.a

a Saan a mangirekrekomenda ti Agriingkayo! iti aniaman a pamay-an ti panangagas.

Mangted ti Biblia iti Pudpudno a Namnama

Inkararag ti maysa a salmista idi un-unana iti Dios: “Ti saom ket lampara iti sakak, ken lawag iti pagnaak.” (Salmo 119:105) Kitaem no kasano a kasta ti Sao ti Dios, ti Biblia.

Iti nasipnget a rabii, makatulong ti lampara tapno makitatayo ti pagpagnaantayo. Kasta met, ti Biblia ket addaan kadagiti prinsipio a makatulong kadatayo nga agdesision kadagiti narigat a situasion.

Ti silaw ti manglawag iti dalantayo tapno makitatayo ti pagturturongantayo. Kasta met ti Biblia. Ipakitana nga adda nasaysayaat a namnama nga agur-uray kadatayo.

Ti Biblia ket nasantuan a libro a saan la a naglaon iti pakasaritaan ti tao sipud nangrugi ti lubong, no di ket mangted pay iti pudpudno a namnama. Sungbatanna dagitoy a saludsod:

Kasano?

No kasano a nangrugi ti rigat: Ibagbaga ti Biblia “a babaen ti maysa a tao, simrek ti basol iti lubong ken ti ipapatay babaen ti basol, isu a matay ti amin a tao ta nagbasolda amin.”—Roma 5:12.

Apay?

No apay a saan a kaya ti tao a solbaren dagiti problematayo: Ibagbaga ti Biblia a “saan a naikkan ti tao iti autoridad a mangiturong uray iti addangna.” (Jeremias 10:23) Agpayso dayta no kitaem dagiti paspasamak iti lubong.

Ania?

No ania ti aramiden ti Dios tapno masolusionanna dagiti problema: Ibagbaga ti Biblia a “punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot.”—Apocalipsis 21:4.