Ti Umuna a Bullalayaw

AMMOM kadi ti immuna a banag nga inaramid ni Noe idi isu ken ti pamiliana rimmuarda iti daong? Nagdatonda iti Dios. Makitkitam aya a mangar-aramid iti daytoy iti ladawan? Nagdaton ni Noe ti an-animal tapno agyaman iti Dios gaput’ panangisalakanna iti pamiliana manipud layus.

Ti kunam naragsakan ngata ni Jehova iti sagutna? Wen. Gapuna inkarina ken Noe a dinanton daddadaelen ti lubong manen iti layus.

Idi kuan nangrugi ni Noe ken ti pamiliana ti baro a biag iti ruar ti daong. Binendisionan ti Dios ida ken imbagana kadakuada: ‘Agpaadukay ti annak. Masapul nga umadu ti bilangyo agingga nga addanto tattao iti amin a daga.’

Ngem idi kuan, nagbuteng dagiti tattao di la ket ta addanto manen layus. Gapuna nangted ti Dios ti banag a mangipalagip kadagiti tattao ti karina a saannanton a laylayusen ti intero a daga. Ammom kadi no ania daytoy? Ti bullalayaw. Nakakitakan aya ti kasta? Adda kadi makitam ditoy retrato?

Inkari ti Dios: ‘Nikaanoman dinton madadael amin a tattao ken an-animal babaen iti layus. Ikabilko ti bullalayawko kadagiti ulep. Ket no agparang ti bullalayaw, makitakto ket malagipko ti karik.’

No makakitaka ti bullalayaw, aniat’ malagipmo? Wen, ti kari ti Dios a dinanton dadaelen ti lubong manen babaen iti layus.