Ti Dakes nga Ari Nagturay iti Egipto

DAGITI lallaki ditoy pilpilitenda nga agtrabaho dagiti tattao. Kitaem daydiay tao a mangbabaot iti maysa kadagiti trabahador! Dagiti trabahador ket isuda dagiti Israelitas. Ket dagiti lallaki a mangpilpilit kadakuada nga agtrabaho isu dagiti Egipcio. Dagiti Israelitas ket ad-adipen dagiti Egipcio. Kasano a naaramid daytoy?

Iti adu a tawtawen naggigian ti dakkel a pamilia ni Jacob a sitatalna idiay Egipto. Natan-ok a tao ni Jose sadiay, ken inaywananna ida. Ngem natayen ni Jose. Ket ti baro a Paraon, a dina kaykayat dagiti Israelitas, ti nagbalin nga ari iti Egipto.

Daytoy dakes a Paraon pinagbalinna nga adipen dagiti Israelitas. Pinilitna nga agtrabaho dagiti Israelitas ti nadagsen a mangbangon kadagiti siudad. Kaskasdi umad-adu ti bilang dagiti Israelitas. Ket nagamak dagiti Egipcio di la ket ta dagiti Israelitas agbalinda nga adu unay ken napigsa unay.

Ammom kadi ti inaramid ni Paraon? Imbagana kadagiti babbai a tumultulong kadagiti Israelita nga inna no aganakda: ‘Patayenyo amin nga ubing a lalaki a maiyanak.’ Ngem nasayaat dagitoy a babbai, ket saanda kayat a papatayen dagiti ubbing.

Gapuna imbilin ni Paraon iti amin a tattao: ‘Patayenyo dagiti Israelita nga ubbing a lallaki! Dagiti laeng ubbing a babbai ti agbiag.’ Di aya nagdakes a bilin dayta? Kitaentayo no kasano a naisalakan ti maysa nga ubing a lalaki.