Ti Simmaruno nga Innem a Didigra

Napan da Moises ken Aaron ken ni Faraon tapno ibagada ti mensahe ti Dios: ‘No saanmo a palubosan dagiti tattaok, mangibaonak kadagiti bingraw iti daga.’ Adu a bingraw ti simrek iti balbalay dagiti Egipcio, nabaknang man wenno marigrigat. Napunno ti daga kadagiti bingraw. Ngem awan bingraw iti Gosen, ti lugar a paggigianan dagiti Israelita. Nangrugi iti daytoy a maikapat a didigra, dagiti laengen Egipcio ti naapektaran. Imbaga ni Faraon: ‘Ipakaasiyo ken Jehova nga ikkatenna dagiti bingraw ket palubosankayto a pumanaw.’ Ngem idi pinapanaw ni Jehova dagiti bingraw, nagbaliw ti panunot ni Faraon. Makasursuro pay ngata ni Faraon?

Kinuna ni Jehova: ‘No saan a palubosan ni Faraon dagiti tattaok, agsakit ken matay dagiti animal dagiti Egipcio.’ Iti simmaruno nga aldaw, natay dagiti animal dagiti Egipcio ngem saan a natay dagiti animal dagiti Israelita. Ngem natangken ti ulo ni Faraon ket saanna latta a pinalubosan dagiti Israelita.

Kalpasanna, imbaga ni Jehova ken Moises nga agsubli ken Faraon ket mangipuruak iti dapo iti angin. Nagbalin a tapok dagiti dapo ket nagwaras iti angin ken nagdisso kadagiti Egipcio. Gapu iti dayta, nagtubo dagiti naut-ot a letteg, wenno busali, kadagiti Egipcio ken kadagiti animalda. Ngem saan latta a pinalubosan ni Faraon dagiti Israelita.

Imbaon manen ni Jehova ni Moises ken Faraon tapno ibagana: ‘Saanmo latta kadi a palubosan dagiti tattaok? Inton bigat, agtudonto iti dadakkel a yelo iti daga.’ Kabigatanna, pinagtudo ni Jehova iti dadakkel a yelo ken apuy, ken pinaggurruodna. Dayta ti kakaruan a bagyo a napasamak iti Egipto. Naperdi amin a kayo ken mulmula iti talon, ngem awan naperdi idiay Gosen. Kinuna ni Faraon: ‘Ipakaasiyo ken Jehova a pasardengenna daytoy! Ket mabalinyonton ti pumanaw.’ Ngem idi nagsardengen dayta, nagbaliw ti panunot ni Faraon.

Kalpasanna, kinuna ni Moises: ‘Kanento dagiti dudon dagiti mula a saan a nadadael idi nagtudo iti dadakkel a yelo.’ Kinnan ti minilion a dudon dagiti nabatbati a kayo ken mula iti taltalon. Imbaga ni Faraon: ‘Ipakaasiyo ken Jehova a papanawenna dagiti dudon.’ Ngem idi pinapanawen ni Jehova dagiti dudon, saan latta a pinalubosan ni Faraon dagiti Israelita.

Imbaga ni Jehova ken Moises: ‘Iyunnatmo ti imam a nakaturong iti langit.’ Dagus a simmipnget ti langit. Iti tallo nga aldaw, awan a pulos ti makita dagiti Egipcio, ngem nalawag kadagiti balay dagiti Israelita.

Imbaga ni Faraon ken Moises: ‘Mabalinyon ti pumanaw ngem ibatiyo dagiti animalyo.’ Kinuna ni Moises: ‘Masapul nga itugotmi dagiti animalmi tapno adda idatonmi iti Diosmi.’ Permi ti unget ni Faraon. Imbugkawna: ‘Pumanawka! No agpakitaka pay, patayenka.’