Ti Umuna a Tallo a Didigra

Inadipen dagiti Egipcio dagiti Israelita ket pinagtrabahoda ida iti nadagsen. Imbaon ni Jehova da Moises ken Aaron tapno ibagada ken Faraon: ‘Palubosam dagiti tattaok, tapno makapagdayawda kaniak iti let-ang.’ Sitatangsit nga insungbat ni Faraon: ‘Awan bibiangko iti imbaga ni Jehova. Diak palubosan dagiti Israelita.’ Kalpasanna, lallalo pay a pinadagsen ni Faraon ti trabahoda. Kayat ni Jehova a suruan ni Faraon iti leksion. Ammom no kasano? Inyegna ti Sangapulo a Didigra iti Egipto. Imbaga ni Jehova ken Moises: ‘Saannak a dengdenggen ni Faraon. Inton bigat, addanto isuna iti Karayan Nilo. Mapanka kenkuana ket ibagam a gapu ta dina palubosan dagiti tattaok, agbalinto a dara ti danum ti Karayan Nilo.’ Nagtulnog ni Moises ket napan ken Faraon. Agbuybuya ni Faraon idi inyablat ni Aaron ti bastonna iti karayan ket nagbalin a dara ti danum. Bimmangsit ti karayan, natay dagiti lames, ken saanen a mainum ti danum iti karayan. Ngem saan latta a pinalubosan ni Faraon dagiti Israelita.

Kalpasan ti pito nga aldaw, imbaon manen ni Jehova ni Moises ken Faraon tapno ibagana: ‘No saanmo a palubosan dagiti tattaok, mapunnonto ti Egipto kadagiti tukak.’ Inyunnat ni Aaron ti bastonna, ket nangrugi a mapunno ti Egipto iti tukak. Adda tukak kadagiti balay, pagiddaan, ken kadagiti malukong. Adda tukak iti amin a lugar! Imbaga ni Faraon nga agpakaasi ni Moises ken Jehova a pasardengenna ti didigra. Inkari ni Faraon a palubosannan dagiti Israelita. Pinasardeng ngarud ni Jehova ti didigra, ket binunton a natay a tukak ti naurnong dagiti Egipcio. Bimmangsit ti Egipto. Ngem saan latta a pinalubosan ni Faraon dagiti Israelita.

Kalpasanna, kinuna ni Jehova ken Moises: ‘Masapul nga ibaut ni Aaron ti bastonna iti daga tapno agbalin ti tapok a sepsep, wenno babassit nga insekto nga agkagat.’ Bigla a nagadda dagiti sepsep iti amin a lugar. Dadduma kadagiti adipen ni Faraon ti nangibaga kenkuana: ‘Naggapu daytoy a didigra iti Dios.’ Ngem saan latta a kayat ni Faraon a palubosan dagiti Israelita.