Natutured a Manangiwaragawag iti Sao ti Dios

Inaramidda ti Pagayatan ni Jehova da Moises ken Aaron

PANUNOTENYO ti pasamak: Nakatakder ti walopulot’ tawenna a ni Moises ken ti kabsatna, ni Aaron, iti sanguanan ti kabibilgan a tao iti daga​—ni Faraon ti Egipto. Kadagiti Egipcio, ad-adda pay ngem iti pannakabagi dagiti didiosen daytoy a tao. Mamatida nga isut’ maysa a dios a mismo. Minatmatanda kas ti mismo nga inkarnasion ni Horus, maysa a sinan kalí ti ulona a didiosen. Kadua da Isis ken Osiris, buklen da Horus ti kangrunaan a trinidad kadagiti didiosen ken diosa ti Egipto.

Awan duadua a madlaw ti asinoman nga umasideg ken Faraon ti mangipangpangta a sinan-ulo ti kobra a nakatungraraw iti tengnga ti koronana. Naipagarup a makaipugso iti apuy ken pangdadael daytoy nga uleg iti asinoman a kabusor ni Faraon. Ita, umasideg da Moises ken Aaron iti sanguanan daytoy dios-ari nga addaanda iti kalikagum nga awan pay kaaspingna​—a palubosanna dagiti naadipen nga Israelita a pumanaw tapno mangangayda iti maysa a rambak iti Diosda, a ni Jehova.​—Exodo 5:1.

Impakpakaunan ni Jehova nga agbalin a nasubeg ti puso ni Faraon. Gapuna, saan a nasdaaw da Moises ken Aaron iti natangsit a sungbatna: “Asino ni Jehova nga imdengak koma ti timekna tapno bay-ak a pumanaw ti Israel? Diak am-ammo ni Jehova, ket maysa pay diakto palubosan ti Israel.” (Exodo 4:21; 5:2) Iti kasta, naisagana ti parang maipaay iti maysa a dramatiko a dangadang. Iti simmaganad a dupag, insango da Moises ken Aaron ti makapasidduker a pammaneknek ken ni Faraon nga isuda ti pannakabagi ti pudno ken mannakabalin-amin a Dios.

Napasamak ti Maysa a Milagro

Kas ti imbilin ni Jehova, nangaramid ni Aaron iti maysa a milagro a nangpaneknek iti kinanaindaklan ni Jehova iti amin a didiosen ti Egipto. Impuruakna ti sarukodna iti sanguanan ni Faraon, ket dagus a nagbalin dayta a dakkel nga uleg! Nariribukan iti daytoy a milagro, pinaayaban ni Faraon dagiti papadina a managsalamangka.a Iti tulong dagiti pannakabalin ti sairo, nakaaramid dagitoy a lallaki ti kasta met a banag kadagiti sarukodda.

No naragsakan man ni Faraon ken dagiti papadina, apagbiit laeng dayta. Iladawanyo dagiti rupada idi alun-onen ti uleg ni Aaron dagiti ulegda, a sinaggaysa! Nakita ti amin nga adda sadiay a saan a pumada dagiti didiosen ti Egipcio iti pudno a Dios, ni Jehova.​—Exodo 7:8-13.

Nupay kasta, uray kalpasan daytoy, nagtalinaed a nasubeg ti puso ni Faraon. Idi laeng kalpasan nga inyeg ti Dios ti sangapulo a mangdadael a didigra, wenno saplit, iti Egipto nga imbaga ni Faraon kamaudiananna kada Moises ken Aaron: “Tumakderkayo, pumanawkayo iti tengnga dagiti tattaok, dakayo ken kasta met dagiti annak ti Israel, ket inkayo agserbi ken Jehova, a kas kinunayo.”​—Exodo 12:31.

Dagiti Leksion Para Kadatayo

Aniat’ nakatulong kada Moises ken Aaron nga umasideg iti mannakabalin a Faraon ti Egipto? Idi damo, inyebkas ni Moises ti kinaawan-talek iti kabaelanna, a kunkunana a ‘naullayat nga agsao ken natabbed ti dilana.” Uray kalpasan a naipatalged ti suporta ni Jehova, impakaasina: “Ibaonmo, pangngaasim, babaen iti ima daydiay ibaonmonto.” Iti sabali a pannao, nagpakpakaasi ni Moises a mangibaon ti Dios iti sabali. (Exodo 4:10, 13) Nupay kasta, inaramat ni Jehova ni naemma a Moises, nga impaayanna iti sirib ken bileg a kasapulan tapno maitungpal ti annongenna.​—Numeros 12:3.

Itatta, itungtungpal dagiti adipen ni Jehova a Dios ken ni Jesu-Kristo ti bilin a “mangaramid kadagiti adalan a tattao iti isuamin a nasnasion.” (Mateo 28:19, 20) Tapno maaramid ti pasettayo iti panangitungpal iti daytoy a bilin, rumbeng nga usarentayo iti kasasayaatan dagiti Nainkasuratan a pannakaammo ken ti aniaman a kabaelan a mabalin nga adda kadatayo. (1 Timoteo 4:13-16) Imbes nga ipamaysa ti atensiontayo kadagiti pagkurkurangantayo, awatentayo a buyogen ti pammati ti aniaman nga annongen nga impaay ti Dios kadatayo. Mabalin nga aramidennatayo a kualipikado ken papigsaennatayo a mangaramid iti pagayatanna.​—2 Corinto 3:5, 6; Filipos 4:13.

Yantangay naipasango idi ni Moises iti ibubusor ti tao ken sairo, awan duadua a kasapulanna ti tulong nga ad-adda ngem ti maipaay ti tao. Gapuna, impatalged kenkuana ni Jehova: “Kitaem ta binalinka a kas Dios ken ni Faraon.” (Exodo 7:1) Wen, naaddaan ni Moises iti nadiosan a suporta ken autoridad. Buyogen ti espiritu ni Jehova kenkuana, awan panggapuan ni Moises tapno agbuteng ken ni Faraon wenno kadagiti natangsit nga agtuturay a manangsuportana.

Kasapulan met nga agpannuraytayo iti nasantuan nga espiritu, wenno aktibo a puersa ni Jehova, tapno maitungpal ti ministeriotayo. (Juan 14:26; 15:26, 27) Buyogen ti nadiosan a suporta, maibagatay ti sasao ni David, a nangikanta: “Iti Dios insaadko ti panagtalekko. Diakto mapabuteng. Ania ti maaramid ti tao kaniak?”​—Salmo 56:11.

Iti kinamanangngaasina, saan a binaybay-an ni Jehova ni Moises iti annongenna. Imbes ketdi, kinuna ti Dios: “Ni kabsatmo nga Aaron isunto ti mammadtom. Sika​—sawemto amin dagiti ibilinko kenka; ket ni Aaron a kabsatmo ti mangibaganto ken ni Faraon.” (Exodo 7:1, 2) Anian a kinamanagayat ni Jehova nga agtignay iti las-ud ti beddeng ti nainkalintegan a maaramidan ni Moises!

Ipapaay kadatayo ti Dios ti pannakitimpuyog dagiti pada a Kristiano nga umawat iti karit a panagbalin a Saksi ni Jehova, ti Kangatuan. (1 Pedro 5:9) Gapuna, iti laksid dagiti tubeng a maipasango kadatayo, tuladentay da Moises ken Aaron​—natutured a manangiwaragawag iti sao ti Dios.

[Footnote]

[Ladawan iti panid 25]

Situtured da Moises ken Aaron a nagbalin a pannakabagi ni Jehova iti sanguanan ni Faraon