Ni Moises ken Aaron Nagparangda ken Paraon

IDI nagsubli ni Moises idiay Egipto, imbagana ken Aaron a kabsatna dagiti milagro. Idi impakita da Moises ken Aaron kadagiti Israelitas dagitoy a milagro, namatida amin a ni Jehova adda kadakuada.

Ket nagparang da Moises ken Aaron ken ni Paraon. Imbagada a kayat ni Jehova a pumanaw dagiti Israelitas iti Egipto iti tallo nga aldaw nga agdayaw ken Jehova idiay let-ang. Ngem kuna ni Paraon: ‘Diak mamati ken Jehova. Ken diak palubosan ti Israel.’

Pinilit ni Paraon dagiti Israelitas nga agtrabaho ti nadagsen ta kayatda ti aginana nga agserbi ken Jehova. Pinabasol dagiti Israelitas ni Moises iti daytoy ket nagliday ni Moises. Ngem kuna ni Jehova kenkuana: ‘Aramidek a palubosan ni Paraon ti ilik.’

Nagparang manen da Moises ken Aaron ken ni Paraon. Iti daytoy nangaramidda ti milagro. Impuruak ni Aaron ti sarukodna, ket nagbalin a dakkel nga uleg. Ngem ti tattao a mamasirib ni Paraon impuruakda met ti sarukodda, ket nagparang met ti ul-uleg. Ngem adtoy! Ti uleg ni Aaron alun-onenna ti dadduma nga uleg. Kaskasdi madi palubosan ni Paraon dagiti Israelitas.

Gapuna leksionan ni Jehova ni Paraon. Ammom kadi ti inaramidna? Nangyeg ti 10 a saplit, wenno dadakkel a rigat, iti Egipto.

Kalpasan adu a saplit, kuna ni Paraon: ‘Isardengyon ket ibuloskon ti Israel.’ Ngem idi nagsardeng ti saplit, binaliwanna ti panunotna. Kalpasan ti maika-10 a saplit, pinalubosanen ni Paraon dagiti Israelitas.

Ammom kadi ti tunggal maysa kadagiti 10 a saplit? Ukagem ti panid ket adalentay ida.