Ti Sangalubongan nga Organisasion ken Trabahoda
ADDA sumagmamano a sistema ti komunikasion a maus-usar iti panangiwanwan iti trabaho a panangasaba a maar-aramid iti nasurok a 230 a pagilian. Ti sangalubongan a pannakaiwanwan ket aggapu iti Bagi a Manarawidwid nga adda iti sangalubongan a hedkuarter idiay Brooklyn, New York. Kada tawen, mangibaon ti Bagi a Manarawidwid kadagiti pannakabagi iti nadumaduma a lugar iti intero a lubong tapno makiuman kadagiti pannakabagi ti sanga nga opisina kadagita a lugar. Kadagiti sanga nga opisina, adda dagiti Branch Committee nga addaan iti tallo agingga pito a miembro a mangimaton iti trabaho iti pagilian a masakupanda. Dadduma kadagiti sanga nga opisina ti addaan kadagiti pagimprentaan, a ti dadduma ket agus-usar kadagiti napapartak a rotary press. Ti pagilian wenno lugar a serserbian ti kada sanga nga opisina ket nabingbingay kadagiti distrito, ket dagiti distrito, nabingbingayda met kadagiti sirkito. Adda agarup 20 a kongregasion iti kada sirkito. Agsasaruno a bisitaen ti manangaywan iti distrito dagiti sirkito a masakupan ti distritona. Iti makatawen, mamindua nga agasamblea ti tunggal sirkito. Adda met manangaywan iti sirkito, ket mamindua a bisitaenna ti kada kongregasion iti sirkitona iti las-ud ti makatawen. Tulonganna dagiti Saksi a mangorganisar ken mangitungpal iti trabaho a panangasaba iti teritoria a naituding iti kongregasion.
Ti lokal a kongregasion ken ti Kingdom Hall ti sentro a pakaorganisaran ti pannakaiwaragawag ti naimbag a damag iti komunidadyo. Mabingaybingay iti babassit a teritoria ken mayaramidan iti mapa ti lugar a masakupan ti kada kongregasion. Dagitoy ket maituding kadagiti indibidual a Saksi a mangikagumaan a makisarita kadagiti tattao iti tunggal pagtaengan nga adda sadiay. Sumagmamano wenno agarup 200 a Saksi ti mangbukel iti kada kongregasion, nga adda dagiti natudingan a panglakayen a mangaywan kadagiti nadumaduma nga annongen. Napateg ti tunggal agibumbunannag iti naimbag a damag iti organisasion dagiti Saksi ni Jehova. Personal a makipaset iti trabaho a panangiwaragawag iti Pagarian ti Dios kadagiti sabsabali ti tunggal maysa kadagiti Saksi, agserserbi man iti sangalubongan a hedkuarter, kadagiti sanga nga opisina, wenno kadagiti kongregasion.
Kamaudiananna, maipatulod iti sangalubongan a hedkuarter dagiti report maipapan iti nagapuanan iti daytoy a trabaho, ket maaramid ken maipablaak ti tinawen a Yearbook. Kasta met, maipablaak ti maysa a tsart kada tawen iti isyu Ti Pagwanawanan nga Enero 1. Dagitoy dua a publikasion ket detalyado nga ireportda ti nagapuanan iti kada tawen maipapan iti panangsaksi ken ni Jehova ken iti Pagarianna iti sidong ni Kristo Jesus. Kadagiti kallabes a tawen, agarup 14,000,000 a Saksi ken interesado a tattao ti timmabuno iti tinawen a Panglaglagip iti ipapatay ni Jesus. Iti makatawen, busbosen dagiti Saksi ni Jehova ti nasurok a 1,000,000,000 nga oras iti panangiwaragawag iti naimbag a damag, ket nasurok a 300,000 a kabbaro ti mabautisaran. Agdagup iti ginasut a milion a kopia dagiti maipaima a literatura.