AKSIDENTE, DI INGGAGARA

Ti di mapakpakadaan a paspasamak a gapuanan ti kinaignorante, kinaawan-annad, wenno di maliklikan a paspasamak ken mamataud iti pukaw wenno pakadangran ket gagangay a maaw-awagan aksidente. Ti Hebreo a sao nga ʼa·sohnʹ nabatad a literal a kaipapananna ti “panangagas” ken maus-usar a kas nalaglag-an a termino a maisukat iti “makapapatay nga aksidente.” (Idiligyo ti Ge 42:4, Rbi8 ftn.) Ti Hebreo a miq·rehʹ, a naadaw iti sao a kaipapananna ti “masabet; mapagteng” (Ge 44:29; De 25:18), ket saan laeng a naipatarus nga “aksidente” (1Sm 6:9) no di pay ket “pasamaken” (Ec 2:14, 15; 3:19) ken “naiparna.”​—Ru 2:3.

Nagbuteng ni Jacob amangan no adda makapapatay nga aksidente a mapagteng iti dungdungnguenna nga anak a ni Benjamin no mapalubosan a mapan idiay Egipto a kumuyog kadagiti kakabsatna. (Ge 42:4, 38) Insubli dagiti Filisteo ti lakasa ni Jehova tapno paneknekanda no ti saplit dagiti busigit a sinagabada pudno a naggapu ken Jehova wenno maysa laeng nga “aksidente.” (1Sm 6:9) Binigbig ni Solomon a ti asinoman mabalin nga agbalin a biktima ti di mapakpakadaan a pasamak.​—Ec 9:11.

Ti Mosaiko a Linteg pinagdumana ti aksidente a makapapatay ken ti aksidente a saan a makapapatay. (Ex 21:22-25) Pinaglasinna met ti inggagara ken di inggagara a panangpapatay. Maipaay iti inggagara a panangpatay, inkapilitan ti kadagsenan a dusa; maipaay kadagidiay nakabasol iti di inggagara a panangpapatay iti padada a tao, naipasdek dagiti siudad a pagkamangan. (Nu 35:11-25, 31; kitaenyo ti SIUDAD A PAGKAMANGAN.) Ti linteg nagaplikar agpapada iti katutubo nga Israelita ken ganggannaet nga agnanaed, ket nayetnag dagiti pammilin maipaay kadagiti kasapulan a sakripisio a pangabbong kadagiti di inggagara wenno di inranta a basol.​—Le 4:1-35; 5:14-19; Nu 15:22-29.