ADULLAM
Maysa a siudad ti Juda iti nadam-eg ken nababa a lugar wenno Sefela, iti agarup nagtengngaan ti Betlehem ken Laquis. (Jos 15:35) Maikunkuna nga isu ti Tell esh-Sheikh Madhkur (Horvat ʽAdullam), agarup 26 km (16 mi) iti laud nga abagatan-a-laud ti Jerusalem. Ti orihinal a nagan agparang a nataginayon iti nagan ti kabangibang a rebrebba ti ʽId el-Ma (Miyeh). Nagsayaat a lugar ti ayan ti Adullam agsipud ta matannawaganna ti Wadi es-Sur ken ti sungadan manipud iti dayta a paset ti Sefela agingga iti uneg ti Juda. Kangrunaanna a pagaammo dayta gapu iti “rukib ti Adullam,” a nagkamangan ni David manipud ken Ari Saul. Adda nakaad-adu a rukib nga apug a bato iti daytoy a lugar.—2Sm 23:13.
Nabatad a ti Adullam ket maysa a kadaanan a siudad. Ti umuna a pannakadakamatna iti Biblia ket mainaig ken Hira nga “Adullamita,” a nagbalin a kadua ni Juda sakbay a ti pamilia ni Jacob immakar idiay Egipto. (Ge 38:1, 2, 12, 20) Idi tiempo ti iraraut ni Josue agarup tallo a siglo kalpasanna, maysa ti Adullam kadagiti 31 a nanumo a pagarian a pinarmekna. (Jos 11:1-15; 12:15) Kalpasan dayta, ti Adullam naituding iti Juda agraman ti dadduma pay a siudad iti Sefela.—Jos 15:33-35.
Kas maysa a pugante manipud ken Ari Saul, nagtalaw ni David manipud iti Filisteo nga ari a ni Aquis ti Gat ket simmang-at idiay Adullam iti maysa a rukib, a sadiay a kimmadua kenkuana ti agarup 400 a lallaki idi agangay. (1Sm 22:1-5) Ti Adullam ket agarup 19 km (12 mi) iti laud nga abagatan-a-laud ti Betlehem, mabalin a pagaammon ni David ti lugar sipud idi agpaspastor pay laeng. Yantangay narigat a madanon daytoy a lugar, napili dayta kas salindeg ni David. Kadagiti naud-udi a tiempo, bayat ti panagturay ni David, nagkampo sadiay iti pannakigubatna kadagiti Filisteo. Manipud iti daytoy a disso, ti tallo a mannakigubat simmarakusokda iti Betlehem tapno makasakdoda manipud iti pagurnongan ti danum nga adda sadiay, ngem idi agangay nagkedked ni David nga uminom iti dayta yantangay irepresentarna ti darada a nairisgo iti panangalada iti dayta.—1Cr 11:15-19; 12:16; 2Sm 5:17, 18.
Ti Adullam ket maysa kadagiti siudad nga adda iti intar ti 15 a sarikedked a siudad a pinatibker ni Ari Rehoboam ti Juda. (2Cr 11:5-12) Daytoy nga intar, a nairanta a mangsalaknib iti laud ken abagatan, ket pinarmek dagiti buyot ni Senaquerib bayat ti panagturay ni Ezekias (732 K.K.P.). (2Ar 18:13) Nadakamat ti Adullam idi kaaldawan ni Nehemias kas maysa kadagiti siudad a nagyanan manen dagiti nagsubli a Judio manipud pannakaidestieroda idiay Babilonia.—Ne 11:30.