COLOSAS
[mabalin a, Nagdakkelan].
Maysa a siudad ti makin-abagatan a laud nga Asia Menor. Idi kaaldawan ni apostol Pablo, adda ti Colosas iti Asia a probinsia ti Roma, nupay paset idi dayta ti kadaanan a rehion ti Frigia. Iti agdama, saanen a mapagnanaedan daytoy a lugar. Adda dayta iti asideg ti makinngato nga ungto ti ginget ti Karayan Lycus, agarup 18 km (11 mi) iti daya nga abagatan-a-daya ti Laodicea (iti asideg ti moderno a Denizli). Ti ginget ti Karayan Lycus ket akikid iti rehion ti Colosas, nga addaan dadakkel a rangkis iti agsumbangir a sikiganna, ngem lumawa bayat nga agturong iti amianan a laud ken iti pagsabtan ti Lycus ken Karayan Maeander (Menderes). Iti daytoy a ginget a lumasat ti kangrunaan a dalan manipud Efeso ken iti Kosta ti Aegeano nga agturong iti daya agingga iti Eufrates. Maysa a dalan ti simmina sadiay nga agturong iti Sardis ken Pergamo iti amianan a laud. Nupay kasta, bayat ti panawen dagiti Romano, nabaliwan ti sistema ti dalan, ket nagbalinen a napatpateg ti Laodicea ken ti kabangibang a Hierapolis ngem iti Colosas. (Col 4:13) Nupay kasta, nagtultuloy a nalatak ti Colosas kas maysa a sentro ti tela, a nagdindinamag gapu iti produktona a napino a delana (naawagan colossinus) a nagpaiduma ti marisna. Nagsaad dayta iti igid ti langalang a kapanagan, a pakaipapaaraban dagiti arban ti karnero. Agarup 5 km (3 mi) iti abagatan, masarakan ti Honaz Dagi (Bty. Cadmus) nga addaan kangato a 2,750 m (9,020 pie), a dagiti niebena ti mangabasto iti dandanum kadagiti waig a lumasat iti Colosas.
Sumagmamano a taga Frigia ti adda idiay Jerusalem idi aldaw ti Pentecostes, 33 K.P., a nalabit dadduma kadakuada ti naggapu idiay Colosas. (Ara 2:10) Nupay adda ti Colosas iti kangrunaan a ruta nga agpadaya ken agpalaud, patien ti kaaduan nga eskolar a dimmalan ni Pablo iti naam-amianan a ruta iti maikatlo a panagdaliasatna kas misionero, iti kasta nakapan idiay Efeso babaen ti panagdaliasatna iti takdang. (Ara 18:22, 23; 19:1) Ipasimudaag ti suratna kadagiti taga Colosas a saan pay a nakapan idiay Colosas. Ti kongregasion sadiay ket bunga ti trabaho ni Epafras, a dineskribir ni Pablo kas mangibagbagi kenkuana ken kadagiti katrabahuanna babaen ti simamatalek a panagserbina kadagiti manamati idiay Colosas. (Col 1:7, 8; 2:1; 4:12) Nupay kasta, am-ammo ni Pablo ti sumagmamano a Kristiano idiay Colosas. Innagananna da Onesimo, Arquipo, Filemon, ken ni Apia.—Col 4:9, 17; Flm 1, 2, 10-12.
Mairaman iti orihinal a Frigiano a populasion ti Colosas, adda met ti sumagmamano a grupo dagiti Griego ken Judio. (Idiligyo ti Col 3:11.) Panatiko unay dagiti nagkauna a taga Frigia no maipapan iti espiritismo; naigamer dagiti Griego iti kasta unay a panagpattapatta ken iti napilosopiaan nga ar-argumento; ket intandudo met dagiti Judio ti Mosaiko a Linteg ken ti ikalkalikagumna a pagalagadan ti pannangan ken panangngilin iti sabbath. Amin dagitoy a kababalin ket naibinsabinsa iti pammagbaga ni Pablo iti kongregasion idiay Colosas.—Col 2:4, 8, 16, 18, 20-23.