DALMANUTA

Lugar a nagpaknian ni Jesus a naglugan iti barangay a kaduana dagiti adalanna kalpasan ti namilagruan a panangpakan iti 4,000 a lallaki iti asideg ti Baybay ti Galilea. (Mr 8:1-10) Nupay nadumaduma a disso ti naisingasing maipaay iti Dalmanuta, ti nagan saan a natukoy iti sabsabali pay a Naimbibliaan wenno di-Naimbibliaan a gubuayan, gapuna agtalinaed a saan nga ammo ti apag-isu nga ayanna. Pagarupen ti sumagmamano nga eskolar a ti Dalmanuta mabalin a panangbalbaliw nga inaramid ti eskriba, yantangay “Magadan” ti adda iti pumadpada a salaysay iti Mateo 15:29-39 ket iti sumagmamano a kadaanan a manuskrito ti salaysay ni Marcos, naaramat met ti “Magadan” wenno “Magdala” imbes a Dalmanuta. Nupay kasta, yantangay Dalmanuta ti adda kadagiti kasayaatan a Griego a manuskrito, imbes nga ibilang dayta a termino kas panagbiddut iti teksto, kasla nasaysayaat a taginayonen ti pannakabasa a Dalmanuta. Mabalin a ti Dalmanuta ket sabali laeng a nagan maipaay iti Magadan, wenno mabalin a maysa dayta a lugar iti asideg, a ti naganna nataginayon latta maipaay kadatayo iti Ebanghelio ni Marcos, nupay manmano unay a naaramat dayta a nagan wenno saan a sisasaknap a pagaammo.