DALMACIA

Maysa a lugar iti kabambantayan a rehion iti daya ti Baybay Adriatiko iti Peninsula ti Balkan. Naaramat daytoy a nagan kas pangtukoy iti kaabagatanan a paset ti Ilirico a probinsia ti Roma. Tawtawen kalpasan ti 9 K.P., idi nagbalin nga agwaywayas daytoy a probinsia, masansan a naar-aramat ti Dalmacia imbes nga Ilirico, ket idi agangay Dalmacia ti nayawag iti daytoy a baro a probinsia. Ni Tito, a kadua ni Pablo, nagturong idiay Dalmacia sakbay ti pannakapapatay ti apostol, naipagarup nga idi agarup 65 K.P. (2Ti 4:6-10) Iti bersikulo 10, a sadiay naikuna a ni Demas ‘binaybay-anna’ ni Pablo, nadakamat nga agturturong ni Tito idiay Dalmacia. Nupay kasta, nupay saan a nadakamat no ania ti espesipiko a panggep ni Tito sadiay, agparang a napan buyogen ti anamong ni Pablo. Idi asidegen nga agleppas ti maikatlo a panagdaliasat ni Pablo kas misionero agarup siam a tawen a nasaksakbay, kinunana a ti sirkitona naglayon agingga idiay Ilirico iti amianan. (Ro 15:19) Gapuna, patien ti sumagmamano nga eskolar nga iti daytoy a gundaway naibaon ni Tito iti dayta a rehion tapno urnosenna ti ar-aramid ti kongregasion ken agserbi sadiay kas misionero. No agpayso a kasta, ti akemna ket kas iti akemna idiay Creta. (Tit 1:5) Iti suratna ken Tito, kiniddaw ni Pablo a pumanaw ni Tito idiay Creta (Tit 3:12), ket agparang a mabalin a kimmadua ni Tito iti apostol agingga a naibaon idiay Dalmacia.