SCEVA

Maysa a Judio a “panguluen a padi.” Ti pito nga annakna ket karaman kadagiti ‘sumagmamano nga agsursursor a Judio a nangparuar kadagiti sairo.’ Iti maysa a gundaway iti siudad ti Efeso, pinadasda a paruaren ti maysa a sairo babaen ti panangikunada, “Sipapasnek a bilinenkayo babaen ken Jesus nga ikaskasaba ni Pablo.” Simmungbat ti nadangkes nga espiritu ket kinunana: “Ammok ni Jesus ket am-ammok ni Pablo; ngem siasinokayo?” Iti kasta, ti lalaki a nagunggan ti espiritu limmagto iti rabaw ti pito nga annak ni Sceva ket silalamolamo ken sugatsugat a pinaruarna ida iti balay. Nagbanag daytoy iti pannakaitan-ok ti nagan ti Apo ket natignay iti adu tapno ipangagda ti naimbag a damag nga ikaskasaba idi ni Pablo.​—Ara 19:13-20.

Awan ti nadakamat a Judio a padi nga agnagan Sceva iti dadduma pay a paset ti Kasuratan, malaksid no ti Sceva ket Latin a nagan ti padi a pagaammo iti sabali pay a Hebreo a nagan.