SAWI

[Heb., dai·yahʹ].

Ti Hebreo a nagan daytoy a tumatayab ket agparang iti listaan dagiti narugit a tumatayab iti Deuteronomio 14:13 ngem saan nga agparang iti umasping a listaan iti Levitico 11:14. Saan a nailanad ti dai·yahʹ iti Deuteronomio 14:13 kadagiti uppat a Hebreo a manuskrito, ken kasta met ti Samaritano a Pentateuch ken ti Griego a Septuagint. Patien ti dadduma nga eskolar a mabalin a panangatur dayta ti eskriba a sigud a naikabil iti marhin ngem naiserrek iti mismo a teksto idi agangay. Nupay kasta, ti pangadu a porma (dai·yohthʹ) ket agparang iti Isaias 34:15 a mangdesdeskribir kadagiti tumatayab a naguurnong kadagiti rebba ti Edom kalpasan a nalangalang.

Saan a masigurado no ania daytoy a tumatayab. Naikuna a daytoy a Hebreo a nagan ket naadaw iti berbo a kaipapananna ti “sumippayot” wenno “sumsumiag.” Ti “sawi” ket maitutop a patarus, yantangay termino dayta a tumukoy iti aniaman kadagiti nagduduma a tumatayab nga agsippayot, nupay nangnangruna a tumukoy iti nalabaga a gikgik (Milvus milvus). Kunaen ti kaaduan nga agdama nga eskolar a ti Hebreo a dai·yahʹ ket isu ti gikgik, yantangay adda sumagmamano a kita daytoy a tumatayab idiay Palestina.​—Kitaenyo ti GIKGIK.