TOBIAS

[Naimbag ni Jah].

1. Inapo ti sumagmamano a nagsubli a destiero a saanda a napatalgedan no pudno met laeng nga Israelita ti kapuonanda.​—Esd 2:1, 59, 60; Ne 7:61, 62.

2. Maysa a kabusor ni Nehemias. Ni Tobias ket “adipen,” nalabit maysa nga opisial ti ari ti Persia. (Ne 2:19) Agpada a ni Tobias ken ti anakna a ni Jehohanan ket nakaasawada iti babbai a Judio. Kabagian met ni Tobias ti nangato a padi a ni Eliasib. Gapuna, kabaelanna a pakapuyen ti autoridad ni Nehemias, agsipud ta ti sasaaden ni Tobias ket bigbigbigen ken raraemen ti adu a Judio.​—Ne 6:17-19; 13:4.

Idi dimteng ni Nehemias iti Jerusalem, saan a naragsakan ni Tobias ken dagiti kakaduana iti sumaysayaat a kasasaad ti Israel. (Ne 2:9, 10) Idi damo, inuy-uyaw ken rinabrabakda laeng dagiti Judio (Ne 2:19; 4:3), ngem idi rimmang-ay ti panangibangon manen iti pader, nakaungetda iti kasta unay. Nupay kasta, saan a nagballigi ti nadumaduma a gandatda a mangikisap kadagiti Judio (Ne 4:7-9, 11, 14, 15), ken ti panangallukoyda ken Nehemias a mangtabbaaw iti kinasagrado ti templo (Ne 6:1, 10-13). Uray idi nalpasen dagiti pader, ginandat ni Tobias a butbutngen ni Nehemias babaen iti panagsuratna kadagidiay mangsupsuporta kenkuana iti Jerusalem. (Ne 6:16-19) Gapuna, umiso laeng a kiddawen ni Nehemias a lagipen ni Jehova ti adu a nadangkes nga aramid ni Tobias ken dagiti kakaduana. (Ne 6:14) Iti maikadua nga isasangpet ni Nehemias manipud Babilonia, idi nakitana ti maysa a siled a panganan iti paraangan ti templo a nairanta nga agpaay ken Tobias, impalladawna iti ruar dagiti alikamen ni Tobias.​—Ne 13:4-9.