SANBALLAT

[manipud Akkadiano, kaipapananna ti “Nangisalakan ni Sin [ti dios-bulan]”].

Maysa a Horonita (kayatna a sawen, agtataeng iti Bet-horon wenno iti Horonaim) a nangbusor iti panagregget ni Nehemias a mangtarimaan iti pader ti Jerusalem. (Ne 2:10) Naipagarup nga isu ti Sanballat a nadakamat iti papiro a nasarakan idiay Elephantine, Egipto, a nangdakamat iti tao a kasta ti naganna kas gobernador ti Samaria ken ama da Delaias ken Selemias.

Inuyaw ni Sanballat, agraman da Tobias ken Gesem, dagiti Judio ken inakusaranna ida nga agrebrebelde iti ari ti Persia. (Ne 2:19; 4:1) Bayat ti idudur-as ti trabaho a panagtarimaan, isu ken ti dadduma a bumusbusor nagkukumplotda a makirupak iti Jerusalem. Ngem awan nagmamaayan ti aniaman a panagreggetda, ta nagkammatalek dagiti Judio ken Jehova ken nangisaadda kadagiti guardia. (Ne 4:7-9) Kalpasan a naserraan dagiti giwang iti pader ti Jerusalem, ni Sanballat ken ti kakaduana inulit-ulitda nga inallukoy ni Nehemias a rummuar koma iti siudad. Idi napaay daytoy, nangtangdan da Sanballat ken Tobias iti maysa a Judio a mangbutbuteng ken Nehemias tapno aglemmeng iti templo. Ngem saanda a nagballigi.​—Ne 6:1-14.

Idi agangay, idi nagsubli ni Nehemias kalpasan ti sumagmamano a tiempo a kaawanna idiay Jerusalem, naduktalanna a ti maysa nga apoko ti nangato a padi a ni Eliasib ket nagbalin a manugang ni Sanballat. Gapuna, pinagtalaw ni Nehemias daytoy nga apoko.​—Ne 13:6, 7, 28.