GESEM

[mabalin a, Bayakabak; Agbuyat a Tudo].

Maysa nga Arabiano a kadua da Sanballat ken Tobias a nangbusor ken Nehemias iti panangibangon manen iti pader ti Jerusalem. Dagitoy a kabusor ket immuna nga inuyawda ni Nehemias ken dagiti kaduana a trabahador. (Ne 2:19) Kalpasanna, nagkukumplotda ken insikatda a dangran ni Nehemias, ngem saanda a nagballigi. (Ne 6:1-4) Kamaudiananna, nangipatulod ni Sanballat iti surat ken Nehemias, a dinakamatna ti pammabasol ni Gesem a ganggandaten ni Nehemias ken dagiti Judio ti agrebelde ket agbalbalinen nga arida ni Nehemias. Saan met nagballigi dagiti kabusor iti daytoy. (Ne 6:5-7) Ti panangdakamat ni Sanballat ken Gesem iti surat ket kasla ipaspasimudaagna nga isu ket naimpluensia a tao. Mapaliiw a naipadpadamag a nasayaat ti relasion ti palasio ti Persia ken dagiti tribu nga Arabo kalpasan a rinaut ti Persia ti Egipto.

Ti nagan a Gasm a porma ti Gesem kas lenguahe ket nadakamat iti maysa a kitikit a nasarakan idiay kadaanan a Dedan, iti makin-amianan a paset ti Arabia. Ti nagan a Gesem ket agparang iti Aramaiko a kitikit ti maysa a pirak a malukong a nasarakan idiay Egipto. Kastoy ti mabasa iti teksto: “Daydiay inyeg ni Qainu bar Gesem, ari ti Qedar, kas daton ken [diosa a] han-ʼIlat.”​—Journal of Near Eastern Studies, 1956, Tomo XV, p. 2.