Ti Biblia​—Maysa a Libro a Rebbeng a Basaen

TI Biblia isu pay laeng ti kalalawaan ti pannakaiwarasna a libro iti intero a historia. Dayta ti kakaaduan nakaipatarusanna, kakaaduan pannakaadawna, ken ti kalalakayan a libro. Wen, ken isu met dayta ti libro a nakalasat iti karurungsotan unay nga ibubusor. Ngem di makaparagsak, mabalbalin a ti Biblia ket saan nga isu ti kasasaknapan pannakabasana a libro iti lubong.

Kaskasdi ti Biblia rebbeng a basaen. Usigenyo ti sumagmamano a kinapudno maipapan iti dayta.

Apay a Basaen a Regular Dayta?

Ti sao nga Ingles a “Bible” aggapu iti termino a Griego a bi·bliʹa, kayatna a sawen “babassit a libro” Ipalagip daytoy kadatayo a ti Biblia buklen dagiti sumagmamano a libro​—numan pay dadduma saanda a “babassit” unay! Dagitoy ti naisurat iti las-ud iti nasurok a sangaribo a tawen. Numan pay insurat dagiti tattao, daytat’ napaltiingan manipud nangatngato a Gubuayan. Uray pay ita, minilmilion dagiti umanamong nga “isuamin a Kasuratan impaltiing ti Dios ket isu met ti naimbag.” (2 Timoteo 3:16) Wen, dagitoy babassit a libro ti napno kadagiti kapanunotan ni Jehova. (Isaias 55:9) Di pagsiddaawan no apay a daytat’ nakaandor iti kasta kabayag!

Ti ugali a panagbasa ti Kasuratan a regular ti pudno a nakagunggona kadagiti naglabas a panawen. Dagiti ar-ari iti Israel mangaramidda ti personal nga insurat ti ima a kopia ti Linteg, nga isu itan ti napateg a paset ti Biblia. Dayta ti basaenda nga inaldaw kas kanayon a pammalagip iti panagserbida a sipapakumbaba ken panangannurotda iti bilbilin ti Dios. (Deuteronomio 17:18-20) Pudno unay, mabalintayo met ti makagun-od iti umas-asping a gunggona manipud regular a panagbasa ti Biblia.

Ket anian a nagpateg iti panagimdeng iti padto ti Biblia! Gapu iti personal a panagadal ni mammadto a Daniel kadagiti Kasuratan, nabalinanna a naawatan a ti nagpateg a padto iti libro ni Jeremias ket ngangnganin matungpal.​—Daniel 9:1, 2; Jeremias 29:10.

Idi a mangaskasaba ni Juan a Manangbautisar, “dagiti tattao ti agur-uray” iti Mesias. (Lucas 3:15) Isingasing daytoy nga adu kadakuada ti pamiliar iti padto maipapan ken Kristo a nailanad iti Kasuratan. Dagitoy ti makapainteres, yantangay dagiti libro ket saan idi a nalaka a magun-odan kadagidi nga al-aldaw. Dagiti kopia dagiti libro ti Biblia ti siaannad a maar-aramid babaen ti im-ima. Gapuna kasano nga agbalin a pamiliar dagiti tattao kadakuada?

Iti adu a kaso babaen iti panagbasa a publiko. Kuna ni adalan a Santiago: “Ta kadagiti sursuro ni Moises nanipud kadagidi kaputotan nga imun-una adda a maikaskasaba iti tunggal ili ket maibasada kadagiti sinagoga iti amin nga aldaw a panaginana.”​—Aramid 15:21.

Itan naglakan a maipaay kadagiti tattao a mangtagikua iti personal a kopia iti Biblia, ket adda met sumagmamano kadagiti “babassit a libro” ti magun-odan iti pagsasao ti 97 porsiento iti populasion ti lubong. Gapuna nakalkaldaang nga adu dagiti saan unay nga interesado a mangbirok no ania ti maikuna ti Biblia a maipaay kadakuada.

Maparegta a Mangbasa iti Dayta

Pinagbalin dagiti Saksi ni Jehova dayta a prominente a paset iti trabahoda a mangparegta iti regular a panagbasa iti Biblia. Kadagiti dadakkel a letra iti maysa kadagiti planta a pagimalditanda idiay sangalubongan a hedkuarterda sadi Brooklyn, Nueva York, agparang dagiti sao a “BASAENYO TI SAO TI DIOS TI SANTA BIBLIA NGA INALDAW”

Iti nasurok a 46,000 a kongregasion dagiti Saksi ni Jehova iti intero a lubong adda ti linawas a Teokratiko nga Eskuelaan ti Panagministro. Ti publiko a panagbasa iti napili a paset iti Biblia kada lawas ket paset dayta a kurso. Amin a tumabuno addaan iti linawas a naituding a basaen a sumagmamano a kapitulo iti Biblia idiay mismo a pagtaenganda ket dagidiay a makigidgiddan iti daytoy nga eskediol ti agangay mabasadanton ti intero a Biblia.

Maitunos daytoy iti Giya ti Teokratiko nga Eskuelaan ti Panagministro, maysa kadagiti libro a maus-usar iti daytoy a kurso. Kuna dayta: “Ti personal nga eskediolyo ket rebbeng nga iramanna ti oras a panagbasayo iti Biblia a mismo. Adda dakkel a pategna iti panangbasa iti dayta nga aglaylayon manipud puon agingga iti ngudo. . . . Nupay kasta, ti kalatyo iti panagbasa ket saan koma a basta panangleppas iti material, no di ket ti panangala iti pangkaaduan a panangmatmat iti dayta nga addaan iti panggep a pananglagip. Ikkanyo ti tiempo a mangdarepdep iti ibagbagana.”​—Panid 21.

Patien dagiti Saksi ni Jehova a dagiti moderno-aldaw a Kristiano rebbeng a mannakaammoda maipapan iti Biblia. Silalagip iti daytoy, isuda ti mangidadaulo iti maika-20 siglo a bersion iti publiko a panagbasa iti Biblia. Inrekordda ti panagbasa ti adu kadagiti “babassit a libro” ti Biblia kadagiti cassette tapes. Gapuna dagidiay patienda a dida maikkan ti tiempo ti agtugaw ken agbasa iti mabayag ket mabalinda itan a denggen dagiti recordings iti liblibro ti Biblia bayat nga agtartrabahoda iti aglawlaw ti balay, bayat nga agmammanehoda, wenno agar-aramid kadagiti sumagmamano pay a dadduma a bambanag. Siempre, dagiti tapes ti nagsayaat met a tulong no agtugawtayo a mangbasa ti Biblia. Makaparagsak a kapadasan dayta a denggen ti pannakaibasa dagiti Kasuratan bayat a sursurotentayo met dayta iti mismo a kopiatayo iti Biblia.

Wen, gundawayanyo ti naan-anay a naespirituan a pannakaiwanwan nga ipapaay dagiti publikasion dagiti pudno a Kristiano nga ipapaay ti Dios babaen “ti matalek ken naannad nga adipenna.” (Mateo 24:45-47) Ngem apay a dikay pagbalinen nga ugali met ti panagbasbasa ti Biblia nga inaldaw. Dagiti gunggona nga ipaayna dakkel kas makita iti bilin a nabayagen a naited iti maysa a pangulo nga Israelita a ni Josue: “Daytoy a libro ti linteg dinto umadayo ita ngiwatmo, no di ket iti aldaw ken iti rabii basaemto iti nababa a tuno, tapno tungpalem nga aramiden a kas maiyallubog iti isuamin nga adda a naisurat kenkuana; ket iti kasta parang-ayemto ti dalanmo ket iti kasta addanto naimbag a banagmo.”​—Josue 1:8.

[Ladawan iti panid 31]

Bayat ti adu a tawtawen, maysa a pagilasinan iti pagimprintaan iti Watchtower Society idiay 117 Adams Street, Brooklyn, New York, ti mangparparegta kadagiti lumablabas a mangbasa iti Nasantuan a Kasuratan