Panangipaduyakyak ti Naimbag a Damag Idiay Donegal
“DI NAKAPAPPAPATI!” “Nagmayat.” Dagidiay a panagdir-i ti nangngegan iti maysa a grupo dagiti 120 a tattao a naggaput’ Britania a napan idiay Donegal, maysa nga ili idiay umamianan a laud ti Ireland. Saan, saanda a turista nga agkomkomento maipapan ti nakitda. Isuda dagiti lallaki, babbai, ken ub-ubbing a napan sadiay iti kabukbukodanda a gastos tapno iranud ti namnamada a maipaay iti masanguanan kadagiti tattao idiay Makinlaud a Donegal.
Yantangay adda laeng 19 a Saksi ni Jehova kadagiti 120,000 nga umili iti Donegal, kaaduan a tattao iti dayta a lugar ti saan pay a nasarsarungkaran dagiti Saksi iti adu a tawtawen. Gapuna, daytoy dakkel a bunggoy dagiti sangaili iti situtulok a nangibaklay iti panangipaduyakyak ti naimbag a damag ti Pagarian ti Dios idiay igid ti nagpintasan nga igid ti baybay Atlantiko idiay Donegal.
Dakkel ti naaramidan dagiti lokal a Saksi iti panagsagana iti idadateng daytoy a grupo. Sumagmamano ti nagdaliasat iti ginasgasut a milias a nangimapa iti intero a lugar, nga inyatadayda iti panawen iti ordinance survey a mapa, ket inikkanda ti tunggal kalsada ti reperensia a numero a maipaay iti nalaka a panangsapul iti dayta iti kamaudianan. Kalpasanna, nabingaybingay ti teritoria kadagiti babassit a seksion a tunggal maysa addaan agarup 400 a balbalay. Kabayatanna idiay Britania, dagidiay mangaramid iti daytoy a panagbiahe okupadoda met iti kabukbukodanda a panagsagana—a sinigurado a ti paglugananda, dagiti pagdagusanda, ken ti nawadwad nga abasto dagiti literatura ti Biblia ket addada.
Ti aldaw a panagrubuat idiay Britania ket Sabado, Hunio 8, 1985. Kadagiti nasapa nga or-oras dayta a bigat, amin nagtataripnongda ket napanda idiay eropuerto. Di nagbayag nagdissodan idiay Belfast, Umamianan nga Ireland. Kalpasanna nagsisinada kadagiti sangapulo a minibuses nga isu ti paglugananda bayat ti sumaganad a dua a lawas. Kalpasan ti panagluganda a bimmallasiw iti Umamianan nga Ireland ken tinagiragsak ti kinamanagpadagos ti Kongregasion ti Londonderry, binallasiwda ti beddeng ket nagsisinada, a napan kadagiti antimano a naituding a luglugar kadagiti tallo a nagduduma a paset ti Donegal. Kasanot’ pannakaabrasada?
Panagrikna ti Lokal a Tattao
Dagiti umili ti Donegal nainggayeman ken managpadagosda, ket daytoy ti nangpalaka ti pannakisarsarita kadakuada. Sumagmamano kadakuada ti nagsalsaludsod, ket makaparagsak ti panangukag iti Biblia ken panangitudo a silalawag kadakuada kadagiti sungbat. Nagsayaat met ti pannakaibati kadagiti literatura ti Biblia kadagiti nagsalsaludsod tapno maparang-ayda pay ti pannakaawatda inton makapanawen dagiti sangailida.
Maysa a babai nga agtataeng iti naiputputong a balay iti tengnga ti kataltalonan ti nangawis iti dua a Saksi iti uneg ti balayna. Dagus nga immanamong a dagiti kasasaad ti lubong dumakes a dumakes ket inlawlawagna nga adu kadagiti tattao iti dayta a lugar ti mabalin nga agalikaka a mangawis kadagiti ganggannaet kadagiti pagtaenganda gapu iti iyaadu ti krimen iti dati a nagulimek ken nagtalna a suli ti Ireland. Adu a natataengan a tattao ti nakabkabilen ken nataktakawan babaen kadagiti barkada dagiti kriminal nga agdakdakiwas iti dayta a paset. Gapuna apay nga inawisna dagiti Saksi iti uneg ti balayna? Agsipud ta nakitana a “nakapudpudnoda.”
Idi nakita daytoy a babai ti pannakatungpal dagiti padto ni Jesus maipapan kadagiti maudi nga al-aldaw, rimmaniag ti matmatana, ket isu ti nakalua pay idi a nangngeganna ti maipapan iti namnama ti panagungar. (Mateo, kapitulo 24; Lucas, kapitulo 21) Ti lakayna natayen 20 años sakbayna. Siraragsak nga inawatna ti kopia ti libro a Mabalinyo ti Agbiag nga Agnanayon iti Paraiso a Daga ket inkalikagumna nga adda koma manen ti sumarungkar kenkuana.
Daytoy a kapadasan ti kanayon a naulit-ulit. Maysa nga agtutubo a lalaki ti nangiyebkas iti adu a panagduadua maipapan iti kaadda ti Dios. “No talaga nga adda ti Dios,” kinunana, “apay a kasta unayen ti kinadakes?” Impakita dagiti bumisbisita a Saksi nga iti mabiiten bumallaet ti Dios kadagiti ar-aramid ti tao ket solbarennanto ti adu a parparikut a mangrirriribuk iti daytoy nga agtutubo a lalaki. Indawatna a sumarungkarkam manen tapno maam-ammoda dagiti dadakkelna. Idi simmarungkar manen dagiti Saksi, nakaibatida ti kopia iti libro nga Agbiag nga Agnanayon tapno masapulan ti pamilia ti sungbat ti ad-adu pay kadagiti salsaludsodda.
Maysa nga agtutubo a babai ti maladingitan unay, ta ti uppat ti tawenna nga anakna a lalaki ti natay sumagmamano a lawas sakbay daytoy. Isut’ naparegta iti kasta unay babaen iti impormasion a naiparang iti libro nga Agbiag nga Agnanayon, nangnangruna babaen ti panangilawlawagna iti namnama ti panagungar. Gapu iti ladingit a pinataud ti ipapatay ti anakna, nagduaduaanna no adda met laeng Dios. Ngem idi dagiti kasuratan a mangipakpakita iti kasasaad ken namnama dagiti natay ti naibasa, nagbalbaliw ti panagsasaona. Apay? Agsipud ta nakitana a ti anakna ket adda a sitatalna, a matmaturog ken patay nga addaan iti posibilidad a mapagungar.—Eclesiastes 9:5, 10; Juan 5:28, 29.
Dua kadagiti bumisbisita a Saksi ti simmarungkar iti maysa nga eskuelaan, ket ti mannursuro ti nangawis kadakuada iti uneg ti klase a napunno kadagiti 30 nga agtutubo nga ages-eskuela. Ti mannursuro ti siraragsak a nangawat iti kopia ti publikasion a Ti Librok dagiti Estoria ti Biblia ket kunana iti klasena: “Mangbasatayo ti maysa nga estoria manipud iti daytoy a libro ita a malem.” Kamaudiananna, bayat a ti grupo dagiti Saksi ti mangal-aldaw sadiay, dadduma kadagiti ages-eskuela nga ubbing ti immasideg tapno mangkomosta kadakuada. Dua a sabsabali pay a mangisursuro ti immasideg met tapno makita no ania ti ar-aramidenda, ket isuda, met, siraragsakda nga immawat kadagiti kopia ti libro.
Iti kamaudianan dayta nga aldaw, maysa kadagiti Saksi ti nakasarak iti maysa nga 11-años nga ubing a lalaki ket sinaludsodanna: “Nangnangngegamon aya ti maipapan kadagiti Saksi ni Jehova?” “Wen,” kuna ti ubing a lalaki, “idiay eskuelaan ita nga aldaw.” Kalpasanna nagkalikagum iti maysa a kopia ti Estoria ti Biblia. Iti kamaudiananna pay, iti maysa a pagtaengan a sadiay ti ina dina inawat ti libro nga Agbiag nga Agnanayon, ti bassit nga ubing iti balay nagsao maipapan ti pannakakitana iti libro nga Estoria ti Biblia idiay eskuelaan. Gapuna inawat ti ina ti maysa a kopia dayta a publikasion.
Kadagiti Isuamin a Kita dagiti Tattao
Iti maysa a pagtaengan, impakita dagiti sumarsarungkar a Saksi dagiti ilustrasion idiay libro nga Agbiag nga Agnanayon iti maysa a baket. Ti baket ti nagkomento a ti talaga a kasapulanna isu ti Biblia. Gapuna maragsakan dagiti Saksi a nangted kenkuana iti maysa a kopia ti New World Translation of the Holy Scriptures. Apaman a naaddaanen ti Biblia ti baket ti maragsakan a maaddaan met ti kopia iti maysa a publikasion maipaay iti panagadal ti Biblia. Imbagana kadagiti sangailina a nangnangngegannan ti kaadda dagiti Saksi iti dayta a lugar ket nagkararag nga isuda met koma ti sumarungkar kenkuana ket mangyeg iti Biblia. Ita patiennan a ti kararagna ti nasungbatan.
Maysa nga agtutubo a lalaki nga agtawen iti 30’s ti nangawis kadagiti dua a Saksi iti pagtaenganna. Kalpasan ti ababa a Nainkasuratan a diskusion, kunana: “Mabalin a dikay maragsakan no maammuanyo no siasinoak. Maysaak a padi.” Kuna dagiti Saksi a maragsakanda a makisarita kenkuana, kalpasanna nagsaludsod ti padi iti adu a saludsod maipapan iti pammatida. Idi a nagsaludsod maipapan iti panangusar iti nagan a Jehova, maragsakan a nangipaay kenkuana dagiti sangailina iti maysa a kopia iti broshur a Ti Nasantuan a Nagan nga Agtalinaed iti Agnanayon. Immawat met ti maysa a kopia ti libro nga Agbiag nga Agnanayon, maysa a publikasion a sigurado a mangsungbat iti adu a salsaludsodna.
Iti sabali pay nga okasion, maysa kadagiti Saksi ti inasitgan ti maysa nga agtutubo a lalaki a nakangngeg kenkuana a mangsalsalaysay iti Biblia iti maysa a receptionist iti otel. Imbangonna dagiti salsaludsod a kas ti, “Apay a nakagulgulo ti lubong?” Maragsakan ti Saksi a mangiranud ti naad-adalna manipud iti Biblia iti daytoy ken dagiti mainaig a tema. Ket asino daytoy agtutubo a lalaki? Isu ti maysa a padi nga agbakbakasion iti lugar.
Malaksid pay iti regular a trabaho a panangasaba ti panagbalaybalay, nagundawayan dagiti dadduma pay a pamay-an a pakisaritaan kadagiti amin a kita ti tattao. Iti maysa a lugar iti kabambantayan, nagsardeng ti maysa kadagiti minibus iti igid ti dalan tapno palubosan ti sumagmamano kadagiti pasahero a sukatan dagiti sapatosda nga inusarda iti ili ket mangisuotda kadagiti bota a goma tapno magna a bumallasiw iti kaalogan ket makisarita kadagiti lallaki nga agbalbalsig ken agipempen ti peat a pagsungrodda no panawen ti kalam-ekna. Ti sabali pay a grupo ti nagsardeng ti maysa a nakapimpintas a disso iti igid ti maysa a danaw ti bantay nga adda iti kabakiran. Maysa a trabahador nga agtartrabaho iti estasion ti elektrisidad a matmaturog iti maysa a kotse ti mangtagtagiragsak ti kinaulimek kabayatan ti panagin-inanana kalpasan ti pangngaldaw. Naisturbo ti panagin-inanana, ngem tinagiragsakna ti maysa a makapasaranta a diskusion ket timmabuno iti gimong nga inyurnos dayta a grupo iti dayta a rabii.
Sabali pay a lalaki ti agmammaneho iti maysa a dalan iti traktorana idi a pinasardeng ti maysa a Saksi ket sinaludsodna no addaan ti bassit a kanito a makipatang kadakuada. Isut’ magagaran a makisarita maipapan iti Biblia, nangnangruna maipapan iti “napeggad a panawen” a pagbibiagantayo. (2 Timoteo 3:1-5) Ti interesna ti ad-adda a naparegta idi napakitaan iti ilustrasion manipud iti libro nga Agbiag nga Agnanayon. Maragsakan ti lalaki a makangngeg a daytoy a publikasion ti mabalin a mausar a maipaay iti panagadal ti Biblia iti pamilia ket kunana a dagdagus a rugiannan nga usaren dayta a pangisuro kadagiti innem nga annakna.
Dagiti nareregta a sumarsarungkar a ministro iti isuamin nga edad, a kinuyog ti bassit a grupo dagiti lokal a Saksi idiay Donegal, ti addaan naimbag a rason a maragsakan iti panagreggetda. Bayat ti dua a lawas a kaadda dagiti sangaili sadiay, nakabusbosda ti 5,767 nga oras a pannakisarita kadagiti sabsabali maipapan iti Biblia. Nakaiwarasda iti 1,613 a libro ken Biblia, agraman 2,611 a kopia iti magasin a Pagwanawanan ken Agriingkayo! Nangnangruna nga inapresiar ti sumagmamano a bumalay isu ti Irish-pagsasaona a bersion ti Ti Librok dagiti Estoria ti Biblia.
Saan a ti natangsit a kinadogmatiko wenno rikna ti panaginsasanto ti nangyeg kadagiti bumisbisita a Saksi idiay Donegal. Imbes ketdi, tinarigagayanda nga iranud ti sumagmamano a naimbag a damag kadagiti tattao a, gaput’ panagtataengda iti naiputputong a lugar, mabalin nga awananda ti adu a gundaway a makangngeg iti dayta. Iti panagkomentoda iti umun-una pay a panagdaliasatda nga umas-asping ti kasasaadna, maysa a lokal a pagiwarnak ti nangawag kadagidiay nakipaset kas “sallapingaw.” Kaawatan, isingsingasing daytoy nga isuda ti adda laeng sadiay no kalgaw ngem kalpasanna agtayabdan nga umadayo. Ngem dagidiay a “sallapingaw,” wenno dagiti dadduma a kas kadakuada, agsublidanto manen a mangtulong kadagiti nasingpet panagpuspusona a tattao a makagun-od iti umiso a pannakaammo kadagiti nakaskasdaaw a karkari ti Biblia. Kinapudnona, dadduma a nakipaset kadagiti immun-una a panagdaliasat a panangaskasaba ti agtataengen a permanente ita idiay Donegal.
“Dayta pay laeng ti kasasayaatan a panagdaliasat agingga ita.” Dayta ti sumagmamano kadagiti ebkas ti panangipateg ken ragsak a naaramidan ti sumagmamano a nakiraman iti daytoy a trabaho. Napasaranda ti kinapudno ti proverbio ti Biblia: “Ti managparabur a kararua mapalukmegto, ket ti agsibug isu met laeng ti masibuganto.” (Proverbio 11:25) Wen, nagdakkelan a bendision ti pannakiraman iti naisangsangayan a panagregget a mangipaduyakyak iti naimbag a damag idiay Donegal. Mabalinanyo met aya ti makiraman iti umas-asping a makagunggona a serbisio ken Jehova iti paset ti tay-ak ti lubong nga ayanyo a naluomen a maipaay iti nawadwad a panagani?
[Dagiti mapa/Ladawan iti panid 29]
(Para iti aktual a pannakaurnosna, kitaem ti publikasion)
DONEGAL
NORTHERN IRELAND
Londonderry
Belfast
IRELAND
[Mapa]
EUROPE
ATLANTIC OCEAN
[Ladawan]
Maragsakanda a mangipaduyakyak iti naimbag a damag idiay Donegal
[Ladawan iti panid 30]
Panangaskasaba iti balaybalay idiay umamianan a laud nga Ireland