Ti Kaiyulogan dagiti Damdamag
Panangpalugod iti Basol Awan Pagimbaganna
Iti nabiit pay a palawag kadagiti papangulo ti iglesia, ti kolumnista iti relihion a ni Michael J. McManus kinunana a dagiti ig-iglesia nakatulongda iti panagsisina dagiti pampamilia nga Americano. Kasta ti report ti The Fresno Bee, maysa a pagiwarnak iti California. Napaliiw ni McManus nga adda 1.2 milion a diborsio ken 750,000 a naipasngay a bastardo idiay Estados Unidos bayat iti 1985 ken adda 2.2 milion nga agassawa nga agkabkabbalay laeng.
Impamatmat ni McManus nga, imbes a nainget a salimetmetanda ti pagalagadan iti Biblia maipapan iti moralidad, isu a mangparegta iti kinasungdo iti panagasawa, ti iglesia innalana ti basta pananglaglag-an laeng kadagita nga isyu gapu iti panangikagumaanna a mangpaadu iti tumabuno. Kas maysa a pangarigan, insitarna ti nabiit pay a singasing “a ti Iglesia Episcopal idiannan ti panangbusorna iti agassawa nga agkabkabbalay laeng a saan a nagkasar.”
Ti kasta a moderno a panangmatmat iti sekso ken panagasawa ti maisupadi unay iti Biblia. Kinuna ti Kristiano nga apostol a ni Pablo: “Ti panagasawa nadayaw koma kadagiti isuamin, ket ti pagiddaan awan koma ti tulawna.” (Hebreo 13:4) Idi sinango dagiti Pariseo ni Jesu-Kristo maipapan iti diborsio, kinunana a “ti lalaki panawannanto ti ama ken inana, ket makitiponto iti asawana, ket isuda a dua maymaysadanto a lasag.” Kinunana pay: “Siasinoman a mamagtalawto iti asawana a babai, no saan a maipuon iti pannakiabig, ket makiasawanto iti sabali makabasolto iti pannakiabig iti dina asawa.”—Mateo 19:4, 5, 9.
Iti panangsungbatna iti naisingasing a di panangikankano ti iglesia maipapan kadagita a moral nga isyu, kinuna ni McManus: “Ti Iglesia Episcopal nakagtengen iti punto a sadiay kunaenna a ti kapapatgan a dayawna isu ti panangpalugod. Awan ti imbaga ni Jesus a panangpalugodna iti basol. Kinondenarna ti basol.” Umanamong dagiti aduan-pannakaammo nga estudiante ti Biblia.
Di Mailibak a Pammaneknek
Kalpasan iti adu a tawen a natangsit a panagduadua ti agnosticismo, dagiti sientista mangrugrugidan a mangipaay iti panangmatmat manen iti Dios,” kuna ti kolumnista a ni Pete McMartin iti The Vancouver Sun, maysa a pagiwarnak iti British Columbia, Canada. Nupay no ti relihion ken ti siensia agsusuppiatda iti adun a siglo, “dayta ket saanen a pudno,” kuna ni Wasley Krogdahl, maysa a dati a propesor iti astronomia ken pisika iti University of Kentucky. Kinunana pay: “Ti cosmology ti nangilawlawagen a ti lubong adda nangrugianna, ket dayta ipamatmatna ti maysa a namarsua.”—The State Journal-Register, Springfield, Illinois.
Siempre dadduma a sientista ti agpampanunot manen maipapan iti nagtaudan ti uniberso. Ti rason? “Ti uniberso ad-adu ti pategna ngem idi 50 a tawtawenen ti napalabas,” inlawlawag ti astronomo a ni Krogdahl. Bayat ti napalabas a 25 a tawtawen, ti pannakapataud dagiti ad-adda a sensitibo nga alikamen ti nagbanagen iti pannakadiskubre kadagiti quasars, neutron stars, ken pulsars. Patien ni Krogdahl a bayat a ti pannakaammo iti uniberso rumang-ay, kasta met dagiti pammaneknek nga adda maysa a Dios. Dayta a pammaneknek, kunana, “ti basta nangiwalin kadagiti pagpagarup manipud kadagiti di mamati nga adda dios wenno dagiti ateista.”
Kaskasdi, ti adu a tawtawen nga innala dagiti sientipiko a kapanunotan tapno awaten kalpasan iti makabannog a panagsirarak ken panagadal, naammuanen dagiti estudiante iti Biblia iti adun a siglo. “Dagiti di makita a kababalin [ti Namarsua], kayatna a sawen ti agnanayon a pannakabalin ken ti kinadiosna, makitada, nanipud pay idi panangrugi ti lubong, tapno maipabigbigda, kadagiti bambanag nga inaramidna.” (Roma 1:20, The New English Bible) Iti simple a panagsao, ti di mailibak a pammaneknek kanayon nga adda sadiay.
[Ladawan iti panid 24]
Orion Nebula
[Credit Line]
U.S. Naval Observatory photo