“Pagilasinan iti Langit”

ADDA tay kadaanan a pagsasaoda maipapan iti kasasaad ti panawen: “Nasayaat ti tiempo no nalabaga ti langit iti rabii. Umay ti bagyo no nalabaga ti langit iti agsapa.” Nagpannuray dagiti marinero iti kasta a pagilasinan iti adun a siglo.

Ita, maus-usar dagiti satellite, panagadal iti temperatura babaen ti kompiuter, Doppler radar, ken dadduma pay a sientipiko a pamay-an a mangipakaammo iti kasasaad ti panawen. Ket masansan a maitunos iti naadaw a pagsasao dagiti pasamak iti kaaldawantayo.

Dinakamat ni Jesu-Kristo ti kasasaad ti panawen idi a kiniddaw dagiti relihiuso a kabusorna nga iparanganna ida iti karkarna a “pagilasinan iti langit,” a mangpaneknek nga isu ti Mesias. “No mumalemen,” kinunana, “nairuamkayo a mangikuna, ‘Nasayaatto ti tiempo, ta ti langit nalabaga’; ket iti bigat, ‘Nalam-ek ken matutudo ti kasasaad ti panawen ita, ta ti langit nalabaga, ngem nakuyemyem.’ Ammoyo nga ilasin ti langa ti langit ngem dikay mabalin nga ammuen dagiti pagilasinan dagiti panawen. Ti maysa a kaputotan a dakes ken nakamalala agdawat iti maysa a pagilasinan, ngem awanto ti pagilasinan a maited kenkuana no di ti pagilasinan ni Jonas.”​—Mateo 16:1-4.

Maibaga dagiti kabusor ni Jesus ti kasasaad ti panawen ngem dida matarusan dagiti naespirituan a banag. Kas pangarigan, ti met ngay “pagilasinan ni Jonas”? Kalpasan ti tallo nga aldaw a kaaddana iti tian ti dakkel nga ikan, nangasaba ti mammadto ti Dios a ni Jonas idiay Nineve ket nagbalin dayta a pagilasinan iti kabisera ti Asiria. Naited iti kaputotan idi kaaldawan ni Jesus ti “pagilasinan ni Jonas” idi adda ni Kristo iti tanem iti tallo nga aldaw sa napagungar. Inwaragawag dagiti adalanna ti kinapudno dayta a pasamak, iti kasta nagbalin ni Jesus a pagilasinan iti dayta a kaputotan.​—Mateo 12:39-41.

Iti sabali a gundaway, dinamag dagiti adalan ni Jesus ti “pagilasinan” ti masanguanan a “kaadda[na]” iti pannakabalin ti Pagarian. Kas sungbatna, nangted iti ragup a pagilasinan a buklen ti nagduduma a pasamak, a pakairamanan dagiti awan kaaspingna a gubat, dadakkel a ginggined, kinakirang ti taraon, ken ti sangalubongan a pannakaikaskasaba ti naipasdeken a nailangitan a Pagarian ti Dios.​—Mateo 24:3-14.

Mailasinyo met laeng ti pagilasinan ti kaadda ni Kristo kas di makita a nailangitan nga Ari? (1 Pedro 3:18) Matungtungpalen dagiti nadumaduma a paset dayta a pagilasinan iti daytoy a kaputotan. (Mateo 24:34) Iti met ngay masanguanan? Saan laeng nga ipakita ti Biblia nga asidegen ti panungpalan daytoy sistema dagiti bambanag no di pay ket ipakaunana ti kari ti Dios maipapan iti panagbannawag ti maysa a naraniag a baro nga aldaw agpaay iti sangatauan.​—2 Pedro 3:13.

Awatenyo Kadi ti Maysa nga Isasarungkar?

Uray iti daytoy nariribuk a lubong, magun-odanyo ti kinaragsak manipud umiso a pannakaammo iti Biblia maipapan iti Dios, iti Pagarianna, ken iti nakaskasdaaw a panggepna maipaay iti sangatauan. No awatenyo ti ad-adu pay nga impormasion wenno no kayatyo nga adda maysa a sumarungkar kadakayo tapno idauluannakayo iti libre a panagadal ti Biblia iti pagtaenganyo, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista idiay panid 2.